تېھران ھۆكۈمىتى بىرلەشكەن دۆلەتلەر تەشكىلاتى (ب د ت) باش كاتىپى ئانتونىيو گۇتېررېسقا يوللىغان مەكتۇپىدا، ئامېرىكا پىرېزىدېنتى دونالد ترامپنىڭ سۆزلىرىنىڭ «ھەقىقىي ھەربىي ھۇجۇم خەۋپىدىن سىگنال بەرگەنلىكى»نى تەكىتلىدى. ئىران تەرەپ ئۇرۇش تەرەپدارى ئەمەسلىكىنى ئەسكەرتىش بىلەن بىرگە، ئەگەر ھۇجۇمغا ئۇچرىسا، رايوندىكى «دۈشمەن كۈچ» دەپ تەرىپلىگەن تەرەپنىڭ بارلىق بازىلىرى، ئەسلىھەلىرى ۋە مال-مۈلۈكلىرىنى «قانۇنلۇق ھۇجۇم نىشانى» دەپ قوبۇل قىلىدىغانلىقىنى ئۇقتۇردى.
ئىراننىڭ ب د ت دا تۇرۇشلۇق دائىمىي ۋەكىللەر ئۆمىكى پەيشەنبە كۈنى يوللىغان مەكتۇپىدا، ترامپنىڭ باياناتلىرىنىڭ رايون تىنچلىقىغا تەھدىت ئىكەنلىكىنى ئوتتۇرىغا قويدى. مەكتۇپتا: «ئىران ئۇرۇشنى خالىمايدۇ، ئەمما ھەربىي ھۇجۇمغا ئۇچرىسا، ئۆزىنى قوغداش ئۈچۈن ئەڭ كەسكىن شەكىلدە ئىنكاس قايتۇرىدۇ» دېگەن ئىبارىلەرگە ئورۇن بېرىلدى.
ترامپ يېقىندا ۋاشىنگتون بىلەن تېھران ئوتتۇرىسىدىكى سۆھبەتلەر توغرىسىدا توختىلىپ، ئىراننىڭ كەلگۈسى 10 كۈن ئىچىدە «ئەھمىيەتلىك بىر كېلىشىم» تۈزۈشى كېرەكلىكىنى، ئەكسىچە بولغاندا «ناھايىتى يامان ئىشلارنىڭ يۈز بېرىدىغانلىقى»نى ئېيتىپ ئاگاھلاندۇرغانىدى. شۇنىڭ بىلەن بىر ۋاقىتتا، ئامېرىكا ئوتتۇرا شەرق رايونىغا ئۇرۇش پاراخوتلىرى، جەڭ ئايروپىلانلىرى ۋە قوشۇمچە ھەربىي ئەسلىھەلەرنى ئەۋەتكەن بولۇپ، رايوندىكى جىددىيچىلىك يۇقىرى پەللىگە چىقتى.
ترامپ غەززەدە مۇقىملىقنى ئىشقا ئاشۇرۇش مەقسىتىدە ئۆتكۈزۈلگەن «تىنچلىق كېڭىشى»نىڭ ئېچىلىش مۇراسىمىدا قىلغان سۆزىدە: «كېلىشىم تۈزۈلمىسە، ۋاشىنگتون يەنە بىر قەدەم ئىلگىرىلەشكە مەجبۇر بولىدۇ، نەتىجىنى 10 كۈن ئىچىدە بىلىسىلەر» دېگەنىدى. نېتانياھۇمۇ ترامپنى قوللاپ: «ئەگەر ئايەتۇللاھلار بىزگە ھۇجۇم قىلىشتەك بىر خاتالىق ئۆتكۈزسە، تەسەۋۋۇر قىلغۇسىز دەرىجىدە ئېغىر زەربىگە ئۇچرايدۇ» دەپ تەھدىت سالدى.
نۆۋەتتە ئامېرىكا رايونغا ئەسكەر يىغىشنى داۋاملاشتۇرماقتا. سۈنئىي ھەمراھ كۆرۈنۈشلىرىدىن ئاشكارىلىنىشىچە، ئامېرىكانىڭ «ئىبراھىم لىنكولىن» ناملىق ئاۋىياماتكىسى تەخمىنەن 80 ئايروپىلان بىلەن ئىران دېڭىز قىرغىقىغا 700 كىلومېتىر كېلىدىغان جايغا ئورۇنلاشقان. بۇنىڭغا قارىتا، ئىران ئىسلام ئىنقىلاب مۇھاپىزەتچىلىرى قىسىملىرى ھۆرمۈز بوغۇزىدا مانېۋىر ئۆتكۈزۈپ، ئۆزىنىڭ ھەربىي قۇدرىتىنى نامايان قىلدى. دۇنيا نېفىت توشۇش مىقدارىنىڭ تۆتتىن بىرى ئۆتىدىغان بۇ بوغۇزنىڭ تاقىلىپ قېلىش ئېھتىماللىقى نېفىت باھاسىنىڭ ئۆسۈپ كېتىشىگە سەۋەب بولماقتا.
