ئامېرىكا قوشما ئىشتاتلىرى تاشقى ئىشلار مىنىستىرى ماركو رۇبىيو شەنبە كۈنى پىرېزىدېنت دونالد ترامپنىڭ ئىرانغا مۇناسىۋەتلىك مەسىلىلەرنى سۆھبەت يولى بىلەن ھەل قىلىشنى ئەۋزەل كۆرىدىغانلىقىنى ئېيتتى. ئۇ «Bloomberg» خەۋەرلەر قانىلىنىڭ زىيارىتىنى قوبۇل قىلغاندا: «پىرېزىدېنت تاللىشىنىڭ ئىران بىلەن بىر كېلىشىم ھاسىل قىلىش ئىكەنلىكىنى بىلدۈردى. بۇنى ئەمەلگە ئاشۇرۇش ئىنتايىن قىيىن، ئەمما ئۇ سىناپ كۆرىدۇ. بىزمۇ ھازىر دەل شۇنى ئىشقا ئاشۇرۇشقا تىرىشىۋاتىمىز» دېدى.

ئۇلۇس (مىللەت) دۆلەتلەرنىڭ ئۆزئارا ئالاقىدە بولۇشى كېرەكلىكىنى تەكىتلىگەن رۇبىيو: «ھەممەيلەن بىلەن كۆرۈشۈشكە ئىستىكى بار بىر پىرېزىدېنتنىڭ قول ئاستىدا خىزمەت قىلىۋاتىمەن. شۇنىڭغا كۈچلۈك ئىشىنىمەنكى، ئەگەر ئايەتۇللاھ ئەلى خامەنېي ئەتە پىرېزىدېنت ترامپ بىلەن كۆرۈشۈشنى خالايدىغانلىقىنى ئېيتسا، پىرېزىدېنت ئۇنىڭ بىلەن كۆرۈشىدۇ؛ بۇنىڭ سەۋەبى ئايەتۇللاھ بىلەن ئوخشاش پىكىردە بولغانلىقى ئەمەس، بەلكى بۇنى دۇنيادىكى مەسىلىلەرنى ھەل قىلىشنىڭ يولى دەپ قارىغانلىقىدۇر» دېگەنلەرنى قەيت قىلدى.

رۇبىيو ئوتتۇرا شەرققە ئىككىنچى بىر ئامېرىكا ئاۋىياماتكىسىنىڭ ئورۇنلاشتۇرۇلۇشى ھەققىدىكى سوئالغا قارىتا، ئىراننىڭ يادرو قورالىغا ئىگە بولۇشىغا «ھەرگىز يول قويۇلمايدىغانلىقى»نى ئېيتىپ، بۇ ئەھۋالنى ئامېرىكا قوشما ئىشتاتلىرى، ياۋروپا، رايون ۋە دۇنياۋى بىخەتەرلىك ئۈچۈن جىددىي تەھدىت دەپ سۈپەتلىدى.

ئۇ يەنە: «رايوندا كۈچلىرىمىزنىڭ بولۇشىنى ئەلۋەتتە خالايمىز، چۈنكى ئىران ئامېرىكانىڭ رايوندىكى مەۋجۇتلۇقىغا قارىتا ئۆچ ئېلىش ئىستىكى ۋە ئىقتىدارىنى نامايان قىلدى» دېدىى ۋە ۋاشىنگتوننىڭ رايوندىكى ئىتتىپاقداشلىرى سايىسىدا ھەربىي بازىلىرىنىڭ مەۋجۇت ئىكەنلىكىنى تەكىتلىدى. ئۇ «ئىران ئۆتمۈشتە بىزگە ياكى بازىلىرىمىزغا ھۇجۇم قىلىش ۋە تەھدىت سېلىشقا مايىل ئىكەنلىكىنى كۆرسەتتى» دېگەن سۆزلەرنى ئىشلىتىش ئارقىلىق، ئامېرىكانىڭ «ئىراننىڭ خاتالىق ئۆتكۈزۈپ ئۈستىمىزگە كېلىشىنىڭ ۋە تېخىمۇ چوڭ بىر سۈركىلىشنى كەلتۈرۈپ چىقىرىشىنىڭ ئالدىنى ئېلىش ئۈچۈن، رايوندا يېتەرلىك ئوت كۈچىگە» ئىگە بولۇشى كېرەكلىكىنى بىلدۈردى.