ب د ت باش كاتىپى ئانتونىيو گۇتېررېس سۈنئىي ئەقىلنىڭ خەتەرلىرى توغرىسىدا ئاگاھلاندۇرۇپ، بۇ تېخنىكىنىڭ كەلگۈسىنىڭ «بىر نەچچە مىلياردېرنىڭ كەيپىياتىغا» تاشلاپ قويۇلماسلىقىنى تەلەپ قىلدى. ھىندىستاندىكى باشلىقلار يىغىنىدا سۆز قىلغان گۇتېررېس: «سۈنئىي ئەقىل ھەممە ئادەمگە تەۋە بولۇشى كېرەك. ئۇنىڭ كەلگۈسى بىر نەچچە دۆلەت ياكى مىلياردېرلار تەرىپىدىن بېكىتىلەلمەيدۇ» دېدى.
گۇتېررېس جىددىي تەدبىر ئېلىنمىسا تەڭسىزلىكنىڭ تېخىمۇ كۆپىيىدىغانلىقىنى ئەسكەرتتى. ئۇ سۈنئىي ئەقىلنىڭ تېببىي ساھە، مائارىپ، يېمەكلىك بىخەتەرلىكى ۋە كىلىمات مەسىلىلىرىدە زور پايدىسىنىڭ بولىدىغانلىقىنى، لېكىن ئوخشاشلا زىيان كەلتۈرۈش خەۋپىنىڭمۇ بارلىقىنى بىلدۈردى. ئۇ بالىلارنىڭ سۈنئىي ئەقىلنىڭ تەجرىبە ئوبيېكتى بولۇپ قالماسلىقىنى، نازارەت قىلىش سىستېمىسىنىڭ بەرپا قىلىنىشى كېرەكلىكىنى تەكىتلىدى.
«بىخەتەر بىر بوشلۇق»
فىرانسىيە پىرېزىدېنتى ئېممانۇئېل ماكرونمۇ تېخنىكىنىڭ بىخەتەر نازارەت قىلىنىشىنى قوللايدىغانلىقىنى بىلدۈردى. ياۋروپا ئىتتىپاقىنىڭ «سۈنئىي ئەقىل قانۇنى» بىلەن باشلامچى بولغانلىقىنى ئەسكەرتكەن ماكرون، ياۋروپانىڭ يېڭىلىق يارىتىش بىلەن بىرگە بىخەتەرلىككىمۇ ئەھمىيەت بېرىدىغانلىقىنى ئېيتتى. ئۇ يەنە، فىرانسىيەنىڭ بۇ ساھەدىكى تەتقىقاتچىلار سانىنى ئىككى ھەسسە ئاشۇرىدىغانلىقىنى ۋە بالىلارنى تور دۇنياسىدىكى يامان نىيەتلىك ئىشلىتىشتىن قوغدايدىغانلىقىنى بىلدۈردى.
«ئومۇمىيۈزلۈك قاتنىشىش قورالى»
ھىندىستان باش مىنىستىرى نارېندرا مودى سۈنئىي ئەقىلنى دېموكراتىيەلەشتۈرۈش كېرەكلىكىنى ئېيتتى. ئۇ سۈنئىي ئەقىلنىڭ بولۇپمۇ «يەر شارى جەنۇبى» (تەرەققىي قىلىۋاتقان دۆلەتلەر) ئۈچۈن كۈچەيتىش قورالىغا ئايلىنىشى كېرەكلىكىنى تەكىتلىدى.
