تۈركىيە جۇمھۇر رەئىسى رەجەپ تاييىپ ئەردوغان يىللاردىن بۇيان پەلەستىن دەۋاسىنىڭ ياڭراق ئاۋازى بولۇپ كەلدى. ئۇ دۇنياغا قىلغان خىتابلىرىدىمۇ، ئىككى تەرەپلىك ئۇچرىشىشلىرىدىمۇ غەززەنى كۈنتەرتىپنىڭ ئالدىنقى قاتارىدا تۇتتى.
ئەردوغان بەزىدە كىشىنى لەرزىگە سالىدىغان سۈرەتلەر ئارقىلىق پەلەستىندىكى ئىرقىي قىرغىنچىلىق رېئاللىقىنى قىرغىنچىلىق سادىر قىلغۇچىلارنىڭ يۈزىگە سالدى. ئۇنىڭ 2019-يىلى بىرلەشكەن دۆلەتلەر تەشكىلاتىدا سورىغان «ئىسرائىلىيە دۆلىتىنىڭ چېگراسى قەيەردە؟» دېگەن سوئالى كىشىلەرنىڭ ئېسىدە قالدى.
ئەردوغان مۇنداق دېدى:
«ئۇلار بىز سۈكۈت قىلساق، مەسىلە تۈگەيدۇ، دەپ ئويلايدۇ. ھالبۇكى، بىز سۈكۈت قىلساقمۇ، تارىخ سۈكۈت قىلمايدۇ. تارىخ سۈكۈت قىلسىمۇ، ھەقىقەت سۈكۈت قىلمايدۇ. ئۇلار بىزدىن قۇتۇلسا، مەسىلە تۈگەيدۇ، دەپ ئويلايدۇ. ھالبۇكى، بىزدىن قۇتۇلسىمۇ، ۋىجدان ئازابىدىن قۇتۇلالمايدۇ. ۋىجدان ئازابىدىن قۇتۇلسىمۇ، تارىخنىڭ ئازابىدىن قۇتۇلالمايدۇ. تارىخنىڭ ئازابىدىن قۇتۇلسىمۇ، ئاللاھنىڭ غەزىپىدىن قۇتۇلالمايدۇ.»
زۇلۇمغا ئۇچرىغان رايونلاردىكى بىگۇناھ بالىلارنىڭ كەچۈرمىشلىرىنى تەسىرلىك سۆزلەر بىلەن بايان قىلغان ئەردوغان: «بۇ ئىنسانىيەتنىڭ ئەڭ تۆۋەن نۇقتىسىدۇر. ئىنسانىيەت يېقىنقى بىر ئەسىردە بۇنداق ۋەھشىيلىكنى كۆرمىدى» دېدى.
ئەردوغان ئىرقىي قىرغىنچىلىق سادىر قىلغۇچىلارنىڭ يۈزىگە ھەقىقەتنى ئېيتىشتىن ۋاز كەچمىدى. ئۇنىڭ سۆزلىرى ئىسرائىلىيە تەرەپنى بىئارام قىلدى؛ ئىسرائىلىيە ۋەكىللىرى ب د ت ئومۇمىي كېڭىشى زالىدىن چىقىپ كەتتى.
ئەردوغان يەنە مۇنداق دېدى:
«قەلبىم بىلەن سۆزۈم ئارىسىغا يەنە پەردە تارتماي، بەزى ھەقىقەتلەرنى بۇ يەردە ئوچۇق-ئاشكارا ئېيتىمەن. ھېچكىم ئەيىبكە بۇيرۇمىسۇن، رەنجىمىسۇن، كۆڭلىگە ئالمىسۇن. بۇ تاييىپ ئەردوغاننىڭ شەخسىي مەسىلىسى ئەمەس. بۇ ئىنسانىي مەسىلە. ھەممىمىز ئۈچۈن ۋىجدانىي مەسىلە.»
تۈركىيە خەلقئارا جەمئىيەتنى ھەرىكەتكە كەلتۈرۈش ئۈچۈنمۇ توختىماي تىرىشچانلىق كۆرسەتتى. ئەردوغان پەلەستىن دەۋاسىنى ئىزچىل مىللىي مەسىلە دەپ قاراپ، تۈركىيەنىڭ قوللىشىنى بارلىق سۇپىلاردا كۈچلۈك تەكىتلەپ كەلدى.
