تۈركىيە ئاۋىياتسىيە ۋە ئالەم بوشلۇقى سانائىتى شىركىتى (TUSAŞ) باش مۇدىرى مەھمەت دەمىرئوغلۇ: «فىرانسىيە، گېرمانىيە، ئىسپانىيە ياكى ئەنگلىيە تېخى ئەمەلىيەتتە تۈرلىرىنى باشلىيالىغىنى يوق. بىز بولساق ئۇلاردىن خېلىلا ئالدىدا تۇرىمىز» دېدى.
تۇساش باش مۇدىرى مەھمەت دەمىرئوغلۇ تۈركىيەنىڭ بېرلىندا تۇرۇشلۇق ئەلچىخانىسىدا ئۆتكۈزۈلگەن «يۈكسىلىۋاتقان تۈركىيەنىڭ ئاۋىياتسىيە ۋە مۇداپىئە تېخنىكىسى» تېمىسىدىكى يىغىندا، تۈركىيە مۇداپىئە سانائىتىنىڭ يەر شارى خاراكتېرلىك مۇۋەپپەقىيەتلىرى ۋە كەلگۈسى تەسەۋۋۇرى ھەققىدە توختالدى.
دەمىرئوغلۇ 1973-يىلى كىچىك بىر كەپىدە باشلانغان تۇساش مۇساپىسنىڭ، 2005-يىلى چەت ئەللىك پايچىكلارنىڭ پاي ھوقۇقىنىڭ تولۇق سېتىۋېلىنىشى بىلەن يۈز پىرسەنت يەرلىك ۋە مىللىي گەۋدىگە ئايلانغانلىقىنى تىلغا ئالدى. ئۇ ئۆتكەن 20 يىلدا ئادەملىك ئايروپىلانلار، ئۇچقۇچىسىز ھاۋا ئاپپاراتلىرى، تىك ئۇچار ئايروپىلانلار ۋە ئالەم بوشلۇقى تۈرلىرىنى ئۆز ئىچىگە ئالغان 13 ئۆزگىچە سۇپىنى تەرەققىي قىلدۇرغانلىقىنى تەكىتلىدى.
دەمىرئوغلۇ سۆزىنى داۋاملاشتۇرۇپ: «بۈگۈنكى كۈندە ئەنقەرە قاھرامانقازاندىكى 4 مىليون كىۋادرات مېتىرلىق غايەت زور مەكتەپ رايونىدا، 16 مىڭ 300 كىشىلىك ھەرىكەتچان قوشۇن بىلەن خىزمەت قىلىۋاتىمىز. ئوتتۇرىچە يېشىمىز 34 ياش. دۇنيانىڭ نۇرغۇن جايلىرىدا ئىشخانىلىرىمىز بار، يېقىن كەلگۈسىدە نىگېرىيە قاتارلىق ئافرىقا ئەللىرىدە تېخىمۇ كېڭىيىمىز» دېدى.
تۇساش يەر شارى ئاۋىياتسىيە ساھەسىدىكى ئالدىنقى قاتاردا تۇرىدىغان تەمىنلىگۈچىلەرنىڭ بىرى
تۇساشنىڭ يەر شارى پۇقرالار ئاۋىياتسىيە بازىرىدىكى ئىستراتېگىيەلىك رولىغا دىققەتنى تارتقان دەمىرئوغلۇ، شىركەتنىڭ پۇقرالار ئاۋىياتسىيەسىنىڭ قۇرۇلمىلىق زاپچاسلىرى ساھەسىدە دۇنيادىكى Airbus (ئېيرباس) ۋە Boeing (بوئېڭ) ئۈچۈن زاپچاس ئىشلەپچىقىرىدىغان ئەڭ چوڭ تەمىنلىگۈچىلەرنىڭ بىرى ئىكەنلىكىنى تەكىتلىدى. ئۇ بەزى ھالقىلىق زاپچاسلار بويىچە دۇنيادىكى بىردىنبىر ئىشلەپچىقارغۇچى ئىكەنلىكلىرىنى بايان قىلىپ: «ئېيرباسنىڭ ھاۋادا ئۇچۇۋاتقان ئاساسەن بارلىق ئايروپىلانلىرىدا تۇساشنىڭ سايمانلىرى بار» دېگەنلەرنى سۆزلىرىگە ئىلاۋە قىلدى.
