سانائەت ۋە قۇرۇلۇش مەيدانلىرىدىكى ھادىسىلەر ئۇزۇندىن بۇيان كەڭ دائىرىدە يۈز بېرىۋاتقان تايلاندتا، بىخەتەرلىك بەلگىلىمىلىرىنىڭ قاتتىق ئىجرا قىلىنماسلىقى سەۋەبىدىن كۆپىنچە ئۆلۈم بىلەن ئاخىرلىشىدىغان ۋەقەلەر مەيدانغا كەلمەكتە.
يەرلىك دائىرىلەر تايلاندتا يۇقىرى سۈرئەتلىك تۆمۈر يول لىنىيەسىدىكى بىر كىراننىڭ چارشەنبە كۈنى بىر يولۇچىلار پويىزىنىڭ ئۈستىگە يىقىلىپ چۈشۈشى نەتىجىسىدە، مەزكۇر پويىزنىڭ رېلىستىن چىقىپ كېتىپ، كەم دېگەندە 22 كىشىنىڭ جېنىغا زامىن بولغانلىقىنى بىلدۈردى.
ناخون راتچاسىما ۋىلايەتلىك ساقچى ئىدارىسىنىڭ باشلىقى تاتچاپون چىنناۋوڭ، ھادىسىدە 22 كىشىنىڭ ئۆلگەنلىكىنى، 30 دىن ئارتۇق كىشىنىڭ يارىلانغانلىقىنى ئۇقتۇردى.
ۋەقە شۇ جاي ۋاقتى ئەتىگەن سائەت تەخمىنەن 09:00 ئەتراپىدا، پايتەخت باڭكوكنىڭ شەرقىي شىمالىغا جايلاشقان ناخون راتچاسىما رايونىدا، يۇقىرى سۈرئەتلىك تۆمۈر يول تورىنى قۇرۇشقا ئىشلىتىلىۋاتقان بىر كىراننىڭ يولۇچىلار پويىزى ئۈستىگە چۈشۈپ كېتىشى نەتىجىسىدە يۈز بەردى.
ناخون راتچاسىما ۋىلايىتى ئاممىۋى ئالاقە ئىشلىرى ئىشخانىسى تەرىپىدىن ئېلان قىلىنغان باياناتتا مۇنداق دېيىلدى:
«بىر كىران پويىز ئۈستىگە چۈشۈپ كېتىشى نەتىجىسىدە پويىز رېلىستىن چىقىپ كەتكەن، ئارقىدىنلا ئوت ئاپىتى يۈز بەرگەن.»
يەرلىك ئاخبارات ۋاسىتىلىرىدا ئېلان قىلىنغان نەق مەيدان كۆرۈنۈشلىرىدە، ئىزدەش-قۇتقۇزۇش ئەترەتلىرىنىڭ ۋەقە يۈز بەرگەن جايغا كېتىۋاتقانلىقى، پارلاق رەڭلىك بىر پويىزنىڭ يان تەرەپكە ئۆرۈلۈپ چۈشكەنلىكى ۋە خارابىلىكلەردىن ئىس-تۈتەك كۆتۈرۈلۈۋاتقانلىقى كۆرۈلىدۇ.
ناخون راتچاسىما ۋىلايىتى پويىزنىڭ باڭكوكتىن ئۇبون راتچاتانى ۋىلايىتىگە قاراپ كېتىۋاتقانلىقىنى ئۇقتۇردى.
قاتناش ئىشلىرى مىنىستىرى پىفات راتچاكىتپراكارن پويىزدا 195 كىشىنىڭ بارلىقىنى ۋە دائىرىلەرنىڭ ھاياتىدىن ئايرىلغانلارنىڭ كىملىكىنى ئېنىقلاپ چىقىش ئۈچۈن ناھايىتى زور تىرىشچانلىق كۆرسىتىۋاتقانلىقىنى ئېيتتى.
ھادىسىگە سەۋەب بولغان كىران بېيجىڭ تەرىپىدىن قوللىنىۋاتقان ۋە تايلاندتا يۇقىرى سۈرئەتلىك تۆمۈر يول تورى قۇرۇشنى نىشان قىلغان 5 مىليارد 400 مىليون دوللارلىق بىر قۇرۇلۇش تۈرىدە ئىشلىتىلىۋاتاتتى؛ بۇ تۈر خىتاينىڭ «بىر بەلۋاغ بىر يول» پىلانى دائىرىسىدە، 2028-يىلىغىچە لائوس ئارقىلىق باڭكۇكنى خىتاينىڭ كۇنمىڭ شەھىرىگە تۇتاشتۇرۇشنى نىشان قىلماقتا.
