پارس قولتۇقى دۆلەتلىرى بىلەن ئامېرىكانىڭ قاتاردا ئۆتكۈزۈلگەن بىخەتەرلىك مانېۋىرى ئاخىرلاشتى
ئامېرىكا بىلەن ئىران ئوتتۇرىسىدىكى سۈركىلىش كۈچىيىۋاتقان بىر پەيتتە، قاتارنىڭ ساھىبخانلىقىدا باشلانغان 11 كۈنلۈك بىرلەشمە ھەربىي مانېۋىر ئاخىرلاشتى.
قاتار دۆلەت تاراتقۇلىرىنىڭ خەۋەر قىلىشىچە، ئامېرىكا بىلەن پارس قولتۇقىدىكى ئەرەب دۆلەتلىرىنىڭ ئىشتىراك قىلىشىدا ئۆتكۈزۈلگەن بۇ مانېۋىر چارشەنبە كۈنى رەسمىي تاماملىنىپ، يېپىلىش مۇراسىمى ئۆتكۈزۈلگەن. قاتار خەۋەر ئاگېنتلىقىنىڭ بىلدۈرۈشىچە، «4-نۆۋەتلىك ئەرەب قولتۇقى بىخەتەرلىكى» ناملىق مەزكۇر مانېۋىرغا پارس قولتۇقى ھەمكارلىق كېڭىشىگە ئەزا دۆلەتلەرنىڭ بىخەتەرلىك ۋە تەرتىپ ساقلاش قىسىملىرى بىلەن ئامېرىكا ئالاھىدە ھەرىكەت قىسىملىرى قاتناشقان.
مانېۋىرنىڭ يېپىلىش مۇراسىمىغا مانېۋىرغا قاتناشقان دۆلەتلەرنىڭ ئىچكى ئىشلار مىنىستىرلىرى ۋە يۇقىرى دەرىجىلىك بىخەتەرلىك ئەمەلدارلىرى قاتناشتى. مانېۋىر جەريانىدا جەمئىي 260 سائەتتىن ئارتۇق مەشىق ئېلىپ بېرىلغان بولۇپ، 70 تىن ئارتۇق مەيدان سېنارىيەسى مۇۋەپپەقىيەتلىك سىناقتىن ئۆتكۈزۈلدى. بۇ بىرلەشمە ھەربىي مانېۋىر ئامېرىكا-ئىران مۇناسىۋىتىدىكى جىددىيچىلىكنى دىپلوماتىك يوللار بىلەن يۇمشىتىش تىرىشچانلىقلىرى داۋاملىشىۋاتقان تارىخىي كىرىزىس مەزگىلىگە توغرا كەلدى.