تۈركىيە ياۋروپادىن خېلىلا ئالدىدا
ئالتىنچى ئەۋلاد ھەربىي ئايروپىلانلار مەسىلىسىدە دۇنيادا گېپى ئۆتىدىغان ئورگانلارنىڭ بىرى بولۇشنى نىشان قىلغانلىقىنى بىلدۈرگەن دەمىرئوغلۇ مۇنداق دېدى:
«ياۋروپادا Tempest ياكى FCAS غا ئوخشاش تۈرلەر تىلغا ئېلىنىۋاتقان بولسىمۇ، لېكىن رىقابەتچىلىرىمىز تېخى ئەمەلىيەتتە تۈرلىرىنى باشلىيالمىدى. مىللىي جەڭگىۋار ئايروپىلانىمىز كائان (KAAN) نىڭ 2024-يىلى 21-فېۋرالدىكى تۇنجى ئۇچۇشى پۈتۈن مەملىكەتنىڭ تەرەققىيات مۇساپىسىنى ئۆزگەرتتى. تۈركىيە بۇ تېخنىكىنى ئەمەلگە ئاشۇرالىغان دۇنيادىكى 4 دۆلەتنىڭ بىرىگە ئايلاندى. تۈركىيە ھاۋا ئارمىيەسىنىڭ F-16 ئايروپىلانلىرىدىن تەشكىل تاپقان ھۇجۇم يادروسىنى يەرلىك ۋە مىللىي سىستېمىلار بىلەن زامانىۋىلاشتۇرۇش ئۈچۈن، تۈزۈلگەن پىلانىمىزنى ئەستايىدىللىق بىلەن ئىجرا قىلىۋاتىمىز».
تەتۈر يۆنىلىشلىك ئەقىل ئېقىمى
ئالەم بوشلۇقى ساھەسىدىكى تەسەۋۋۇرىنىمۇ ئورتاقلاشقان دەمىرئوغلۇ، سومالىدا قۇرۇلغان ئالەم بوشلۇقى مەركىزىنىڭ ئىنتايىن ئىستراتېگىيەلىك بىر قەدەم ئىكەنلىكىنى ئېيتتى. ئۇ ئالەم بوشلۇقى رىقابىتى كەسكىنلەشكەندە دۇنيا مىقياسىدا سۈنئىي ھەمراھ قويۇپ بېرىش قىيىنچىلىقى كۆرۈلىدىغانلىقىنى، بۇ سېلىنمىنىڭ تۈركىيەنىڭ قويۇپ بېرىش مۇستەقىللىقىنى كاپالەتكە ئىگە قىلىدىغانلىقىنى بايان قىلدى.
دەمىرئوغلۇ 2020-يىللارنىڭ بېشىدا كۆرۈلگەن يۇقىرى ساپالىق ئەمگەك كۈچىنىڭ سىرتقا ئېقىپ كېتىش ئەھۋالىنىڭ ھازىر تەتۈر يۆنىلىشكە بۇرالغانلىقىنى تەكىتلەپ: «ھازىر چەت ئەلگە كەتكەن خىزمەتچىلىرىمىزدىن تېخىمۇ كۆپى دۆلىتىمىزگە ۋە تۇساشقا قايتىپ كەلمەكتە. بۇ شىركەت 86 مىليون پۇقرايىمىزنىڭ ئورتاق مۈلكىدۇر» دېدى.
تۇساش باش مۇدىرى چەت ئەلدىكى ياش ئىنژېنېرلارنى تۈركىيەگە قايتىپ كېلىشكە ۋە YTB (چەت ئەلدىكى تۈركلەر ۋە قېرىنداش خەلقلەر ئىدارىسى) بىلەن بىرلىكتە ئېلىپ بېرىلىۋاتقان پىراكتىكا پىروگراممىلىرىغا قاتنىشىشقا تەكلىپ قىلدى.
