ئىران تاشقى ئىشلار مىنىستىرى ئابباس ئاراقچى ئىسرائىلىيەنىڭ پايتەخت تېھراندىكى يېقىلغۇ ئامبارلىرىنى بومباردىمان قىلىشىنىڭ خەلقئارا قانۇنغا خىلاپ ئىكەنلىكىنى ۋە ئېكولوگىيەلىك ۋەيرانچىلىق ھېسابلىنىدىغانلىقىنى بىلدۈردى.
ئۇ دۈشەنبە كۈنى X سۇپىسىدا بايانات ئېلان قىلىپ، «رايون ئاھالىلىرىنىڭ ساغلاملىقى ۋە پاراۋانلىقى ئۇزۇن مۇددەتلىك زىيانغا ئۇچرايدۇ. تۇپراق ۋە يەر ئاستى سۇلىرىنىڭ بۇلغىنىشى ئەۋلادتىن-ئەۋلادقا داۋاملىشىدىغان تەسىرلەرنى پەيدا قىلىشى مۇمكىن» دېگەنلەرنى قەيت قىلدى.
ئۇ يەنە ئىسرائىلىيەنىڭ ئۇرۇش جىنايەتلىرى سەۋەبىدىن جازالىنىشىنى تەلەپ قىلدى.
ئىسرائىلىيە بىلەن ئامېرىكا قوشما ئىشتاتلىرى 28-فېۋرال كۈنى ئىرانغا قارشى ئورتاق ئۇرۇش قوزغىغاندىن بۇيان، ئارىسىدا ئالىي رەھبەر ئەلى خامەنېينى ئۆز ئىچىگە ئالغان تەخمىنەن 1300 كىشىنىڭ ئۆلۈمىنى كەلتۈرۈپ چىقارغان توقۇنۇشلار بارغانسېرى كۈچەيدى.
ئىران مەزكۇر ھۇجۇملارغا ئىسرائىلىيە، ئىيوردانىيە، ئىراق ۋە ئامېرىكا ھەربىي كۈچلىرى تۇرۇۋاتقان پارس قولتۇقى دۆلەتلىرىگە ئۇچقۇچىسىز ھاۋا ئاپپاراتى ۋە باشقۇرۇلىدىغان بومبىلارنى ئىشلىتىپ ئىنكاس قايتۇردى.
