ئامېرىكا پىرېزىدېنتى دونالد ترامپ بۇ باياناتىنى، ئىسرائىلىيە بىلەن ھاماس ئوتتۇرىسىدا ھاسىل قىلىنغان غەززە ئۇرۇش توختىتىش كېلىشىمى ئېلان قىلىنغاندىن كېيىن، گۆرۈگە ئېلىنغانلارنىڭ ئائىلىلىرى بىلەن ئۆتكۈزگەن تېلېفون سۆھبىتىدە قىلدى.
ئامېرىكا پىرېزىدېنتى دونالد ترامپ پەلەستىن قارشىلىق كۆرسىتىش ھەرىكىتى (ھاماس) نىڭ غەززەدىكى بارلىق ئىسرائىلىيەلىك ئەسىرلەرنى 13 – ئۆكتەبىر كۈنى قويۇپ بېرىدىغانلىقىنى جاكارلىدى.
ترامپ چارشەنبە كۈنى ئىسرائىلىيە بىلەن ھاماس ئوتتۇرىسىدا غەززەدە ئۇرۇش توختىتىش ئېلان قىلىنغاندىن كېيىن، ئىسرائىلىيەلىك ئەسىرلەرنىڭ ئائىلىلىرى بىلەن تېلېفون سۆھبىتى ئۆتكۈزدى.
گۆرۈگە ئېلىنغانلارنىڭ يېقىن – يېقىنلىرى كېلىشىم ھاسىل قىلىنىش يولىدا كۆرسەتكەن تىرىشچانلىقلىرى ئۈچۈن ترامپقا رەھمەت ئېيتتى.
ترامپ سۆھبەت جەريانىدا بارلىق ئىسرائىلىيەلىك ئەسىرلەرنىڭ دۈشەنبە كۈنى قويۇپ بېرىلىدىغانلىقىنى ئېيتتى.
ئامېرىكا پىرېزىدېنتى ترامپ ئاممىۋى ئورتاقلىشىش تور بېتى X سەھىپىسىدە ئېلان قىلغان بىر باياناتىدا، «بارلىق» ئىسرائىلىيەلىك ئەسىرلەرنىڭ قويۇپ بېرىلىدىغانلىقىنى تەكىتلىدى. لېكىن قويۇپ بېرىلىدىغانلار ئارىسىدا ھاياتىدىن ئايرىلغان ۋە گۆرۈگە ئېلىنغانلارنىڭ جەسەتلىرىنىڭ بار-يوقلۇقى توغرىسىدا مەلۇمات بەرمىدى.
ترامپ ئىلگىرى ئىسرائىلىيە بىلەن ھاماسنىڭ ئامېرىكا تەرىپىدىن تەۋسىيە قىلىنغان غەززە كېلىشىمىنىڭ بىرىنچى باسقۇچىنى قوبۇل قىلغانلىقىنى ئۇقتۇرغانىدى.
29 – سېنتەبىر كۈنى تۇنجى قېتىم ئېلان قىلىنغان 20 ماددىلىق پىلان، بارلىق ئىسرائىلىيەلىك ئەسىرلەرنى پەلەستىنلىك مەھبۇسلار بىلەن ئالماشتۇرۇش، ئۇرۇش توختىتىش، ھاماسنى قورالسىزلاندۇرۇش ۋە غەززەنى قايتا قۇرۇشنى ئۆز ئىچىگە ئالىدۇ.
ئىسرائىلىيەنىڭ 2023 – يىلى ئۆكتەبىردىن بۇيان غەززەدە داۋاملاشتۇرۇۋاتقان ھۇجۇملىرىدا كۆپىنچىسى ئاياللار ۋە بالىلاردىن تەشكىل تاپقان تەخمىنەن 67 مىڭ 200 پەلەستىنلىك ھاياتىدىن ئايرىلدى.
ئىسرائىلىيەنىڭ ئۈزلۈكسىز داۋاملىشىۋاتقان بومباردىمانلىرى غەززەنى ياشاش مۇمكىن بولمايدىغان ھالەتكە كەلتۈرۈپ، ئاچارچىلىق ۋە كېسەللىكلەرنى كەلتۈرۈپ چىقاردى.
