باش مىنىستىر كې پى شارما ئولى (KP Sharma Oli) نىڭ ئىستېپا بېرىشىگە سەۋەب بولغان كەڭ كۆلەملىك Z ئەۋلادلىرى (يېڭى ئەۋلاد ياشلار) نامايىشىدىن ئالتە ئاي كېيىن، تەخمىنەن 19 مىليون نېپاللىق يېڭى پارلامېنتنى سايلاش ئۈچۈن بېلەت تاشلىماقتا.
پەيشەنبە كۈنى نېپالدا پارلامېنتنىڭ تۆۋەن پالاتاسىنىڭ 275 ئەزاسىنى سايلاش ئۈچۈن بېلەت تاشلاش جەريانى باشلاندى. باش مىنىستىر كې پى شارما ئولى ھۆكۈمىتىنىڭ Z ئەۋلادلىرى باشلامچىلىقىدىكى نامايىشلار بىلەن ئاغدۇرۇلۇشىدىن بۇيان ئالتە ئاي ۋاقىت ئۆتتى.
2022-يىلى نويابىردا بەش يىللىق ۋەزىپە مۇددىتى ئۈچۈن سايلانغان ۋەكىللەر پالاتاسى (HoR) ئۆتكەن يىلى سېنتەبىردە Z ئەۋلادى ياشلىرى باشلامچىلىقىدىكى كەڭ كۆلەملىك نامايىشلار نەتىجىسىدە تارقىتىۋېتىلگەن ئىدى.
پارلامېنت بىناسى، باش مىنىستىرلىق مەھكىمىسى، ئالىي سوت ۋە خۇسۇسىي شىركەتلەر، چىرىكلىك ۋە تەڭسىزلىككە خاتىمە بېرىشنى تەلەپ قىلغان نامايىشچىلار تەرىپىدىن كۆيدۈرۈۋېتىلدى. ۋەقەلەردە 70 تىن ئارتۇق كىشى ھاياتىدىن ئايرىلدى.
بۇ قوزغىلاڭ ئولىنىڭ ئىستېپا بېرىشىنى كەلتۈرۈپ چىقاردى ۋە داڭلىق پېنسىيەگە چىققان قانۇنشۇناس سۇشىلا كاركى (Sushila Karki) ۋاقىتلىق رەھبەر بولۇپ ۋەزىپىگە كەلدى.
كاركى ھۆكۈمىتى ۋەزىپىگە ئولتۇرۇپ ئالتە ئايدىن كېيىن سايلام مۇساپىسىنى باشلىدى.
تەخمىنەن 19 مىليون سايلىغۇچى ۋەكىللەر پالاتاسىدىكى 165 ئەزانى ئاددىي كۆپ سانلىق ئاۋاز (first-past-the-post) سىستېمىسى بىلەن سايلايدۇ. قالغان 110 پارلامېنت ئەزاسى بولسا تولۇقلىما نىسبەتلىك ۋەكىللىك تۈرىدىن سايلىنىدۇ.
يۇقىرى پالاتا، يەنى «دۆلەتلىك مەجلىس» دەپ ئاتىلىدىغان قىسىم بولسا، تۆۋەن پالاتادا سايلانغان خەلق ۋەكىللىرى ۋە ئۆلكىلىك مەجلىس ئەزالىرى تەرىپىدىن سايلىنىدۇ.
ئومۇمىي سايلىغۇچىلار ئىچىدە 900 مىڭدىن ئارتۇق كىشى تۇنجى قېتىم ئاۋاز بېرىدۇ. ياشلار يېشى بىر يەرگە بېرىپ قالغان ۋە ئىقتىدارى يېتەرلىك ئەمەس دەپ قارالغان رەھبەرلەرنى چەتكە سۈرۈپ، ياشلارنىڭ ھاكىمىيەت بېشىغا كېلىشىنى قوللىماقتا.
پايتەخت كاتماندۇنىڭ سابىق شەھەر باشلىقى بالېندرا شاھ (Balendra Shah) يېڭى باش مىنىستىر بولۇش ئېھتىمالى ئەڭ يۇقىرى نامزاتلارنىڭ بىرى سۈپىتىدە كۆرسىتىلمەكتە.
ئوقۇش تارىخى بويىچە بىر قۇرۇلۇش ئىنژېنېرى بولغان بالېندرا، ئولىنىڭ سايلام رايونى بولغان جھاپا-5 (Jhapa-5) دىن نامزات بولۇش ئۈچۈن شەھەر باشلىقلىق ۋەزىپىسىدىن ئىستېپا بەرگەن ئىدى.
