جەنۇبىي كورېيەنىڭ Hanwha Aerospace شىركىتى نورۋېگىيە قوراللىق قىسىملىرىنى 16 دانە Chunmoo كۆپ سىلىندىرلىق راكېتا قويۇپ بېرىش سىستېمىسى بىلەن تەمىنلەيدۇ.
جەنۇبىي كورېيەنىڭ مۇداپىئە ساھەسىدىكى ئەڭ چوڭ شىركەتلىرىنىڭ بىرى بولغان Hanwha Aerospace Co. ئۆتكەن ھەپتە نورۋېگىيە بىلەن ئۇزۇن مۇساپىلىك كۆپ سىلىندىرلىق راكېتا قويۇپ بېرىش سىستېمىسى بىلەن تەمىنلەش توغرىسىدا كېلىشىم ھاسىل قىلغاندىن كېيىن، دۈشەنبە كۈنى ئېلان بايانات ئېلان قىلىپ، نوردىك رايونىنىڭ ئۇزۇن مۇددەتلىك بىخەتەرلىك ھەمراھى سۈپىتىدە رايوندىكى رولىنى كېڭەيتىشنى پىلانلىغانلىقىنى ئېلان قىلدى.
يۇنخاپ خەۋەر ئاگېنتلىقىنىڭ خەۋەر قىلىشىچە، شىركەت رەئىسى ۋە باش دىرېكتورى سون جائې-ئىل، نورۋېگىيەنىڭ Hanwha Aerospace شىركىتىنىڭ Chunmoo كۆپ سىلىندىرلىق راكېتا قويۇپ بېرىش سىستېمىسىنى (MRLS) تاللىشىنىڭ، ئىلگىرى تاپشۇرۇپ بېرىلگەن K9 زەمبىرەكلىرى ئارقىلىق شەكىللەنگەن ئىشەنچنىڭ نەتىجىسى ئىكەنلىكىنى تىلغا ئالدى.
سون: «نورۋېگىيە بىلەن يېقىن ھەمكارلىق ئورنىتىش ئارقىلىق نوردىك رايونىنىڭ ئۇزۇن مۇددەتلىك بىخەتەرلىكىگە تۆھپە قوشۇشقا ۋە ئىستراتېگىيەلىك بىخەتەرلىك ھەمراھى سۈپىتىدىكى رولىمىزنى تېخىمۇ تەرەققىي قىلدۇرۇشقا بەل باغلىدۇق» دېگەنلەرنى سۆزلىرىگە ئىلاۋە قىلدى. نورۋېگىيە مۇداپىئە ئەشيالىرى ئىدارىسى (NDMA) بىلەن ئىمزالانغان توختام دائىرىسىدە، Hanwha Aerospace شىركىتى نورۋېگىيە قوراللىق قىسىملىرىنى 16 دانە Chunmoo كۆپ سىلىندىرلىق راكېتا قويۇپ بېرىش سىستېمىسى، ئېنىق نىشانلىق باشقۇرۇلىدىغان بومبا يۈرۈشلۈكى ۋە بىر گەۋدىلەشكەن ئەشيا ئوبوروتى ياردىمى بىلەن تەمىنلەيدۇ.
قىممىتى تەخمىنەن 2 مىليارد دوللار كېلىدىغان بۇ كېلىشىم، نورۋېگىيە ئارمىيەسىنىڭ 2017-يىلىدىن بۇيان 52 دانە K9 Vidar زەمبىرىكى ۋە 14 دانە K10 ئوق-دورا تولۇقلاش ماشىنىسى سىتېۋېلىشى بىلەن باشلانغان Hanwha Aerospace بىلەن نورۋېگىيە ئارمىيەسى ئوتتۇرىسىدىكى ئون يىلغا يېقىنلاشقان ھەمكارلىقنىڭ داۋامىدۇر.
شىركەت يەنە، بىرلىكتە تەتقىق قىلىپ ئېچىش ۋە يەرلىك سىناقلارنى ئېلىپ بېرىش ئارقىلىق نورۋېگىيە سانائىتى بىلەن بولغان ھەمكارلىقىنى كۈچەيتىشنى پىلانلىماقتا.
