جۇمھۇر رەئىس رەجەپ تاييىپ ئەردوغان بىلەن ئەھمەد شارا ئىككى تەرەپ مۇناسىۋىتى ۋە سۈرىيەدىكى ئەڭ يېڭى ئۆزگىرىشلەرنى مۇزاكىرە قىلدى.
جۇمھۇر رەئىس ئەردوغان سۈرىيە پىرېزىدېنتى ئەھمەد شارا بىلەن ئۆتكۈزگەن تېلېفون سۆھبىتىدە، سۈرىيە زېمىنلىرىنىڭ تېررورىزمدىن پۈتۈنلەي تازىلىنىشىنىڭ ھەم سۈرىيە ھەم پۈتكۈل رايون ئۈچۈن بىر مەجبۇرىيەت ئىكەنلىكىنى ئوتتۇرىغا قويدى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ باشلىقى بۇرھانەتتىن دۇراننىڭ ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىغا ئاساسلانغاندا، ئەردوغان: «تۈركىيەنىڭ بولۇپمۇ تېررورىزمغا قارشى كۈرەش قاتارلىق نۇرغۇن ساھەلەردە سۈرىيەنى داۋاملىق قوللىماقتا» دېگەن.
ئىككى تەرەپ مۇناسىۋىتى ۋە سۈرىيەدىكى ئەڭ يېڭى ئۆزگىرىشلەر مۇزاكىرە قىلىنغان سۆھبەتتە، ئەردوغان تۈركىيەنىڭ سۈرىيەنىڭ زېمىن پۈتۈنلۈكى، بىرلىكى، ھەمكارلىقى، مۇقىملىقى ۋە بىخەتەرلىكىگە ناھايىتى زور ئەھمىيەت بېرىدىغانلىقىنى تەكىتلىگەن.
