تۈركىيە جۇمھۇر رەئىسى رەجەپ تاييىپ ئەردوغان ئۇرۇشنى «ئادىل ۋە ئۇزۇن مۇددەتلىك تىنچلىق» بىلەن ئاخىرلاشتۇرۇش تىرىشچانلىقلىرىنىڭ قىممەتلىك ئىكەنلىكىنى ئېيتىپ، ھەر ئىككى تەرەپكە ئەمەلىي پايدا ئېلىپ كېلىدىغان ساھەلەردە ئىلگىرىلەش ھاسىل قىلغىلى بولىدىغانلىقىنى تەكىتلىدى.
جۇمھۇر رەئىسلىك مەھكىمىسى ئۇچۇر-ئالاقە ئىشلىرى ئىدارىسىنىڭ جۈمە (2025-يىلى 12-دېكابىر) كۈنى بىلدۈرۈشىچە، تۈركىيە جۇمھۇر رەئىسى رەجەپ تايىپ ئەردوغان رۇسىيە پىرېزىدېنتى ۋلادىمىر پۇتىن بىلەن كۆرۈشكەندە، رۇسىيە-ئۇكرائىنا ئۇرۇشىنى ئاخىرلاشتۇرۇشنى مەقسەت قىلغان تىنچلىق سۆھبەتلىرىنى «يېقىندىن» كۆزىتىۋاتقانلىقىنى ۋە ئەنقەرەنىڭ بۇ تىنچلىق سۆھبەتلىرىگە ساھىبخانلىق قىلالايدىغانلىقىنى ئېيتتى.
ئەردوغان بىلەن پۇتىن تۈركمەنىستاننىڭ پايتەختى ئاشخابادتا ئۆتكۈزۈلگەن خەلقئارا تىنچلىق ۋە ئىشەنچ مۇنبىرى دائىرىسىدە كۆرۈشتى. ئۇلار ئىككى تەرەپلىك مۇناسىۋەتلەر ۋە موسكۋا-كىيېۋ ئۇرۇشىغا ئالاقىدار كەڭ دائىرىلىك تىنچلىق تىرىشچانلىقلىرى ھەققىدە سۆزلەشتى.
ئەردوغانغا ھەمراھ بولغان تۈركىيە ھەيئىتى ئىچىدە تاشقى ئىشلار مىنىستىرى خاقان فىدان، ئېنېرگىيە ۋە تەبىئىي بايلىقلار مىنىستىرى ئالپارسلان بايراكتار، ئىستىخبارات ئىدارىسى-مىت (MİT) باشلىقى ئىبراھىم كالىن، ئۇچۇر-ئالاقە ئىدارىسىنىڭ باشلىقى بۇرھانەتتىن دۇران، تاشقى سىياسەت ۋە دۆلەت خەۋپسىزلىك باش مەسلىھەتچىسى ئاكىف چاغاتاي قىلىچ ۋە ئاق پارتىيە مۇئاۋىن رەئىسى خالىت يەرەباكان قاتارلىقلار بار ئىدى.
رەجەپ تاييىپ ئەردوغان ئۇرۇشنى «ئادىل ۋە ئۇزۇن مۇددەتلىك تىنچلىق» بىلەن ئاخىرلاشتۇرۇش تىرىشچانلىقلىرىنىڭ قىممەتلىك ئىكەنلىكىنى، ھەر ئىككى تەرەپكە ئەمەلىي پايدا بېرىدىغان ساھەلەردە ئىلگىرىلەش ھاسىل قىلىشنىڭ مۇمكىنلىكىنى تىلغا ئالدى.
ئۇ، بولۇپمۇ ئېنېرگىيە ئەسلىھەلىرى ۋە پورتلارنى نىشان قىلغان چەكلىك ئۇرۇش توختىتىشنى يولغا قويۇشنىڭ پايدىلىق بولىدىغانلىقىنى ئەسكەرتتى.
ئۇ ئەنقەرەنىڭ رۇسىيە-ئۇكرائىنا ئۇرۇشىدىكى تىنچلىق تىرىشچانلىقلىرىنى قوللايدىغانلىقىنى يەنە بىر قېتىم تەكىتلىدى.
جۇمھۇر رەئىسلىك مەھكىمىسى ئۇچۇر-ئالاقە ئىشلىرى ئىدارىسىنىڭ بىلدۈرۈشىچە، رەجەپ تاييىپ ئەردوغان «ئەنقەرەنىڭ ئۇرۇشنى ئاخىرلاشتۇرۇشنى مەقسەت قىلغان سۆھبەتلەرنى يېقىندىن كۆزىتىۋاتقانلىقىنى ۋە بۇ رامكا ئىچىدە بارلىق شەكىلدىكى سۆھبەتلەرگە ساھىبخانلىق قىلىشقا تەييار» ئىكەنلىكىنى ئېيتقان.
«تىنچلىق ۋە خەۋپسىزلىك: سىجىل كەلگۈسى ئۈچۈن نىشانلارنىڭ بىرلىكى» ناملىق بۇ مۇنبەر، يەرشارى تىنچلىق تەشەببۇسلىرىنى كۈچەيتىش توغرىسىدا يۇقىرى دەرىجىلىك پىكىر ئالماشتۇرۇشتا مۇھىم رول ئوينىدى.
پۇتىن مۇنبەردە ئايرىم سۆز قىلىپ، دۆلەتلەر ئارا مۇناسىۋەتلەرنى ب د ت نىزامنامەسىنىڭ پىرىنسىپلىرىغا ماسلاشتۇرۇشنىڭ مۇھىملىقىنى تەكىتلىدى ۋە تۈركمەنىستاننىڭ تەڭپۇڭ تاشقى سىياسىتىنى ھەمدە رايون مۇقىملىقىغا قوشقان تۆھپىلىرىنى مەدھىيەلىدى.
ئەردوغان بىلەن پۇتىن يەنە پەلەستىن ۋە سۈرىيە ۋەزىيىتى، شۇنداقلا جەنۇبىي كاۋكازدىكى تىنچلىق مۇساپىسى ھەققىدىمۇ مۇزاكىرە ئېلىپ باردى.
ئەردوغاننىڭ بۇ زىيارىتى تۈركمەنىستان پىرېزىدېنتى سەردار بەردىمۇھەممەدوۋ ۋە باشقا رايون ئەمەلدارلىرى بىلەن ئۆتكۈزگەن سۆھبەتلەرنى ئۆز ئىچىگە ئالغان بولۇپ، بۇ ئەنقەرەنىڭ مۇنبەر مەزگىلىدىكى كەڭ دائىرىلىك دىپلوماتىك پائالىيەتلىرىنى نامايان قىلدى.
مۇناسىۋەتلىك ئۇچۇرلارTRT World - Russia welcomes Türkiye’s efforts in Ukraine peace process, Kremlin says
