قارا دېڭىزدا تۈركىيە بېلىقچى كېمىسى ھۇجۇمغا ئۇچرىدى. تۈركىيە دائىرىلىرى ھۇجۇمنى كىمنىڭ قىلغانلىقىنى ئاشكارىلىمىدى.

تۈركىيە دېڭىز قىرغىقى بىخەتەرلىك قوماندانلىق ئىشتابىنىڭ باياناتىغا قارىغاندا، قىرىم ئەتراپىدا بىر تۈركىيە بېلىقچى كېمىسى ھۇجۇمغا ئۇچراپ چۆكۈپ كەتكەن؛ ۋەقەدە بىر بېلىقچى جېنىدىن ئايرىلغان، تۆت بېلىقچى يارىلانغان.

دېڭىز قىرغىقى بىخەتەرلىك قوماندانلىق ئىشتابى جۈمە (2026-يىلى 5-ئىيۇن) كۈنى بايانات بېرىپ، پەيشەنبە (4-ئىيۇن) كۈنى سېۋاستوپول قىرغاقلىرىدا تۈركىيە بايرىقى ئېسىلغان «DURU 67» ناملىق بېلىقچى كېمىسىنىڭ ھۇجۇمغا ئۇچرىغانلىقى ھەققىدە ئۇچۇر تاپشۇرۇۋېلىنغانلىقىنى بىلدۈردى.

بىلدۈرۈلىشىچە، كېمە كېيىنچە ھۇجۇم نەتىجىسىدە دېڭىزغا چۆكۈپ كەتكەن.

ئەتراپتىكى «بۇراك كايا» (BURAK KAYA)  ناملىق يەنە بىر بېلىقچى كېمىسى يارىلانغان بېلىقچىلارنى قۇتقۇزۇپ، تۈركىيەنىڭ قارا دېڭىز قىرغاقلىرىغا قاراپ ھەرىكەت قىلغان. بېلىقچىلارنى يۆتكەش جەريانىدا، ئەھۋالى ئېغىر دەپ دوكلات قىلىنغان، يارىلانغان بېلىقچىلارنىڭ بىرى جاراھىتى ئېغىر بولغانلىقى ئۈچۈن جېنىدىن ئايرىلغان.

تۈركىيە دېڭىز قىرغىقى مۇھاپىزەت ئەترىتى شىمالدىكى ئىنەبولۈ (Inebolu) پورتىدىن بىر قۇتقۇزۇش كېمىسى، تېببىي خادىملار ۋە قۇتقۇزۇش ئەترەتلىرىنى ئەۋەتكەن.

دائىرىلەرنىڭ بىلدۈرۈشىچە، دېڭىز قىرغىقى بىخەتەرلىك كېمىسى پورتتىن تەخمىنەن 115 دېڭىز مىلى يىراقلىقتىكى بېلىقچى كېمىسىگە يېتىپ بېرىپ، يارىلانغان بېلىقچىلارنى داۋالاش ئۈچۈن ئۆز كېمىسىگە يۆتكىگەن. يارىدارلار ئىنەبولۈغا ئېلىپ كېلىنگەن بولۇپ، دوختۇرخانىدا داۋالاش ئاستىغا ئېلىنغان.

تۈركىيە دېڭىز قىرغىقى بىخەتەرلىك قوماندانلىق ئىشتابى جېنىدىن ئايرىلغان بېلىقچىنىڭ ئائىلە-تاۋابىئاتلىرىغا تەزىيە بىلدۈردى ۋە يارىلانغانلارنىڭ تېزرەك ئەسلىگە كېلىشىگە تىلەكداشلىق بىلدۈردى.

باياناتتا، ھۇجۇمغا مەسئۇل تەرەپ تىلغا ئېلىنمىدى ۋە باشقا تەپسىلىي ئۇچۇرلارمۇ ئېلان قىلىنمىدى.

مۇناسىۋەتلىك ئۇچۇرلارTRT World - Türkiye proposes new security deal for Black Sea amid rising attacks on vessels