ئامېرىكا ۋە رۇسىيە ئەمەلدارلىرى فلورىدادا ئۇكرائىنا مەسىلىسى بويىچە سۆھبەتلىشىدۇ

ئامېرىكا سۆھبەت ۋەكىللىرى شەنبە (20-دېكابىر) كۈنى فلورىدادا رۇسىيە ئەمەلدارلىرى بىلەن كۆرۈشۈپ، ئۇكرائىنادىكى ئۇرۇشنى توختىتىشنى مەقسەت قىلغان يېڭى نۆۋەتلىك سۆھبەتنى ئۆتكۈزۈشكە تەييارلاندى. پىرېزىدېنت دونالد ترامپ ھۆكۈمىتى رۇسىيە بىلەن ئۇكرائىنانى كېلىشىم ھاسىل قىلىپ، توقۇنۇشنى ئاخىرلاشتۇرۇشقا ئۈندىمەكتە.

بۇ قېتىمقى كۆرۈشۈش، ئامېرىكا ئەمەلدارلىرىنىڭ جۈمە (2025-يىلى 19-دېكابىر) كۈنى ئۇكرائىنا ۋە ياۋروپا ئەمەلدارلىرى بىلەن ئۆتكۈزگەن سۆھبىتىدىن كېيىن ئەمەلگە ئاشىدۇ. بۇ تىنچلىق پىلانى ھەققىدىكى ئەڭ يېڭى مۇنازىرىلەر بولۇپ، 2022-يىلى فېۋرالدا رۇسىيە ئومۇميۈزلۈك تاجاۋۇزچىلىق ئۇرۇشىنى باشلىغاندىن بۇيانقى توقۇنۇشنى ھەل قىلىشقا نىسبەتەن بەزى ئۈمىدلەرنى قوزغىدى.

رۇسىيە ۋەكىللەر ئۆمىكىگە پىرېزىدېنت ۋلادىمىر پۇتىننىڭ ئەلچىسى كىرىل دمىترىيېۋ (Kirill Dmitriev) باشچىلىق قىلىدىغان بولۇپ، ئۆي-مۈلۈك مىليونېرىدىن دىپلوماتقا ئايلانغان ستېۋ ۋىتكوف (Steve Witkoff) ۋە ترامپنىڭ كۈيئوغلى كۇشنېر (Jared Kushner) بىلەن كۆرۈشىدۇ. ترامپنىڭ يۇقىرى دەرىجىلىك دىپلوماتى ۋە دۆلەت خەۋپسىزلىك مەسلىھەتچىسى ماركو رۇبىيومۇ (Marco Rubio) سۆھبەتكە قاتنىشىشى مۇمكىنلىكىنى بىلدۈردى.

ئىلگىرىكى كۆرۈشۈشلەر ۋىتكوفنىڭ مىيامىنىڭ خالاندال دېڭىز قىرغىقىدىكى (Hallandale Beach) گولف توپ كۇلۇبىدا ئۆتكۈزۈلگەن ئىدى.

ئامېرىكا، ئۇكرائىنا ۋە ياۋروپا ئەمەلدارلىرى بۇ ھەپتىنىڭ بېشىدا ئۇرۇشنى ئاخىرلاشتۇرۇش سۆھبىتىنىڭ بىر قىسمى سۈپىتىدە كىيېۋغا بېرىلىدىغان بىخەتەرلىك كاپالىتى مەسىلىسىدە ئىلگىرىلەش بولغانلىقىنى خەۋەر قىلدى، ئەمما بۇ شەرتلەرنىڭ موسكۋا تەرىپىدىن قوبۇل قىلىنىدىغان-قىلىنمايدىغانلىقى تېخى ئېنىق ئەمەس.

نام-شەرىپىنى ئاشكارىلاشنى خالىمىغان رۇسىيەلىك بىر ئەمەلدارنىڭ رويتېرس ئاگېنتلىقىغا ئېيتىشىچە، دمىترىيېۋ بىلەن ئۇكرائىنا ۋەكىللىرى ئوتتۇرىسىدىكى ھەر قانداق كۆرۈشۈش ئېھتىماللىقى رەت قىلىنغان.

مۇرەسسە يوق

ئامېرىكا ئىستىخبارات دوكلاتلىرى، رۇسىيە پىرېزىدېنتى ۋلادىمىر پۇتىننىڭ يەنىلا پۈتۈن ئۇكرائىنانى بېسىۋېلىش نىيىتىنىڭ بارلىقى توغرىسىدىكى ئاگاھلاندۇرۇشلارنى ئۆز ئىچىگە ئالىدۇ. بۇ، بىر قىسىم ئامېرىكا ئەمەلدارلىرىنىڭ موسكۋانىڭ تىنچلىققا تەييار ئىكەنلىكى ھەققىدىكى قاراشلىرىغا پۈتۈنلەي زىت.

