تۈركىيە سۇداندا داۋاملىشىۋاتقان توقۇنۇشلارنىڭ زىيىنىغا ئۇچرىغانلارنى قۇتقۇزۇش خىزمىتىنى داۋاملاشتۇرۇپ، مەرسىن پورتىدىن 2600 توننا ئىنسانپەرۋەرلىك ياردىمى قاچىلانغان ئالتىنچى «ياخشىلىق پاراخوتى» نى يولغا سالدى.
ئىنسانپەرۋەرلىك ياردەملىرى تەبىئىي ئاپەت ۋە جىددىي ئەھۋاللارغا تاقابىل تۇرۇش ئىدارىسى (AFAD) نىڭ ماسلاشتۇرۇشىدا، ھەر قايسى ئىدارە-ئورگانلار، ئاممىۋى تەشكىلاتلار ۋە قاتار تەرەققىيات فوندى جەمئىيىتىنىڭ ھەمكارلىشىشى ئااستىدا تەييارلاندى.
تەبىئىي ئاپەت ۋە جىددىي ئەھۋاللارغا تاقابىل تۇرۇش ئىدارىسىنىڭ باشلىقى ئەلى ھەمزە پەھلىۋان تۈركىيەنىڭ سۇداندىكى ئىنسانپەرۋەرلىك كىرىزىسىگە سۈكۈت قىلىپ تۇرمىغانلىقىنى بىلدۈردى.
ئۇنىڭ قەيت قىلىشىچە، 2024-يىلى ئىلگىرى-كېيىن بولۇپ 5500 توننا ئىنسانپەرۋەرلىك ياردىمى سۇدانغا يەتكۈزۈلگەن. بۇنىڭدىن باشقا ئۆتكەن ئاي (2025-يىلى دېكابىر) دىلا ئۈچ پاراخوت بىلەن 30 مىڭ چېدىر ئەۋەتىلگەن.
يېڭى ئەۋەتىلگەن ئىنسانپەرۋەرلىك ياردەملىرى يېمەك-ئىچمەك مالزىمىلىرى، كۈندىلىك تازىلىق بۇيۇملىرى، تىببىي لازىمەتلىكلەر ۋە پاناھلىنىش مالزىمىلىرىنى ئۆز ئىچىگە ئالىدۇ.
مۇناسىۋەتلىك ئۇچۇرلارTRT World - Second 'Ship of Goodness' from Türkiye arrives in Sudan amid deepening humanitarian crisis
تەۋسىيە
تەبىئىي ئاپەت ۋە جىددىي ئەھۋاللارغا تاقابىل تۇرۇش ئىدارىسىنىڭ باشلىقى ئەلى ھەمزە پەھلىۋان مۇنداق دېدى: «بىز سۇداندا ئۆي-ماكانسىز قالغانلارنىڭ پاناھلىنىش ئېھتىياجىنىڭ 12-ئايدا ئىنتايىن جىددىي باسقۇچقا يەتكەنلىكىنى كۆزدە تۇتۇپ، 7-دېكابىر (2025) دىن باشلاپ ياخشىلىق پاراخوتلىرىنى ئەۋەتىشكە باشلىدۇق. ئارقا-ئارقىدىن ئۈچ پاراخوت ئەۋەتىپ، ئۇ يەردىكى قېرىنداشلىرىمىزنىڭ پاناھلىنىش ئېھتىياجىنى قامداشقا تىرىشتۇق.»
ئۇ يەنە تۈركىيەنىڭ غەززەگە ئەۋەتكەن ئىنسانپەرۋەرلىك ياردەملىرىنىڭمۇ داۋاملىشىۋاتقانلىقىنى، 20-قېتىملىق ياردەم پاراخوتىنىڭ كېلەر ھەپتە يولغا چىقىدىغانلىقىنى ۋە ھازىرغىچە جەمئىي 105 مىڭ توننىغا يېقىن ئىنسانپەرۋەرلىك ياردىمىنىڭمۇ يەتكۈزۈلگەنلىكىنى سۆزلىرىگە ئىلاۋە قىلدى.
سۇداندا 2023-يىلى ئاپرېلدىن باشلاپ ئارمىيە بىلەن يېرىم ھەربىي تەشكىلات «تېز ياردەم بېرىش قىسىملىرى» (RSF) ئوتتۇرىسىدا قانلىق توقۇنۇش داۋاملىشىۋاتقان بولۇپ، بۇ جەرياندا نەچچە مىڭ ئادەم جېنىدىن ئايرىلدى، مىليونلىغان ئادەم ئۆي-ماكانسىز قالدى.
سۇداننىڭ 18 ئىشتاتى ئىچىدە، دۆلەت ئارمىيەسىنىڭ كونتروللۇقىدىكى شىمالىي دارفۇرنىڭ ئاز بىر قىسىم رايونلىرىنى ھېسابقا ئالمىغاندا، «تېز ياردەم بېرىش قىسىملىرى» ھازىر دارفۇر رايونىدىكى بەش ئىشتاتنىڭ ھەممىسىنى كونترول قىلماقتا.
سۇدان ئارمىيەسى پايتەخت خارتۇمنى ئۆز ئىچىگە ئالغان جەنۇب، شىمال، شەرق ۋە ئوتتۇرا رايونلاردا قالغان 13 ئىشتاتنىڭ كۆپ قىسمىنى كونترول قىلىپ كەلمەكتە.
مۇناسىۋەتلىك ئۇچۇرلارTRT World - Türkiye condemns RSF's violence in Sudan, calls for urgent humanitarian access
