ئامېرىكا پىرېزىدېنتى دونالد ترامپ غەززەدىكى ئەجەللىك ئىسرائىلىيە ھۇجۇملىرىغا قارىماي، ئامېرىكا قوللىغان ئۇرۇش توختىتىشنىڭ خەۋپ ئاستىدا ئەمەسلىكىنى ئېيتتى. يەرلىك ئەمەلدارلارنىڭ بىلدۈرۈشىچە، ھۇجۇملاردا 24 نەپىرى كىچىك بالا بولۇپ، كەم دېگەندە 91 كىشى ھاياتىدىن ئايرىلغان.
ترامپ سەيشەنبە كۈنى پىرېزىدېنتنىڭ ئالاھىدە ئايروپىلانى «ھاۋا ئارمىيەسى بىرىنچى نومۇرلۇق» (Air Force One) دا مۇخبىرلارغا: «غەززەدىكى ئۇرۇش توختىتىشقا ھېچ نەرسە زىيان يەتكۈزەلمەيدۇ» دېدى. پىرېزىدېنت: «بىر ئىسرائىلىيە ئەسكىرى ئۆلتۈرۈلدى، ئىسرائىلىيەلىكلەر بۇنىڭغا جاۋاب قايتۇردى ۋە قايتۇرۇشى كېرەك. بۇنداق ئەھۋال يۈز بەرگەندە ئۇلار چوقۇم جاۋاب قايتۇرۇشى كېرەك» دەپ قوشۇمچە قىلدى.
ئىسرائىلىيە ھاماسنى ئەيىبلىگەن بولسىمۇ، ھېچقانداق دەلىل-ئىسپات كۆرسەتمىدى.
ئىسرائىلىيە ھۇجۇملىرى غەززە مىقياسىدا داۋاملاشماقتا
سەيشەنبە ئاخشىمىدىن باشلاپ ئېلىپ بېرىلغان ھاۋا ھۇجۇملىرىدا 24 نەپىرى كىچىك بالا بولۇپ، 91 پەلەستىنلىك ئۆلدى، ئارىسىدا ئاياللار ۋە بالىلارمۇ بار نۇرغۇن كىشى يارىلاندى. ھۇجۇملار ئىسرائىلىيەنىڭ ئۇرۇش توختىتىش كېلىشىمىگە خىلاپ ھالدا قارشىلىق كۆرسەتكۈچىلەرگە قارىتىلغانلىقىنى ئىلگىرى سۈرگەن نىشانلارغا قىلىندى.
ھاۋا ھۇجۇملىرى ئىسرائىلىيە كۈچلىرىنىڭ ئۇرۇش توختىتىش كېلىشىمىگە ئاساسەن چېكىنگەن «سېرىق لىنىيە» رايونىغا مەركەزلەشتى. غەززەنى ئىككىگە ئايرىيدىغان بۇ سۈنئىي رايون، غەززە شەھىرىنىڭ جەنۇبى بىلەن خان يۇنۇسنىڭ شىمالى ئارىسىغا جايلاشقان.
10-ئۆكتەبىردىن بۇيان يولغا قويۇلۇۋاتقان 20 ماددىلىق تىنچلىق پىلانى دائىرىسىدىكى ئۇرۇش توختىتىش، ئىسرائىلىيەلىك گۆرۈگە ئېلىنغانلارنى قويۇپ بېرىش، تەخمىنەن 2000 پەلەستىنلىك مەھبۇسنى قويۇپ بېرىش ۋە غەززەنى قايتا قۇرۇشنى ئۆز ئىچىگە ئالىدۇ.
2023-يىلى ئۆكتەبىردىن بۇيان ئىسرائىلىيەنىڭ غەززەدە ئېلىپ بارغان ھۇجۇملىرىدا 68 مىڭ 500 دىن ئارتۇق كىشى ھاياتىدىن ئايرىلدى، كۆپىنچىسى ئاياللار ۋە بالىلار بولۇپ، 170 مىڭدىن ئارتۇق كىشى يارىلاندى.
