ئامېرىكا قوشما ئىشتاتلىرى ئەلچىسى ستېۋ ۋىتكوف پىرېزىدېنت ترامپنىڭ رەھبەرلىكىدە ئېلىپ بېرىلغان ئۇكرائىنا-رۇسىيە سۆھبەتلىرىدە «ئەھمىيەتلىك ئىلگىرىلەش» ھاسىل قىلىنغانلىقىنى بىلدۈردى.
ئامېرىكا قوشما ئىشتاتلىرى ئەلچىسى ستېۋ ۋىتكوف ۋاشىنگتون يېتەكچىلىكىدىكى ئۇكرائىنا بىلەن رۇسىيە ئوتتۇرىسىدىكى ئۇرۇشنى ئاخىرلاشتۇرۇش سۆھبەتلىرىنىڭ مۇھىم بىر باسقۇچقا كەلگەنلىكىنى ۋە تەرەپلەرنىڭ جەنۋەدە سۆھبەتنىڭ ئىككىنچى كۈنىگە كىرىدىغانلىقىنى ئۇقتۇردى.
چارشەنبە كۈنى X (تۋىتتېر) سۇپىسىدا يازما ھەمبەھرىلىگەن ۋىتكوف: «پىرېزىدېنت ترامپنىڭ بۇ ئۇرۇشقا چېتىشلىق ھەر ئىككى تەرەپنى ئۇچراشتۇرۇشتىكى مۇۋەپپەقىيىتى ئەھمىيەتلىك ئىلگىرىلەش ھاسىل قىلىنىشىغا سەۋەب بولدى. بۇ قورقۇنچلۇق توقۇنۇشتىكى ئۆلۈم-يېتىملەرگە خاتىمە بېرىش ئۈچۈن، ئۇنىڭ رەھبەرلىكى ئاستىدا خىزمەت قىلىۋاتقانلىقىمىزدىن پەخىرلىنىمىز. ھەر ئىككى تەرەپ ئۆز رەھبەرلىرىگە مەلۇمات بېرىشنى ۋە بىر كېلىشىم تۈزۈش ئۈچۈن خىزمەت ئىشلەشنى داۋاملاشتۇرۇشنى قوبۇل قىلدى» دېگەنلەرنى قەيت قىلدى.
ئۇكرائىنالىق ۋە رۇسىيەلىك مۇزاكىرىچىلەرنىڭ ئامېرىكا قوشما ئىشتاتلىرىنىڭ ۋاسىتىچىلىكىدە جەنۋەدە ئۆتكۈزۈلىدىغان ئىككىنچى باسقۇچلۇق تىنچلىق سۆھبىتىنى چارشەنبە كۈنى داۋاملاشتۇرۇشى كۈتۈلمەكتە. شۇنداقتىمۇ، ھەر ئىككى تەرەپ ئىككىنچى دۇنيا ئۇرۇشىدىن بۇيانقى ياۋروپادىكى ئەڭ قانلىق توقۇنۇشنى ئاخىرلاشتۇرۇشقا يېقىنلاشقانلىقىغا دائىر تېخىچە ئېنىق بىر ئىشارەت بەرمىدى. بۇ سۆھبەتلەر، يۈز مىڭلىغان كىشىنىڭ ھاياتىدىن ئايرىلىشىغا، مىليونلىغان كىشىنىڭ يۇرت-ماكانىدىن ئايرىلىشىغا ۋە ئۇكرائىنانىڭ شەرقىي ھەم جەنۇبىي قىسىملىرىنىڭ زور كۆلەمدە ۋەيران قىلىنىشىغا سەۋەب بولغان توقۇنۇشنى توختىتىشقا قارىتىلغان ئەڭ يېڭى دىپلوماتىك تىرىشچانلىق ھېسابلىنىدۇ.
ئامېرىكا قوشما ئىشتاتلىرى تەخمىنەن تۆت يىلدىن بېرى داۋاملىشىۋاتقان بۇ ئۇرۇشنى ئاخىرلاشتۇرۇش ئۈچۈن بېسىمنى كۈچەيتىۋاتقان بولسىمۇ، موسكۋا بىلەن كىيېۋ ئارىسىدىكى زېمىن مەسىلىسىگە مۇناسىۋەتلىك ھالقىلىق نۇقتىلاردا تېخىچە ئورتاق تونۇش ھاسىل قىلىنغىنى يوق. تەرەپلەر ئارىسىدا بۇنىڭدىن ئىلگىرى ئەرەب بىرلەشمە خەلىپىلىكىنىڭ پايتەختى ئەبۇ دەبىيدە ئۆتكۈزۈلگەن ئىككى قېتىملىق سۆھبەتمۇ نەتىجىسىز ئاخىرلاشقان ئىدى.
ئۇلار نېمە قىلماقچى؟
رۇسىيە ۋەكىللەر ئۆمىكىگە يېقىن بىر مەنبەنىڭ فىرانسىيە خەۋەر ئاگېنتلىقىغا بىلدۈرۈشىچە، ئاخىرقى سۆھبەتلەر ئىنتايىن جىددىي كەسپىي سۈركىلىش ئىچىدە ئۆتكەن بولۇپ، ئالتە سائەت داۋاملاشقان مۇزاكىرىلەر ھازىرچە ئاخىرلاشقان.
ئۇكرائىنا پىرېزىدېنتى ۋولۇدىمىر زېلېنىسكىي كەچلىك نۇتۇقىدا، «ئۇرۇشنى ئاخىرلاشتۇرۇشقا ئەرزىيدىغان بىر كېلىشىمگە تېز سۈرئەتتە يېقىنلىشىش»قا تەييار ئىكەنلىكىنى بىلدۈرۈش بىلەن بىرگە، رۇسىيەنىڭ تىنچلىق ئورنىتىش نىيىتىنىڭ سەمىمىيلىكىگە گۇمان بىلەن قارايدىغانلىقىنى يوشۇرمىدى. ئۇ رۇسىيەنى ھەقىقىي دىپلوماتىيەدىن بەكرەك باشقۇرۇلىدىغان بومبا ھۇجۇملىرىغا ئالدىنقى ئورۇن بېرىش بىلەن ئەيىبلەپ: «ئۇلار نېمە قىلماقچى؟» دېگەن سوئالنى ئوتتۇرىغا قويدى.
جەنۋە سۆھبەتلىرى ئۈچۈن كىرېمىل تەرەپ سابىق مەدەنىيەت مىنىستىرى ۋىلادىمىر مېدىنسكىينى باش مۇزاكىرىچى قىلىپ تەيىنلىدى. ئۇكرائىنا ھەيئىتىگە بولسا دۆلەت بىخەتەرلىك ئىشلىرى كاتىپى رۇستەم ئۇمەروۋ رەھبەرلىك قىلماقتا. رۇستەم ئۇمەروۋ ۋاشىنگتوننىڭ ۋاسىتىچىلىكىگە تەشەككۈر ئېيتىپ، سۆھبەتلەرنىڭ توقۇنۇشقا مۇناسىۋەتلىك «ئەمەلىي مەسىلىلەر ۋە مۇمكىن بولغان ھەل قىلىش مېخانىزمى»غا مەركەزلەشكەنلىكىنى تىلغا ئالدى.
