Common Sense Media چارشەنبە كۈنى ئېلان قىلغان دوكلاتىدا، OpenAI شىركىتىنىڭ «ئۆسمۈرلەر ئۈچۈن ChatGPT» (ChatGPT for Teens) مەھسۇلاتىغا قوشقان بەزى بىخەتەرلىك تەدبىرلىرىنىڭ كۆڭۈلدىكىدەك ئۈنۈم بەرمەيۋاتقانلىقىنى ۋە بۇ سۈنئىي ئەقىل روبوتىنىڭ بالىلار ئۈچۈن «قوبۇل قىلغىلى بولمايدىغان خەۋپ - خەتەر» شەكىللەندۈرۈۋاتقانلىقىنى ئاشكارىلىدى.
مەزكۇر نازارەتچىلىك گۇرۇپپىسى OpenAI شىركىتىنى سۈنئىي ئەقىل روبوتىنى «بىخەتەر ۋە بالىلارنىڭ يېتىلىشىگە ماس كېلىدىغان تەجرىبە بىلەن تەمىنلىيەلىگۈدەك ھالەتكە كەلگۈچە» ئىشلىتىش دائىرىسىنى پەقەت چوڭلار بىلەنلا چەكلەشكە چاقىردى. OpenAI بولسا بۇ گۇرۇپپىنىڭ سىناقلىرى سۈنئىي ئەقىل روبوتىنىڭ قوغداش تەدبىرلىرىنىڭ ئەمەلىي خىزمەت جەريانىنى تولۇق ئەكس ئەتتۈرمەيدىغانلىقىنى ئىلگىرى سۈردى.
ئاتا-ئانىلار، مائارىپچىلار ۋە بالىلار تەرەققىياتى مۇتەخەسسىسلىرى سۈنئىي ئەقىل روبوﺗلىرىنىڭ بالىلار تەرىپىدىن ئىشلىتىلىشىگە قارىتا ئاگاھلاندۇرۇشلارنى بەرمەكتە. بۇ سۈنئىي ئەقىل قوراللىرى مەكتەپ تاپشۇرۇقلىرىدا كۆچۈرمىكەشلىك قىلىشنى ئاسانلاشتۇرۇش، ھەتتا ئۆزىنى ئۆلتۈرۈۋېلىشقا تۈرتكە بولۇش بىلەن ئەيىبلەنمەكتە.
مۇتەخەسسىسلەرنىڭ قارىشىچە، ھەتتا چوڭلارمۇ سۈنئىي ئەقىلنى ئىنسانلاشتۇرۇۋېلىپ، ئۇنىڭ بىلەن ساغلام بولمىغان مۇناسىۋەت ئورنىتىۋالىدىغان بولغاچقا، مېڭىسى تېخى تولۇق يېتىلمىگەن ئۆسمۈرلەر بۇ خىل خەتەرلەر ئالدىدا تېخىمۇ ئاجىز ھالەتتە تۇرماقتا.
رەقەملىك تاراتقۇلارنى ئەقىل بىلەن ئىشلىتىشنى تەشەببۇس قىلىدىغان Common Sense Media نىڭ دوكلاتىدا: «ئۆسمۈرلەر ئۈچۈن ChatGPT نىڭ ئاتا-ئانىلارغا دائىم ئىشقا يارىمايدىغان بىخەتەرلىك تەدبىرلىرى ھەققىدە خاتا ئىشەنچ تۇرغۇزۇپ قويۇشىدىن ئەنسىرەيمىز» دېيىلدى.
دوكلاتقا قارىغاندا، كۆڭۈلدىكىدەك ئۈنۈم بەرمىگەن ئۆسمۈرلەر مودىنىڭ ئىقتىدارلىرى ئارىسىدا بالىنىڭ ئۆزىنى ئۆلتۈرۈۋېلىش، ئۆزىگە زىيان يەتكۈزۈش ياكى غىزالىنىش تەرتىپى بۇزۇلۇش خەۋپىگە دۇچ كەلگەنلىكىنى ئاتا-ئانىلارغا ئۇقتۇرىدىغان ئاگاھلاندۇرۇشلار، شۇنداقلا قىيىن ئەھۋالدا قالغان ئۆسمۈرلەرگە ياردەم بېرىش تەدبىرلىرى بار ئىدى.
نازارەتچىلىك گۇرۇپپىسى: «ئۆسمۈرلەر ChatGPT نىڭ بىر ئىنسان سۈپىتىدە كۆرگىنىدە، ئۇ يەنىلا بىر دوستىدەك سۆزلەيدىغانلىقىنى» بىلدۈردى. ھالبۇكى، OpenAI سۈنئىي ئەقىل بوتىنىڭ ئىشلەتكۈچىگە قارىتا شەخسىي ھېسسىياتى بارلىقىدەك تەسىر بېرىشىنىڭ ياكى ئۇنىڭ ئاڭلىق ياكى ھېسسىياتقا ئىگە ئىكەنلىكىنى بىلدۈرىدىغان سۆزلەرنى قىلىشىنىڭ ئالدىنى ئالىدىغانلىقىغا ۋەدە بەرگەن ئىدى.
OpenAI «ئۆسمۈرلەرنىڭ بىخەتەرلىكىگە چىن دىلىمىزدىن ئىشىنىمىز ۋە ئەھمىيەت بېرىمىز» دەپ بايانات بېرىپ، بىخەتەرلىك تەدبىرلىرىنى تەرەققىي قىلدۇرۇۋاتقانلىقىنى ۋە ئاتا-ئانىلارغا ئۆسمۈرلەرنىڭ سۈنئىي ئەقىل ئىشلىتىشىنى يېتەكلەيدىغان قوراللارنى سۇنغانلىقىنى بىلدۈردى.
سان فىرانسىسكوغا جايلاشقان بۇ شىركەت يەنە دوكلاتتىكى سىناق ئۇسۇللىرىنىڭ خاتا ئىكەنلىكىنى، سىناقلارنىڭ كۆپىنچىسى ئاتا-ئانىلارنىڭ كونترول قىلىش ئىقتىدارى تولۇق قوزغىتىلىپ بولغۇچە باشلىنىپ ئاخىرلاشقان بولۇشى مۇمكىنلىكىنى ئىلگىرى سۈردى.
Common Sense Media شىركىتى بولسا ئۆزى باھالايدىغان شىركەتلەرنىمۇ ئۆز ئىچىگە ئالغان OpenAI ۋە باشقا تېخنولوگىيە شىركەتلىرى تەمىنلىگەن مەبلەغلەرنى قوللىنىدۇ.
