ئىران سەھىيە مىنىستىرلىقى دۆلەتتە ئامېرىكا قوشما ئىشتاتلىرى بىلەن ئىسرائىلىيە تەرىپىدىن بىرلىكتە ئېلىپ بېرىلغان ھۇجۇملاردا ھاياتىدىن ئايرىلغانلار سانىنىڭ 926 غا يەتكەنلىكىنى جاكارلىدى.
مىنىستىرلىق باياناتچىسى ھۈسەيىن كەرمانپۇر 28-فېۋرالدىن 4-مارتقىچە بولغان ئارىلىقتا شۇ جاي ۋاقتى سائەت 17:00 گىچە (خەلقئارا ئۆلچەملىك ۋاقىت 13:30 گىچە) ئېلىپ بېرىلغان ھۇجۇملاردا 6186 كىشىنىڭ يارىلانغانلىقىنى ئېيتتى.
كەرمانپۇر ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، يارىلانغانلاردىن 2054 نەپىرىنىڭ نۆۋەتتە دوختۇرخانىلاردا داۋالىنىۋاتقانلىقىنى، 3545 كىشىنىڭ داۋالىنىپ دوختۇرخانىدىن چىققانلىقىنى، 552 كىشىنىڭ نەق مەيداندا تېببىي ياردەمگە ئېرىشكەنلىكىنى، ھازىرغىچە 502 قېتىم ئوپېراتسىيە خىزمىتى ئىشلەنگەنلىكىنى قەيت قىلدى.
ھاياتىدىن ئايرىلغانلارنىڭ ئەھۋالى
مىنىستىرلىقنىڭ مەلۇماتىغا ئاساسلانغاندا، ھاياتىدىن ئايرىلغانلاردىن %13 ى ئاياللار، %87 ى ئەرلەر ئىكەن.
كەرمانپۇر ھاياتىدىن ئايرىلغانلارنىڭ 180 نەپىرىنىڭ 18 ياشتىن تۆۋەن ئىكەنلىكىنى، بۇلارنىڭ ئارىسىدا بەش ياشتىن كىچىك ئۈچ بالىنىڭمۇ بارلىقىنى ئېيتتى.
ھاياتىدىن ئايرىلغانلار ئارىسىدا ئەڭ كىچىكى تېھراندىكى بىر ياشلىق بىر بالا ئىكەن.
يارىلانغانلار ئارىسىدا 301 كىشى 18 ياشتىن تۆۋەن، 39 كىشى بەش ياشتىن كىچىك ئىكەن. ئەڭ كىچىك يارىلانغۇچى ئالتە ئايلىق بىر ئوغۇل بوۋاق، يېشى ئەڭ چوڭ يارىلانغۇچى بولسا 91 ياشلىق ئەر ئىكەن.
ئىسرائىلىيە بىلەن ئامېرىكا قوشما ئىشتاتلىرى شەنبە كۈنىدىن بۇيان ئىرانغا قارىتىلغان كەڭ كۆلەملىك ھۇجۇملىرىنى داۋاملاشتۇردى؛ يۈزلىگەن كىشى ھاياتىدىن ئايرىلغان بۇ ھۇجۇملاردا ئالىي رەھبەر ئەلى ھامانېي ۋە يۇقىرى دەرىجىلىك ھەربىي ئەمەلدارلارمۇ ھاياتىدىن ئايرىلدى.
ئىران بولسا ئىسرائىلىيەنى ۋە ئامېرىكا ھەربىي كۈچلىرىگە ساھىبخانلىق قىلىۋاتقان پارىس قولتۇقى دۆلەتلىرىنى نىشان قىلىپ، ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبا ھۇجۇملىرى بىلەن جاۋاب قايتۇردى.