پۇتىن موسكۋادىكى يىللىق ئاخبارات ئېلان قىلىش يىغىنىدا مۇرەسسەگە ھېچقانداق يول قويمىدى ۋە رۇسىيەنىڭ ئۇرۇشنى ئاخىرلاشتۇرۇش شەرتلىرىنىڭ 2024-يىلى ئىيۇندىن بۇيان ئۆزگەرمىگەنلىكىدە چىڭ تۇردى. بۇ شەرتلەر، ئەينى ۋاقىتتا ئۇكرائىنانىڭ ناتوغا كىرىش نىيىتىدىن ۋاز كېچىشىنى ۋە رۇسىيە ئۆز زېمىنى دەپ دەۋا قىلىۋاتقان ئۇكرائىنانىڭ تۆت رايونىدىن پۈتۈنلەي چېكىنىشىنى ئىچىگە ئالىدۇ.

كىيېۋ بولسا، رۇسىيە قوراللىق كۈچلىرى تۆت يىلغا يېقىن داۋاملاشقان ئۇرۇشتا بېسىۋالالمىغان زېمىنلارنى ھەرگىزمۇ بەرمەيدىغانلىقىنى بىلدۈرمەكتە.

ئۇكرائىنانىڭ باش مۇزاكىرەچىسى رۇستەم ئۇمېروۋ جۈمە (19-دېكابىر) كۈنى ئامېرىكا ۋە ياۋروپا ۋەكىللىرى بىلەن سۆھبەتلەشكەنلىكىنى ھەمدە ئورتاق تىرىشچانلىقلارنى داۋاملاشتۇرۇشقا قوشۇلغانلىقلىرىنى ئېيتتى.

 ئۇ تېلېگرام قانىلىدا ئامېرىكادىكى مۇنازىرەلەر ئۈستىدە توختىلىپ: «بىز ئامېرىكالىق شېرىكلىرىمىز بىلەن كېيىنكى قەدەملەر ۋە يېقىن كەلگۈسىدە ئورتاق تىرىشچانلىقلىرىمىزنى داۋاملاشتۇرۇش بويىچە كېلىشىم ھاسىل قىلدۇق» دېدى ۋە سۆھبەت نەتىجىسىدىن پىرېزىدېنت ۋلودىمىر زېلېنسكىينى خەۋەردار قىلغانلىقىنى قوشۇپ قويدى.

ئاقساراي بۇ ھەقتىكى سوئاللارغا ھازىرچە جاۋاب بەرمىدى.

ئامېرىكا تاشقى ئىشلار مىنىستىرى رۇبىيو جۈمە كۈنى مۇخبىرلارغا ئۇرۇشنى ئاخىرلاشتۇرۇش سۆھبەتلىرىدە ئىلگىرىلەش بولغانلىقىنى، ئەمما يەنىلا بېسىلىدىغان ئۇزۇن مۇساپە بارلىقىنى ئېيتتى.

«ئاخىرىدا يەنىلا كېلىشىم تۈزۈش ئۇلارنىڭ ئۆزىگە باغلىق. بىز ئۇكرائىنانى كېلىشىم تۈزۈشكە مەجبۇرلىيالمايمىز، رۇسىيەنىمۇ مەجبۇرلىيالمايمىز. ئۇلار ئۆزلىرى كېلىشىم تۈزۈشنى خالىشى كېرەك. بىزنىڭ ئويناۋاتقان رولىمىز، ئىككى تەرەپ قوشۇلالايدىغان ئورتاق نۇقتىلارنىڭ بار-يوقلۇقىنى ئېنىقلاشتىن ئىبارەت. بىز بۇنىڭغا نۇرغۇن ۋاقىت ۋە كۈچ سەرپ قىلدۇق، شۇنداقتىمۇ يەنىلا قىلىۋاتىمىز. بەلكىم بۇ مۇمكىن بولماسلىقىمۇ مۇمكىن، ئەمما مەن كېلىشىمنىڭ ئەمەلگە ئېشىشىنى، مۇشۇ ئاينىڭ ئاخىرىغىچە، يەنى يىل ئاخىرىدىن بۇرۇن ئەمەلگە ئېشىشىنى ئۈمىد قىلىمەن» دېدى.