تۈركىيە جۇمھۇر رەئىسى رەجەپ تاييىپ ئەردوغان ۋە باشقا دۇنيا رەھبەرلىرى 22-23-نويابىر كۈنلىرى جەنۇبىي ئافرىقادا ئۆتكۈزۈلىدىغان تارىخىي خاراكتېرلىك G20  باشلىقلار يىغىنى ئۈچۈن يوھاننېسبۇرگ شەھىرىگە يېتىپ كەلدى.

ئەردوغان ئور تامبو (OR Tambo)   خەلقئارا ئايرودۇرۇمىغا قونغاندا، ئۇنى جەنۇبىي ئافرىقا ئىنسانىي ئولتۇراقلىشىش مىنىستىرى تېمبىسىلې سىمېلانې (Thembisile Simelane)، تۈركىيەنىڭ پرېتورىيەدە تۇرۇشلۇق باش ئەلچىسى كەزبان نىلۋانا داراما يىلدىرىمگەچ ۋە باشقا ئەمەلدارلار قارشى ئالدى.

ئەردوغانغا، بىرىنچى خانىم ئەمىنە ئەردوغان، تاشقى ئىشلار مىنىستىرى خاقان فىدان، خەزىنە ۋە مالىيە مىنىستىرى مەھمەت شىمشەك، جۇمھۇر رەئىسلىك مەھكىمىسىنىڭ باش كاتىپى ھەسەن دوغان، ئۇچۇر-ئالاقە ئىشلىرى ئىدارىسىنىڭ باشلىقى بۇرھانەتتىن دۇران، تاشقى سىياسەت ۋە خەۋپسىزلىك مەسلىھەتچىسى ئاكىف چاغاتاي قىلىچ، ئادالەت ۋە تەرەققىيات پارتىيەسى (AK Party) مۇئاۋىن رەئىسى ۋە باياناتچىسى ئۆمەر چەلىك ھەمدە باشقا يۇقىرى دەرىجىلىك ئەمەلدارلار ھەمراھ بولدى.

يوھاننېسبۇرگ كۆرگەزمە مەركىزىدە ئۆتكۈزۈلىدىغان باشلىقلار يىغىنى مەزگىلىدە، ئەردوغاننىڭ شەنبە (22-نويابىر) كۈنى ئىككى يىغىنغا قاتنىشىشتىن باشقا، بىر قانچە رەھبەر بىلەن ئىككى تەرەپلىك ئۇچرىشىش ئۆتكۈزىدىغانلىقى ۋە دۆلەت ھەم ھۆكۈمەت باشلىقلىرى شەرىپىگە بېرىلىدىغان كەچلىك زىياپەتكە قاتنىشىدىغانلىقى بىلدۈرۈلدى.

مۇناسىۋەتلىك ئۇچۇرلارTRT World - South Africa slams 'US bullying' as Washington snubs G20

ئامېرىكا بىلەن جەنۇبىي ئافرىقا ئوتتۇرىسىدىكى يىرىكچىلىك

بۇ ھەپتە ئاخىرىدىكى باشلىقلار يىغىنىغا دۇنيادىكى ئەڭ باي ۋە تەرەققىي قىلىۋاتقان ئالدىنقى قاتاردىكى 18 ئىقتىسادىي گەۋدىنىڭ ۋەكىللەر ئۆمىكى قاتنىشىدۇ. بىراق، ئامېرىكا بۇنىڭ سىرتىدا بولۇپ، ئامېرىكا تەرەپ جەنۇبىي ئافرىقانىڭ يىغىنغا ساھىبخانلىق قىلىشىنى «شەرمەندىچىلىك» دەپ ئاتىغان ۋە سۆھبەتلەرگە قاتناشمايدىغانلىقىنى ئېلان قىلغان ئىدى.

دۇنيادىكى ئەڭ چوڭ ئىقتىسادىي گەۋدە ۋە G20 نىڭ قۇرغۇچى ئەزاسى تەرىپىدىن ئېلىپ بېرىلغان بۇ بايقۇت، ئامېرىكا پىرېزىدېنتى دونالد ترامپنىڭ پەرمانى بولۇپ، ئۇ قارا تەنلىكلەر كۆپ سانلىقنى ئىگىلەيدىغان جەنۇبىي ئافرىقانى نوپۇسى ئاز ئاق تەنلىك ئافرىقانلارغا زۇلۇم سېلىۋاتىدۇ دەپ ئەيىبلىگەن.

جەنۇبىي ئافرىقا ئامېرىكانىڭ دەۋالىرىنى رەت قىلدى

جەنۇبىي ئافرىقانىڭ تاشقى ئىشلار مىنىستىرى رونالد لامولا (Ronald Lamola) مۇنداق دېدى: «بىز يىغىنغا قاتناشقان دۆلەتلەرنى رەھبەرلەر خىتابنامىسىنى قوبۇل قىلىشقا قايىل قىلىش ئۈچۈن قەتئىيلىك بىلەن ئىلگىرىلەۋاتىمىز، چۈنكى باشلىقلار يىغىنى قاتناشمىغان بىرەرىسى سەۋەبىدىن توختاپ قالماسلىقى كېرەك.»

G20  گۇرۇھى نۆۋەتتە 21 ئەزاغا، يەنى 19 دۆلەت، ياۋروپا ئىتتىپاقى ۋە ئافرىقا ئىتتىپاقىغا كېڭەيدى. بۇ تەشكىلات باي ۋە نامرات دۆلەتلەرنى بىر يەرگە جەم قىلىپ، بولۇپمۇ يەر شارى ئىقتىسادىغا ئالاقىدار مەسىلىلەرنى ھەل قىلىشنى مەقسەت قىلىدۇ.

ب د ت، دۇنيا بانكاسى ۋە باشقا خەلقئارالىق ئورگانلارنىڭ رەھبەرلىرىمۇ ئەنئەنە بويىچە مېھمان سۈپىتىدە G20   باشلىقلار يىغىنىغا قاتنىشىدۇ. بۇ رامكىدا ب د ت باش كاتىپى ئانتونىيو گۇتېررېسمۇ يوھاننېسبۇرگغا يېتىپ كەلدى.

مۇناسىۋەتلىك ئۇچۇرلارTRT World - Guterres urges G20 to push for Sudan ceasefire, stop arms flow