ئىران ھورمۇز بوغۇزىدىن ئۆتكەن بەزى پاراخوتلاردىن تەخمىنەن 2 مىليون دوللار ئۆتۈش ھەققى يىغقانلىقىنى ئېلان قىلدى.
پارلامېنت دۆلەت بىخەتەرلىكى ۋە تاشقى سىياسەت كومىتېتىنىڭ ئەزاسى ئەلائەددىن بۇرۇجېردى يەكشەنبە كۈنى ئېلان قىلغان باياناتىدا، ئىراننىڭ 47 يىلدىن كېيىن بوغۇز ئۈستىدە «يېڭى بىر ھاكىمىيەت چۈشەنچىسى» ياراتقانلىقىنى ۋە ئەمدىلىكتە بەزى پاراخوتلاردىن ئۆتۈش ئۈچۈن 2 مىليون دوللار تەلەپ قىلىنىۋاتقانلىقىنى بىلدۈردى.
بۇرۇجېردى ئىران تېلېۋىزىيە پروگراممىلىرىدا تارقىتىلغان باياناتىدا، بەزى پاراخوتلاردىن 2 مىليون دوللار ئۆتۈش ھەققى ئېلىنىشىنىڭ ئىراننىڭ قۇدرىتىنى كۆرسىتىپ بېرىدىغانلىقىنى ئىپادىلىدى.
مارت ئېيىنىڭ بېشىدىن بۇيان، ئىران كۈنىگە تەخمىنەن 20 مىليون ۋارىل نېفىت توشۇلىدىغان ۋە يەر شارى سۇيۇقلاندۇرۇلغان تەبىئىي گاز سودىسىنىڭ تەخمىنەن %20ى ئۆتىدىغان ھورمۇز بوغۇزىنى زور دەرىجىدە تاقىۋەتتى.
بۇ ئەھۋال دېڭىز تىرانسپورتى ۋە سۇغۇرتا تەننەرخىنى ئاشۇرۇش بىلەن بىرگە نېفىت باھاسىنى ئۆرلىتىۋەتتى ھەمدە دۇنيا ئىقتىسادىغا بولغان ئەندىشىلەرنى كۈچەيتتى.
ئامېرىكا ۋە ئىسرائىلىيەنىڭ 28-فېۋرال ئىرانغا قاراتقان بىرلەشمە ئۇرۇشىدىن كېيىن، رايوندىكى جىددىيچىلىك كۈچىيىشنى داۋاملشتۇرماقتا.
توقۇنۇشلاردا ھازىرغىچە، ئارىسىدا سابىق دىنىي رەھبەر ئەلى خامەنىيىمۇ بولغان 1300 دىن ئارتۇق كىشىنىڭ ھاياتىدىن ئايرىلغانلىقى خەۋەر قىلىندى.
ئىران ئىسرائىلىيەدىن باشقا يەنە ئىيوردانىيە، ئىراق ۋە پارىس قولتۇقى ئەللىرىدىكى «ئامېرىكا ھەربىي بازىلىرىنى نىشان قىلغانلىقىنى» بىلدۈرگەن ئۇچقۇچىسىز ئايروپىلان ۋە باشقۇرۇلىدىغان بومبا ھۇجۇملىرى بىلەن ئىنكاس قايتۇردى. بۇ ھۇجۇملار ئۆلۈم-يىتىم ۋە ئۇل ئەسلىھە زىيانلىرىنى كەلتۈرۈپ چىقىرىش بىلەن بىرگە، دۇنيا بازارلىرى ۋە ئاۋىئاتسىيە ساھەسىگىمۇ ئېغىر تەسىر كۆرسەتتى.
