پەلەستىننىڭ ۋاپا (WAFA) ئاگېنتلىقىنىڭ خەۋىرىگە قارىغاندا، ئىزدەش-قۇتقۇزۇش ئەترەتلىرى شەھەرنىڭ جەنۇبىدىكى سابرا مەھەللىسىدە ئىسرائىلىيەنىڭ ھۇجۇمىدا ۋەيران بولغان بىر بىنادىن خارابىلىكلەرنى تازىلاش خىزمىتىنى ئېلىپ بارغان.
2023-يىلى ئۆكتەبىر ۋە 2025-يىلى 7-ئىيۇندا ئىسرائىلىيە ئۇرۇش ئايروپىلانلىرى بومباردىمان قىلغان بىنادا ئونلىغان كىشى ھاياتىدىن ئايرىلغان بولۇپ، قازا قىلغانلارنىڭ كۆپىنچىسى خارابىلىكلەر ئاستىدا قالغان ئىدى. ئېلىپ بېرىلغان خىزمەتلەر نەتىجىسىدە، 99 كىشىنىڭ جەسىتى تېپىلدى.
تېخنىكىلىق ئىمكانىيەتسىزلىك ۋە ھەرىكەتلەردىكى قىيىنچىلىقلارنى تىلغا ئالغان ئىزدەش-قۇتقۇزۇش ئەترەتلىرى، غەززە رايونىدا ئىسرائىلىيەنىڭ ھۇجۇملىرىدا ۋەيران بولغان بىنالارنىڭ خارابىلىكلىرى ئاستىدا يەنىلا مىڭلىغان كىشىنىڭ جەسىتىنىڭ بارلىقىنى بىلدۈردى.
غەززەدىكى خارابىلىك مەسىلىسى
ئىسرائىلىيەنىڭ ھۇجۇملىرى نەتىجىسىدە غەززەدە 50 مىليوندىن 68 مىليون توننىغىچە خارابىلىك شەكىللەنگەن بولۇپ، تەخمىنەن 8 مىڭ 500 جەسەت يەنىلا بۇ خارابىلىكلەرنىڭ ئاستىدىن چىقىرىلىشنى كۈتمەكتە.
2025-يىلى ئۆكتەبىردە ھاسىل قىلىنغان ئۇرۇش توختىتىش كېلىشىمىنىڭ بىرىنچى باسقۇچىدا ئېغىر تىپتىكى ماشىنىلارنىڭ رايونغا كىرىشى بەلگىلەنگەن بولسىمۇ، ئەمما ئىسرائىلىيە چېگرا ئېغىزلىرىنى تاقاق تۇتۇپ، شەھەرگە ياردەم بېرىلىشىگە يول قويمايۋاتىدۇ.
نۆۋەتتىكى شارائىتتا رايوندىكى بىردىنبىر ئېغىر تىپتىكى ماشىنا بىلەن ئىزدەش خىزمەتلىرىنى ئېلىپ بېرىۋاتقان ئاممىۋى مۇداپىئە ئەترەتلىرى، ئەگەر خەلقئارا جەمئىيەت زۆرۈر ئۈسكۈنە ياردىمى بىلەن تەمىنلىسە، يىللارچە داۋاملىشىدىغان بۇ مۇساپىنىڭ تەخمىنەن 3 ئاي ئىچىدە تاماملىنىشى مۇمكىنلىكىنى تەكىتلىمەكتە.
