تاشقى ئىشلار مىنىستىرى خاقان فىدان بۈگۈن سۈرىيەنى زىيارەت قىلماقتا. مىنىستىر فىدان سۈرىيە تاشقى ئىشلار مىنىستىرى ئەسەد ھەسەن شەيبانى بىلەن كۆرۈشىدۇ. ئۇنىڭدىن باشقا ئۇنىڭ سۈرىيە پرېزىدېنتى ئەھمەد شارا تەرىپىدىنمۇ قوبۇل قىلىنىشى مۆلچەرلەنمەكتە.
تاشقى ئىشلار مىنىستىرى خاقان فىداننىڭ سۈرىيە زىيارىتىدىكى ئەڭ مۇھىم كۈنتەرتىپ ماددىلىرىدىن بىرى خەۋپسىزلىك بولىدۇ. تېررورلۇق تەشكىلاتى YPG/SDG نى تارقىتىۋېتىش قارارى ۋە بىرلىشىش جەريانىدا يۈز بەرگەن ئۆزگىرىشلەر مۇزاكىرە قىلىنىدۇ. ئېلىنغان قارارلارنىڭ ۋاقتىدا ئىجرا قىلىنىشىنىڭ مۇھىملىقى تەكىتلىنىدۇ.
مىنىستىر فىداننىڭ كۈنتەرتىپىدە سۈرىيەنىڭ جەنۇبىدىكى ۋەزىيەتمۇ بار. ئىسرائىلىيەنىڭ سۈرىيەنىڭ خەۋپسىزلىك ۋە مۇقىملىقىغا كۈندىن-كۈنگە ئېغىر تەھدىت سېلىۋاتقان تاجاۋۇزچىلىقىغا دىققەتلەرنى تارتىلىدۇ. ئىسرائىلىيە ھۇجۇملىرىغا قارشى خەلقئارا جەمئىيەت بىلەن بىرلىكتە تاشلىنىدىغان قەدەملەر مۇلاھىزە قىلىنىدۇ.
ئۇچرىشىشلاردا سۈرىيەنىڭ زېمىن پۈتۈنلۈكى، بىرلىكى ۋە ئىگىلىك ھوقۇقىنىڭ قوغدىلىشىمۇ مۇزاكىرە قىلىنىدۇ. سۈرىيە تۈركمەنلىرىنىمۇ ئۆز ئىچىگە ئالغان جەمئىيەتنىڭ بارلىق تەركىبلىرىنىڭ باراۋەر پۇقرالىق ئاساسىدا دۆلەتنىڭ كەلگۈسىگە تۆھپە قوشۇشىنىڭ مۇھىملىقى تەكىتلىنىدۇ.
يەنە بىر تېما بولسا، سودا، ئېنېرگىيە، قاتناش ۋە ئالاقە ساھەلىرىدىكى ھەمكارلىقنى كۈچەيتىش بولىدۇ. رايوندا سودا ۋە قاتناشنى راۋاجلاندۇرۇشقا ئالاقىدار يېڭى تۈرلەرمۇ مۇزاكىرە قىلىنىدۇ. تۈركىيەنىڭ سۈرىيەنىڭ ئىقتىسادىي جەھەتتىن قايتا قەد كۆتۈرۈشىنى تېزلىتىشكە ۋە رايون خاراكتېرلىك ئالاقىلىرىنى قايتىدىن ئورنىتىشىغا قىلىدىغان ياردەملەرنى داۋاملاشتۇرىدىغانلىقى تەكىتلىنىدۇ.
