ئامېرىكا پېرىزىدېنتى دونالد ترامپ خىتاي زىيارىتىگە قاتنىشىدىغان ئامېرىكالىق يۇقىرى دەرىجىلىك رەھبەرلەرنىڭ سودا، سۈنئىي ئىدراك، تەيۋەن ۋە ئىران ئۇرۇشى مەسىلىلىرىدە خەۋپى يۇقىرى سۆھبەتلەرگە تەييارلىق قىلىۋاتقان بىر پەيتتە، يېڭى سودا كېلىشىملىرىنىڭ كويىدا ئىكەنلىكىىنى بىلدۈردى.
ئامېرىكا پېرىزىدېنتى دونالد ترامپ بۇ ھەپتە بېيجىڭدا خىتاي دۆلەت رەئىسى شى جىنپىڭ بىلەن ئىنتايىن مۇھىم سۆھبەت ئۆتكۈزىدىغانلىقىنى ۋە خىتاينى ئامېرىكا سودا دۇنياسىغا «ئېچىۋېتىشنى» تەلەپ قىلىدىغانلىقىنى ئىپادىلىدى.
ترامپ سەيشەنبە كۈنى ئىجتىمائىي تاراتقۇدا ھەمبەھىرلىگەن ئۇچۇرىدا، ئۆزىگە ھەمراھ بولغان ئامېرىكا سودا دۇنياسىنىڭ باش ئىجراچى رەھبەرلىرىنى ئىشارەت قىلىپ: «ئاجايىپ بىر رەھبەر بولغان خىتاي دۆلەت رەئىسى شىدىن خىتاينى 'ئېچىۋېتىشنى' سورايمەن، شۇنداق بولغاندا بۇ پاراسەتلىك ئىنسانلار ئۆز سېھرىي كۈچىنى كۆرسىتەلىسۇن ۋە خىتاي خەلق جۇمھۇرىيىتىنى تېخىمۇ يۇقىرى سەۋىيەگە كۆتۈرۈشكە ياردەم بېرەلىسۇن!» دېگەن سۆزلەرنى ئىشلەتتى.
ترامپ خىتاي زىيارىتىگە تېسلا (Tesla) نىڭ باش ئىجراچىسى ئېلون ماسك، ئالما (Apple) نىڭ باش ئىجراچىسى تىم كۇك، بىلاكروك (BlackRock) نىڭ باش ئىجراچىسى لاررى فىنك ۋە بوئىن (Boeing) نىڭ باش ئىجراچىسى كېللىي ئورتبرېگنى ئۆز ئىچىگە ئالغان ئامېرىكانىڭ ئەڭ چوڭ شىركەتلىرىنىڭ بەزى رەھبەرلىرىنى تەكلىپ قىلدى.
بۇ رەھبەرلەرنىڭ بېيجىڭ بىلەن سودا كېلىشىملىرى ۋە سېتىۋېلىش توختاملىرىنى قولغا كەلتۈرۈشكە قارىتىلغان يىغىنلارغا قاتنىشىشى كۈتۈلمەكتە.
باشلىقلار ئۇچرىشىشىنىڭ كۈنتەرتىپى سودا، سۈنئىي ئىدراك، ئېكسپورت چەكلىمىسى، تەيۋەن ۋە ئىران ئۇرۇشى مەسىلىلىرىنى ئۆز ئىچىگە ئالىدۇ. ئىككى تەرەپ سۈنئىي ئىدراك تېخنىكىسى، ئېمبارگولار ۋە نادىر تۇپراق ئېلېمېنتلىرى ئېكسپورتىغا مۇناسىۋەتلىك ھەپتىلەردىن بۇيان كۈچىيىۋاتقان جىددىيچىلىكتىن كېيىن سۆھبەت ئۆتكۈزۈش ئالدىا تۇرماقتا.
