ئىسرائىلىيە دۆلەت خەۋپسىزلىك مەنبەلىرى ئىرانغا قارشى ئېلىپ بېرىلىۋاتقان ئۇرۇشنىڭ، ئىسرائىلىيەنىڭ ھۇجۇمنىڭ باشلىنىشىدا بەلگىلىگەن سۈرئەتتە ئىلگىرىلىمەيۋاتقانلىقىنى بىلدۈردى.

ئىسرائىلىيە دۆلەتلىك تېلېۋىزىيە قانىلى KAN نىڭ خەۋىرىگە قارىغاندا، ئىسمىنى ئاشكارىلاشنى خالىمىغان خەۋپسىزلىك دائىرىلىرى يەكشەنبە كۈنى ئېلان قىلغان باياناتىدا، ئۇرۇشنىڭ 28-فېۋرالدىكى تۇنجى زەربىسىنىڭ «كۈتۈلگەندىكىدىن ياخشى» بولغانلىقىنى، ئەمما ئۇرۇشنىڭ دەسلەپتە مۆلچەرلەنگەن سۈرئەتتە داۋاملاشمايۋاتقانلىقىنى ئېيتقان. شۇنداقلا ئۇرۇش نىشانلىرىنى قايتىدىن كۆزدىن كەچۈرۈشنىڭ زۆرۈرلۈكىنى ئەسكەرتكەن.

مەنبەلەر يەنە، ئىسرائىلىيە دۇچ كېلىۋاتقان قىيىنچىلىقلاردىن بىرىنىڭ، ئىسرائىلىيە ئىلگىرى جەزم قىلغان مۆلچەرلەر بويىچە نۇرغۇنلىغان ئىرانلىقلارنى ئۇرۇش جەريانىدا ھۆكۈمەتكە قارشى نامايىش قىلىش ئۈچۈن كوچىلارغا چىقىرىش ئىكەنلىكىنى قەيت قىلغان.

ئامېرىكا قوشما ئىشتاتلىرى بىلەن ئىسرائىلىيە ئالدىمىزدىكى كۈنلەردە ئىرانغا قارىتىلغان ئۇرۇشنىڭ يۆنىلىشىگە تەسىر كۆرسىتىدىغان قوشۇمچە قەدەملەرنى بېسىشنى پىلانلىماقتا.

ئىسرائىلىيە ئارمىيەسى ئىلگىرى ئېلان قىلغان باياناتىدا، ئۇرۇشنىڭ دەسلەپكى كۈنلىرىدە ھاۋا ئارمىيەسىنىڭ ئاساسلىق نىشانلىرىدىن بىرىنىڭ ئىران ئاسمىنىدا «ھاۋا ئۈستۈنلۈكى» نى قولغا كەلتۈرۈش ئىكەنلىكىنى بىلدۈرگەن ئىدى.

ئىسرائىلىيە ئارمىيەسىنىڭ قارىشىچە، ھۇجۇملار ئىراننىڭ خەۋپسىزلىك ۋە ھەربىي ئاپپاراتلىرى بىلەن مۇناسىۋەتلىك تەخمىنەن 2 مىڭ 200 نۇقتىنى نىشان قىلغان بولۇپ، بۇلارنىڭ ئىچىدە ئىران ئىنقىلابىي مۇھاپىزەتچىلەر قىسمىغا ئائىت ئەسلىھەلەر بىلەن ھۆكۈمەت ۋە خەۋپسىزلىك ئاپپاراتلىرىمۇ بار ئىكەن.

ئامېرىكا قوشما ئىشتاتلىرى بىلەن ئىسرائىلىيە 28-فېۋرالدىن بۇيان ئىرانغا بىرلىكتە ھۇجۇم قىلىشنى داۋاملاشتۇرۇپ، دىنىي رەھبەر ئەلى خامەنېينىمۇ ئۆز ئىچىگە ئالغان تەخمىنەن 1 مىڭ 300 كىشىنىڭ جېنىغا زامىن بولدى.

ئىران بولسا ئىسرائىلىيە بىلەن بىرگە ئىيوردانىيە، ئىراق ۋە پارىس قولتۇقى دۆلەتلىرىنى نىشان قىلغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى بىلەن قايتۇرما زەربە بەردى؛ ئىران بۇ ھۇجۇملارنىڭ ئامېرىكانىڭ ھەربىي مۈلۈكلىرىنى نىشان قىلغانلىقىنى، ئادەم ئۆلۈش ۋە بەزى پۇقراۋى ئۇل ئەسلىھەلەرنىڭ ۋەيران بولۇشىنى كەلتۈرۈپ چىقارغانلىقىنى، شۇنداقلا يەر شارى بازىرى ۋە ئاۋىياتسىيەگە تەسىر كۆرسەتكەنلىكىنى ئىلگىرى سۈردى.