ئامېرىكا قوشما ئىشتاتلىرى پىرېزىدېنتى دونالد ترامپ ئىراننىڭ يادرو پىروگراممىسىغا مۇناسىۋەتلىك ئەمەلىي قەدەملەرنى بېسىشى بەدىلىگە، بۇ دۆلەتكە قارىتىلغان ئېمبارگولارنىڭ يېنىكلىتىلىدىغانلىقى ۋە ئىراننىڭ توڭلىتىپ قويۇلغان مەبلەغلىرىنىڭ قويۇپ بېرىلىدىغانلىقىغا تەييار ئىكەنلىكى ھەققىدىكى دەۋالارنى رەت قىلدى.
دونالد ترامپ ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا بۇ ھەقتە توختالدى. ترامپ Axios خەۋەر سۇپىسىنىڭ تېھرانغا يۈرگۈزۈلگەن ئېمبارگولارنى يېنىكلىتىشكە قىزىقىدىغانلىقى توغرىسىدىكى خەۋىرىنى رەت قىلىپ: «بۇ توغرا ئەمەس، مەن ئۇلارغا ھېچقانداق تەكلىپ بەرمىدىم» دېدى. ترامپ خەۋەرنىڭ ئاساسسىز ئىكەنلىكىنى ئىلگىرى سۈرۈپ، ئۇنىڭ دەرھال ئۆچۈرۈلۈشى كېرەكلىكىنى بىلدۈردى.
Axios نىڭ ئىسمىنى ئاشكارىلاشنى خالىمىغان ئامېرىكا دائىرىلىرى مەنبە كۆرسىتىپ ئېلان قىلغان خەۋىرىدە، ترامپنىڭ ئىران يادرو پىروگراممىسى بويىچە ئەمەلىي قەدەملەرنى تاشلىسا، تېھرانغا يۈرگۈزۈلگەن ئېمبارگولارنى يېنىكلىتىشكە ۋە توڭلىتىپ قويۇلغان ئىران مەبلەغلىرىنى قويۇپ بېرىشكە قىزىقىدىغانلىقى ئىلگىرى سۈرۈلگەن ئىدى. خەۋەردە يەنە، مەزكۇر تەرەققىياتلارنىڭ قاتار ۋە پاكىستانلىق مۇرەسسەچىلەرنىڭ ئامېرىكا بىلەن ئىران ئوتتۇرىسىدا كېلىشىم ھاسىل قىلىش ئۈچۈن ئېلىپ بېرىۋاتقان دىپلوماتىك ئالاقىلىرى جەريانىدا كۈنتەرتىپكە كەلگەنلىكى قەيت قىلىنغان ئىدى.
