تۈركىيە بۈيۈك مىللەت مەجلىسى رەئىسى نۇمان قۇرتۇلمۇش ئىجتىمائىي تاراتقۇدا ئېلان قىلغان باياناتىدا، ھەممە قاتنىشالايدىغان بىر تۈزۈم ۋە ئادىل ۋەكىللىككە ئىگە دېموكراتىك بىر سۈرىيەنىڭ «رايوننىڭ كاپالىتى» بولىدىغانلىقىنى قەيت قىلدى.
قۇرتۇلمۇشنىڭ سۆزىگە قارىغاندا، تۈركىيە سۈرىيەدىكى بىرلىشىش مۇساپىسىدە تاشلانغان كۈچلۈك قەدەملەرنى دىققەت بىلەن كۆزىتىۋاتقان بولۇپ، نۆۋەتتىكى ئەھۋالغا يۇقىرى باھا بېرىدىكەن. ئۇ سۈرىيە ھۆكۈمىتى بىلەن ي پ گ تېررورلۇق تەشكىلاتى ئوتتۇرىسىدا 2025-يىلى 10-مارتتا ئىمزالانغان ئورتاق تونۇش رامكا كېلىشىمى بىلەن 30-يانۋاردىكى كېلىشىم ماددىلىرىغا تولۇق رىئايە قىلىشنىڭ سۈرىيەگە خاتىرجەملىك، رايونغا مۇقىملىق ئېلىپ كېلىدىغانلىقىنى تەكىتلىدى.
بۇ كېلىشىمنىڭ ھەربىي ۋە مەمۇرىي جەھەتتىن باسقۇچلۇق بىرلىشىشنى نىشان قىلىشىغا «رايوننىڭ تىنچلىقى ئۈچۈن <قىممەتلىك پۇرسەت>» دەپ باھا بەرگەن قۇرتۇلمۇش، بۇنىڭ سۈرىيەنىڭ دۆلەت ئىقتىدارىنى ئاشۇرۇپ، يېڭى بىر خەۋپسىزلىك قۇرۇلمىسىنى ۋۇجۇدقا چىقىرىدىغانلىقىنى تەكىتلىدى. ئۇ يەنە ھېچقانداق سالاھىيەت، ئېتىقاد ۋە پىكىرنى چەتكە قاقماستىن، ھەر بىر سۈرىيە پۇقراسىنىڭ سىياسىي سىستېمىدا شەرەپلىك ئورۇنغا ئىگە بولۇشى كېرەكلىكىنى، ئەمەلىي بۆلۈنۈشلەرنىڭ ھېچكىمگە خاتىرجەملىك ئېلىپ كەلمەيدىغانلىقىنى جكىلىدى.
«سۈرىيە سۈرىيەلىكلەرنىڭدۇر» دېگەن قۇرتۇلمۇش، تۈركىيەنىڭ سۈرىيەنى قايتا قۇرۇش، ئورگانلارنى كۈچەيتىش، چېگرا بىخەتەرلىكىنى بەرپا قىلىش ۋە تېررورلۇققا قارشى تۇرۇشتا ئۆزىگە چۈشكەن ھەر قانداق ياردەمنى بېرىشكە تەييار ئىكەنلىكىنى يەنە بىر قېتىم تەكىتلىدى.
