تۈركىيە ئاپەت ۋە جىددىي ھالەتلەرگە تاقابىل تۇرۇش ئىدارىسى (AFAD) نىڭ ئۇچۇرىغا قارىغاندا، مىسىرنىڭ شىمالىي شەرقىدىكى ئىسمائىلىيە ۋىلايىتىدە 5.3 بال يەر تەۋرەش يۈز بەردى.

تۈركىيە ئاپەت ۋە جىددىي ھالەتلەرگە تاقابىل تۇرۇش ئىدارىسى (AFAD)  يەر تەۋرەشنىڭ دۈشەنبە كۈنى شۇ يەرنىڭ ۋاقتى ئەتىگەن سائەت 03:00 دە يۈز بەرگەنلىكىنى ۋە يەر يۈزىدىن 5.47 كىلومېتىر چۇڭقۇرلۇقتا قەيت قىلىنغانلىقىنى بىلدۈردى.

مىسىر يەرلىك تاراتقۇلىرى يەر تەۋرەشنىڭ پايتەخت قاھىرەنىمۇ ئۆز ئىچىگە ئالغان بىر قانچە شەھەردە ھېس قىلىنغانلىقىنى، ھازىرغىچە ئادەم ئۆلۈش ياكى ۋەيرانچىلىق ئۇچۇرى كەلمىگەنلىكىنى يەتكۈزدى.

مىسىر قىزىل ئاي جەمئىيىتى ھازىرغىچە يارىلىنىش ياكى بوزۇلۇشقا ئائىت بىرەر ئۇچۇر ئالمىغانلىقىنى ئۇقتۇرۇش بىلەن بىرگە، ئاممىنى كونا ياكى كۆز بىلەن كۆرگىلى بولىدىغان يېرىقلىرى بار بىنالاردىن يىراق تۇرۇشقا چاقىردى.

مىسىر سەھىيە مىنىستىرلىقى جىددىي ئىنكاس قايتۇرۇش پىلانىنى يولغا قويۇپ، دوختۇرخانىلارنى ئەڭ يۇقىرى تەييارلىق ھالىتىگە ئۆتكۈزدى.

رەسمىي باياناتقا قارىغاندا، مىسىر يەر تەۋرەشنىڭ مەركىزىي نۇقتىسىغا ئائىت ئۇچۇرلارنى يېڭىلاپ، تىلغا ئېلىنغان يەر تەۋرەشنىڭ سۇۋەيش شەھىرىدىن 38 كىلومېتىر يىراقلىقتا ئارخىپقا كىرگۈزۈلگەنلىكىنى ئۇقتۇردى.

رايوندىكى ئاندروئىد (Android) ئىشلەتكۈچىلىرىگە مىسىردا 5.9 بال يەر تەۋرەش يۈز بەرگەنلىكىنى كۆرسىتىدىغان يەر تەۋرەش ئاگاھلاندۇرۇشى كەلدى.

سېئىسمولوگلار قوشۇمچە سانلىق مەلۇماتلارنى تەھلىل قىلىۋاتقان بولۇپ، USGS مۇتەخەسسىسلىرى تېخىمۇ كۆپ ئۇچۇرلارغا ئېرىشىشكە ئەگىشىپ، يەر تەۋرەش كۈچى خەرىتىسىنى يېڭىلىشى مۇمكىن.