خېگسېت كولورادو زىيارىتى جەريانىدا مۇخبىرلارنى كۈتۈۋېلىش يىغىنىدا قىلغان سۆزىدە، پىرېزىدېنت دونالد ترامپنىڭ دىپلوماتىك ھەل قىلىش چارىسىنى ئەۋزەل كۆرىدىغانلىقىنى تەكرارلىدى. بىراق، ئىران بىر كېلىشىم ھاسىل قىلىشنى رەت قىلسا، ئامېرىكا ئارمىيەسىنىڭ ھەر ئېھتىمالغا قارشى بارلىق سىنارىيەلەرگە قارىتا پىلانلىرىنىڭ تەييار ئىكەنلىكىنى ئەسكەرتىپ مۇنداق دېدى:
«ئىران بىر كېلىشىم تۈزۈشى كېرەك. ئىراننىڭ كېلىشىم تۈزۈش پۇرسىتى بار. پىرېزىدېنت ئەۋزەل كۆرىدىغان نەتىجە مۇشۇ بولىدۇ.
بىزنىڭ ۋەزىپىمىز تاللاشلارنى سۇنۇش؛ ئەگەر ئىران كېلىشىمنى قوبۇل قىلماسلىقنى تاللىسا، پىرېزىدېنتقا سۇنىدىغان تاللاشلىرىمىز بولىدۇ.»
ئۇ، ھەربىي ھۇجۇملارنىڭ يەنىلا كۈنتەرتىپتە بار-يوقلۇقىغا ئائىت سوئالغا «بارلىق تاللاشلار سۆھبەت ئۈستىلىدە» دەپ جاۋاب بەردى. مىنىستىر يەنە: «قارار پىرېزىدېنتقا تەۋە. بىز بۇ يەردە بىر كېلىشىمنىڭ تەمىنلىنىشىگە ياردەم بېرىش ئۈچۈن تۇرىمىز. مېنىڭچە ئىراننىڭ ياخشى بىر كېلىشىم تۈزۈشى ئاقىلانىلىك بولىدۇ» دېدى.
ترامپ بولسا دۈشەنبە كۈنى ئەتىگەندە، باش ئىشتاب باشلىقى گېنېرال دان كېيىننىڭ «ئىرانغا قارىتا ھەربىي ئارىلىشىش ئېغىر خەتەرلەرنى ئېلىپ كېلىشى ۋە ئامېرىكانى رايوندا ئۇزۇن مۇددەتلىك بىر توقۇنۇشنىڭ ئىچىگە سۆرەپ كىرىشى مۇمكىن» دەپ ئۆزىگە ۋە باشقا يۇقىرى دەرىجىلىك ئەمەلدارلارغا مەسلىھەت بەرگەنلىكىگە ئائىت تاراتقۇلاردا چىققان خەۋەرلەرنى رەت قىلدى.
ترامپ ئاممىۋى ئورتاقلىشىش تور بېتى Truth Social سەھىپىسىدە ئېلان قىلغان باياناتىدا مۇنداق دېدى:
«ساختا خەۋەر تاراتقۇلىرىدا نۇرغۇن خەۋەرلەر تارقىتىلدى؛ بۇ خەۋەرلەردە، بەزىدە رازىن دەپمۇ ئاتىلىدىغان گېنېرال دانىيال كېيىننىڭ ئىران بىلەن ئۇرۇش قىلىشىمىزغا قارشى ئىكەنلىكى ئىلگىرى سۈرۈلمەكتە. بۇ ئاتالمىش زور بىلىم مەنبەسى ھېچقانداق ئاساسقا ئىگە ئەمەس ۋە %100 خاتا.»
ترامپ ھەربىي ھەرىكەتكە ئائىت ھەرقانداق قارارنىڭ ئاخىرقى ھېسابتا ئۆزىگە تەۋە بولىدىغانلىقىنى تەكىتلەپ مۇنداق دېدى:
«قارار چىقارغۇچى مەن. بىر كېلىشىم بولۇشىنى، بولماسلىقىدىنمۇ بەكرەك ئەۋزەل كۆرىمەن، ئەمما بىر كېلىشىم تۈزمىسەك، بۇ شۇ دۆلەت ئۈچۈن ۋە شۇ دۆلەتنىڭ خەلقى ئۈچۈن ئىنتايىن يامان بىر كۈن بولىدۇ. چۈنكى ئۇلار بۈيۈك ۋە ئاجايىپ خەلق، بۇنداق بىر ئىشنىڭ ئۇلارنىڭ بېشىغا كېلىشىگە ئەسلىدە يول قويۇلماسلىقى كېرەك ئىدى.»
رايونلۇق جىددىيچىلىكنىڭ كۈچىيىشى ۋە يۈز بېرىش ئېھتىماللىقى بولغان بىر ئۇرۇش ھەققىدىكى پەرەزلەر ئاستىدا، ئىران ۋە ئامېرىكا ۋەكىللەر ئۆمەكلىرىنىڭ يادرو كېلىشىمى ھاسىل قىلىش دائىرىسىدە سۆھبەت ئۆتكۈزۈش ئۈچۈن پەيشەنبە كۈنى شىۋېيتسارىيەنىڭ جەنۋە شەھىرىدە قايتىدىن بىر يەرگە جەم بولۇشى كۈتۈلمەكتە.
