تۈركىيە ئائىلە ۋە ئىجتىمائىي خىزمەتلەر مىنىستىرى ماھىنۇر ئۆزدەمىر گۆكتاش يەكشەنبە كۈنى بەرگەن باياناتىدا، تۈركىيەنىڭ ئىجتىمائىي تاراتقۇ سۇپىلىرىدا بالىلارنىڭ بىخەتەرلىكىنى كاپالەتكە ئىگە قىلىش ئۈچۈن يېڭى قانۇنىي بەلگىلىمىلەرنى تەييارلاۋاتقانلىقىنى قەيت قىلدى.
تۈركىيەنىڭ يەرلىك ئىجتىمائىي تاراتقۇ سۇپىسى «NSosyal» دا سۆز قىلغان گۆكتاش، بالىلارنىڭ رەقەملىك غىدىقلىغۇچىلارغا ئۈزلۈكسىز دۇچ كېلىشىنىڭ سەلبىي تەسىرلىرى ھەققىدە كۈچىيىۋاتقان ئەندىشىلەرنى تىلغا ئېلىپ، ھۆكۈمەتنىڭ زۆرۈر تەدبىرلەرنى يولغا قويۇش باسقۇچىغا ئىنتايىن يېقىنلاشقانلىقىنى تەكىتلىدى. مىنىستىر دۇنيادىكى نۇرغۇن دۆلەتلەرگە ئوخشاشلا، بالىلارنى قوغداشنى نىشان قىلغان ئىجتىمائىي تاراتقۇ بەلگىلىمىلىرىنى ئىجرا قىلىش باسقۇچىدا تۇرۇۋاتقانلىقلىرىنى ئەسكەرتتى.
ئىنسانلارنىڭ دىققەتنى مەركەزلەشتۈرۈش ۋاقتىنىڭ تەخمىنەن سەككىز سېكۇنتقا چۈشۈپ قالغانلىقىنى تىلغا ئالغان گۆكتاش، بۇ ئەھۋالنىڭ چوڭلارغا قارىغاندا بالىلارغا تېخىمۇ ئېغىر زىيان يەتكۈزۈۋاتقانلىقى ھەققىدە ئاگاھلاندۇردى. مىنىستىر سۆزىنى داۋاملاشتۇرۇپ، بالىلارنىڭ دىققەتنى مەركەزلەشتۈرۈش ئىقتىدارىنىڭ ئۆتكەن ئون يىلدا كەم دېگەندە %30 ئازايغانلىقىنى، بۇنىڭ ئۇلارنىڭ زېھنىنى مەركەزلەشتۈرۈش، دوستلۇق مۇناسىۋەتلىرى ۋە ئاكادېمىك نەتىجىلىرىگە پاسسىپ تەسىر كۆرسىتىۋاتقانلىقىنى بىلدۈردى.
بۇ خىل ئۆزگىرىشلەرنىڭ ئوقۇتۇش پائالىيەتلىرىنىمۇ قىيىنلاشتۇرۇۋاتقانلىقىنى تىلغا ئالغان گۆكتاش، دۇنيانىڭ ھەرقايسى جايلىرىدا بالىلار ئۈچۈن مۇشۇنىڭغا ئوخشاش ئىجتىمائىي تاراتقۇ قائىدىلىرىنىڭ مۇزاكىرە قىلىنىۋاتقانلىقىنى ياكى يولغا قويۇلغانلىقىنى ئەسكەرتتى. تۈركىيەنىڭ بالىلار ئۈچۈن تېخىمۇ بىخەتەر تور مۇھىتى يارىتىش يولىدا تىرىشچانلىق كۆرسىتىۋاتقانلىقىنى بىلدۈرگەن مىنىستىر، ئاتا-ئانىلار ۋە ئوقۇتقۇچىلارنى بۇ مۇساپىنى قوللاشقا چاقىردى. گۆكتاش ھەممە بىرلىكتە ھەرىكەت قىلغاندا، بالىلار ئۈچۈن تېخىمۇ بىخەتەر بىر رەقەملىك دۇنيا ياراتقىلى بولىدىغانلىقىنى تەكىتلىدى.
