ترامپ: يادرو سۆھبىتىدىكى مۇۋەپپەقىيەتنىڭ ئاچقۇچى «قورقۇنچ» بولۇشى مۇمكىن

ئامېرىكا پىرېزىدېنتى دونالد ترامپ ۋاشىنگتون بىلەن تېھران ئوتتۇرىسىدىكى ۋاسىتىلىك سۆھبەتلەر داۋاملىشىۋاتقان بىر پەيتتە، ئىراننىڭ يادرو سۆھبىتىدە «جاھىللىق» قىلىۋاتقانلىقىنى تىلغا ئالدى ۋە جىددىي ۋەزىيەتنى تىنچ يول بىلەن ھەل قىلىش ئۈچۈن «قورقۇنچ» پەيدا قىلىشنىڭ زۆرۈر بولۇشى مۇمكىنلىكىنى ئېيتتى.

ئۇ جۈمە (2026-يىلى 13-فېۋرال) كۈنى شىمالىي كارولىنا ئىشتاتىدىكى فورت براگ (Fort Bragg) ھەربىي بازىسىدا: «ئۇلار بىلەن كېلىشىم ھاسىل قىلىش قىيىن بولۇۋاتىدۇ» دېدى.

ئۇ مۇنداق دەپ قوشۇمچە قىلدى: «بەزىدە سىز چوقۇم قورقۇنچ پەيدا قىلىشىڭىز كېرەك. ۋەزىيەتنى ھەقىقىي بىر تەرەپ قىلالايدىغان بىردىنبىر نەرسە مانا شۇ.»

ئۇنىڭ بۇ سۆزلىرى ئامېرىكا ئەمەلدارلىرىنىڭ ئوتتۇرا شەرققە ئىككىنچى ئاۋىياماتكانىڭ ئورۇنلاشتۇرۇلغانلىقىنى دەلىللىگەندىن كېيىن ئېلان قىلىندى. ترامپ بۇ قەدەمنىڭ ئەگەر سۆھبەت مەغلۇب بولسا، ئامېرىكانىڭ تەييار تۇرۇشىغا كاپالەتلىك قىلىشنى مەقسەت قىلىدىغانلىقىنى ئېيتتى.

ئۇ يەنە ئىراندا ھاكىمىيەتنىڭ ئالمىشىشىنىڭ «يۈز بېرىدىغان ئەڭ ياخشى ئىش» بولىدىغانلىقىنى تىلغا ئالدى.

بىر مۇخبىر ئۇنىڭدىن ئىراندا «ھاكىمىيەت ئالمىشىشى» نى ئارزۇ قىلىدىغان-قىلمايدىغانلىقىنى سورىغاندا، ترامپ: «بۇ يۈز بېرىدىغان ئەڭ ياخشى ئىشتەك قىلىدۇ. 47 يىلدىن بۇيان ئۇلار توختىماي سۆزلەپ كەلدى. ئۇلار سۆزلىشىۋاتقان شۇ جەرياندا بىز نۇرغۇن كىشىلىرىمىزدىن ئايرىلدۇق» دەپ جاۋاب بەردى.

بېسىم ئاستىدىكى دىپلوماتىيە

ئۇنىڭدىن ئىلگىرى، ئۇ ئىران بىلەن بولغان سۆھبەتنىڭ داۋاملىشىۋاتقانلىقىنى، ئەمما نەتىجىسىنىڭ ئېنىق ئەمەسلىكىنى ئېيتقان ئىدى.

ئۆتكەن ھەپتە ئومان ئىككى تەرەپ ئوتتۇرىسىدىكى سۆھبەتكە ۋاسىتىچىلىق قىلدى. ئىران تاشقى ئىشلار مىنىستىرلىقىنىڭ باياناتچىسى بۇ ئۇچرىشىشنىڭ تېھراننىڭ ۋاشىنگتوننىڭ سەمىمىيىتىنى مۆلچەرلىشىگە پۇرسەت ياراتقانلىقىنى ۋە دىپلوماتىيەنى داۋاملاشتۇرۇش ئۈچۈن يېتەرلىك ئورتاق مەنپەئەت بارلىقىنى كۆرسەتكەنلىكىنى ئېيتتى.

كېيىنكى نۆۋەتلىك سۆھبەتنىڭ ۋاقتى تېخى ئېلان قىلىنمىدى.

ترامپ سۆزىدە يەنە ئۆتكەن يىلى ئىيۇن ئېيىدا ئامېرىكىنىڭ ئىران يادرو ئەسلىھەلىرىنى بومباردىمان قىلغانلىقىنى تىلغا ئېلىپ، بۇنى تېخىمۇ كەڭ كۆلەملىك چەكلەش ئىستراتېگىيەسىنىڭ بىر قىسمى دەپ سۈپەتلىدى.

ئۇ فورت براگ ھەربىي بازىسىنى زىيارەت قىلىش جەريانىدا، 3-يانۋار (2026) دىكى ۋېنېزۇئېلا پىرېزىدېنتى نىكولاس مادۇرونى تۇتقۇن قىلىش ھەرىكىتىگە قاتناشقان ئالاھىدە قىسىملارنىڭ ئەسكەرلىرى بىلەن كۆرۈشتى. ترامپ ئەسكەرلەرنى ماختىدى ۋە ئۇلارنىڭ ھەرىكىتىنى ئامېرىكانىڭ چەت ئەلدىكى كۈچ-قۇدرىتى بىلەن باغلىدى.

ئۇ ئىچكى سىياسەت ئۈستىدىمۇ توختالدى.

ئۇ دېموكراتچى رەقىبلىرىنى تەنقىد قىلدى ۋە ئەگەر ئۇلار نويابىردىكى سايلامدا كونگرەنىڭ كونتروللۇقىنى قولغا كەلتۈرۈۋالسا، ئارمىيەنى ئاجىزلاشتۇرۇۋېتىدىغانلىقىنى ئاگاھلاندۇردى.

ترامپنىڭ يادرو سۆھبىتى توغرىسىدا قىلغان سۆزلىرى، ئامېرىكا ھۆكۈمىتىنىڭ دىپلوماتىيە بىلەن بېسىمنى تەڭپۇڭلاشتۇرۇشقا ئۇرۇنۇۋاتقانلىقىنى، تېھران بىلەن سۆھبەتنى داۋاملاشتۇرۇش بىلەن بىر ۋاقىتتا، ھەربىي تاللاشلارنىڭ ھېلىھەم كۈنتەرتىپتە ئىكەنلىكىدىن بېشارەت بېرىۋاتقانلىقىنى ئەكىس ئەتتۈرىدۇ.