ترامپ نۇتىقىدا ئامېرىكانىڭ ئالدىمىزدىكى ئىككى-ئۈچ ھەپتە بويىچە ئىرانغا قارىتىلغان ھۇجۇملىرىنى داۋاملاشتۇرىدىغانلىقىنى ئېيتقان ئىدى.

ئامېرىكا پىرېزىدېنتى دونالد ترامپ ئىراندىكى ھالقىلىق ئۇل ئەسلىھەلەرگە قارىتىلغان تېخىمۇ كۆپ ھۇجۇملارنىڭ يېقىنلاپ قالغانلىقىدىن بېشارەت بەردى.

ترامپ پەيشەنبە كۈنى ئاممىۋى ئورتاقلىشىش تور بېتى Truth Social سەھىپىسىدە: «قوراللىق كۈچلىرىمىز دۇنيادىكى ئەڭ چوڭ ۋە ئەڭ قۇدرەتلىك كۈچ (ناھايىتى ئېنىق پەرقمۇ بار!)، ئۇلار ئىراندا قالغانلارنى يوقىتىشقا تېخى باشلىغىنىمۇ يوق» دەپ يازدى ۋە سۆزىنى مۇنداق داۋاملاشتۇردى: «نۆۋەتتە كۆۋرۈكلەر، ئاندىن ئېلېكتىر ئىستانسىلىرى بار! يېڭى ھاكىمىيەت رەھبەرلىكى نېمە قىلىشى كېرەكلىكىنى ئوبدان بىلىدۇ ۋە بۇ تېز سۈرئەتتە قىلىنىشى كېرەك!»

بۇ باياناتلار ترامپ 28-فېۋرالدا باشلانغان «Epic Fury» (ئېپىك غەزەپ) ھەربىي ھەرىكىتى ھەققىدە خەلققە نۇتۇق سۆزلەپ بىر كۈن كېيىن ئېلان قىلىندى.

ترامپ نۇتىقىدا: «ئالدىمىزدىكى ئىككى-ئۈچ ھەپتە ئىچىدە ئۇلارغا ناھايىتى ئېغىر زەربىلەرنى بېرىمىز. ئۇلارنى ئۆزلىرى لايىق بولغان تاش قوراللار دەۋرىگە قايتۇرىمىز» دېگەن ئىدى.

بۇنىڭدىن ئىلگىرى، 100 دىن ئارتۇق خەلقئارا قانۇن مۇتەخەسسىسى ئامېرىكانىڭ ئىرانغا قارىتىلغان ھۇجۇملىرىنىڭ ئۇرۇش جىنايىتى شەكىللەندۈرۈشى مۇمكىنلىكى توغرىسىدا ئاگاھلاندۇرۇش بەرگەن ئىدى.

مۇتەخەسسىسلەر تەرىپىدىن ئېلان قىلىنغان ئوچۇق خەتتە مۇنداق دېيىلدى:

 «ھەر كۈنى ئامېرىكا باج تاپشۇرغۇچىلىرىغا 1 مىلياردتىن 2 مىليارد دوللارغىچە چىقىم ئېلىپ كېلىۋاتقان بۇ ئۇرۇش، رايوندىكى پۇقرالارغا ئېغىر زىيان يەتكۈزۈۋاتىدۇ، دەرۋەقە، بۇ ئۇرۇش ئوتتۇرا شەرق مىقىياسىدا يۈزلىگەن پۇقرانىڭ جېنىغا زامىن بولدى ھەمدە ئېغىر مۇھىت ۋە ئىقتىسادىي زىيانلارنى كەلتۈرۈپ چىقىرىۋاتىدۇ.»