تۈركىيە ياۋروپادا ئۇدا بىرنەچچە كۈندىن بۇيان داۋاملىشىۋاتقان ئورمان ئوت ئاپەتلىرىگە تاقابىل تۇرۇش دائىرىسىدە، ئىسپانىيەدىن كېيىن فىرانسىيەنىمۇ ھاۋا ياردىمى بىلەن تەمىنلىمەكتە.
يېزا ئىگىلىك ۋە ئورمانچىلىق ئىشلىرى مىنىستىرى ئىبراھىم يۇماقلى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، جۇمھۇر رەئىس رەجەپ تاييىپ ئەردوغاننىڭ كۆرسەتمىسىگە ئاساسەن، ئىلگىرى ئىسپانىيەگە ئەۋەتىلگەن ئىككى ئوت ئۆچۈرۈش ئايروپىلانىدىن كېيىن، فىرانسىيەنىڭ ياردەم تەلىپىگە بىنائەن بۇ دۆلەتكىمۇ ئىككى ئوت ئۆچۈرۈش ئايروپىلانى ئەۋەتىلگەنلىكىنى ئۇقتۇردى.
يۇماقلى ياۋروپادا داۋاملىشىۋاتقان ئورمان ئوت ئاپەتلىرىنىڭ، ئوت ئۆچۈرۈش خىزمىتىنىڭ نەقەدەر مۈشكۈل ئىكەنلىكىنى يەنە بىر قېتىم ئىسپاتلاپ بەرگەنلىكىنى بىلدۈردى، ھەمدە تۈركىيەنىڭ ئۆزىگە خاس ئىمكانىيىتى ۋە تەجرىبىسى بىلەن پەقەت ئۆزىنىڭ ئورمانلىرىنىلا ئەمەس، بەلكى ئېھتىياج تۇغۇلغاندا باشقا دۆلەتلەرنىڭ ئورمانلىرىنى قوغداش ئۈچۈنمۇ مەسئۇلىيەتنى زىممىسىگە يۈكلەيدىغانلىقىنى تەكىتلىدى.
تۈركىيەنىڭ ئىسپانىيەگە بەرگەن ياردىمىدىن كېيىن، فىرانسىيەنىڭ ياردەم تەلىپىگىمۇ قىسقا ۋاقىت ئىچىدە جاۋاب قايتۇرغانلىقىنى تىلغا ئالغان يۇماقلى: «ئورمانلار بىزگىلا قالغان ئامانەت ئەمەس، بەلكى كېيىنكى ئەۋلادلارغا قالدۇرىدىغان ئەڭ قىممەتلىك مىراستۇر. بۇ ئاڭغا ئاساسەن چېگرادىن ھالقىغان ھەمكارلىق ۋە كۈرىشىمىزنى قەتئىيلىك بىلەن داۋاملاشتۇرىمىز» دېگەن سۆزلەر بىلەن باياناتىنى ئاخىرلاشتۇردى.
