گېرمانىيە تاشقى ئىشلار مىنىستىرى يوھان ۋادېپۇل سەيشەنبە كۈنى، دۆلىتىنىڭ ئۇكرائىنادا سىجىل بىر تىنچلىق ئورنىتىش مەسىلىسىدە رۇسىيە بىلەن سۆھبەتلىشىشكە ئومۇمىي جەھەتتىن ئوچۇق ئىكەنلىكىنى، ئەمما «يول قويۇش» ياكى تەسلىم بولۇشنى رەت قىلىدىغانلىقىنى بىلدۈردى.
بېرلىندا كونراد ئادېناۋېر فوندى جەمئىيىتى تەرىپىدىن ئۇيۇشتۇرۇلغان «Cafe Kyiv» ناملىق ئۇكرائىنا مۇنبىرىدە سۆز قىلغان ۋادېپۇل مۇنداق دېدى: «ھەممىدىن بۇرۇن، ئەلۋەتتە سۆزلىشىشكە تېگىشلىك تەرەپ ئۇكرائىنا بولۇشى كېرەك. بىراق بىز سۆھبەتكە تەييارمىز. لېكىن بىز موسكۋاغا بېرىپ تېخىمۇ كۆپ يول قويىدىغان ئىشلارنى قىلمايمىز. بۇنداق قىلمايمىز. ئەگەر ئۇرۇش توختىتىلسا، سۆھبەتكە قارىتا ئەستايىدىل بىر ئىرادە بولسا، ئەلۋەتتە بىز ئۇ يەردە بولىمىز. بىراق راستىنى ئېيتقاندا، بىز ئۇنىڭغا (رۇسىيە پىرېزىدېنتى ۋلادىمىر پۇتىنغا) يالۋۇرمايمىز. ئەكسىچە مۇۋاپىق تەكلىپلەرنىڭ بىرىنىڭ ئاخىرى قوبۇل قىلىنىشىنى كۈتۈۋاتىمىز.»
ۋادېپۇل مىسال سۈپىتىدە، ھاكىمىيەت بېشىدىكى سوتسىيال دېموكراتلار پارتىيەسى (SPD) ئىچىدىن كەلگەن پۇتىنغا ئۇرۇش توختىتىش سۆھبىتى تەكلىپ قىلىش چاقىرىقلىرىنى رەت قىلىپ: «سۆھبەت يوللىرىدا بىر كەمچىلىك يوق. ئەمما پۇتىن سۆزلىشىشنى خالىمىسا، ھېچقانداق يول كارغا كەلمەيدۇ» دېدى.
قوشۇمچە ئېمبارگولار
تاشقى ئىشلار مىنىستىرى موسكۋانىڭ ئۇرۇش توختىتىش سۆھبىتىنى قوبۇل قىلىشى ئۈچۈن بېسىمنى كۈچەيتىش چاقىرىقىنى قايتا-قايتا تەكرارلىدى.
دۈشەنبە كۈنى بىريۇسسېلدا ئۆتكۈزۈلگەن ياۋروپا ئىتتىپاقى تاشقى ئىشلار مىنىستىرلىرى يىغىنىدىن ئىلگىرى گېرمانىيەلىك مىنىستىر مۇنۇلارنى قەيت قىلدى: «گېرمانىيەنىڭ پوزىتسىيەسى ئىنتايىن ئېنىق: ھازىر قەتئىيلىك كۆرسىتىشىمىز، ئۇكرائىنانى سىجىل تۈردە قوللىشىمىز ۋە ئۆتكەن يىلى قىلغىنىمىزدەك رۇسىيەگە قارىتىلغان بېسىمنى ئاشۇرۇشنى داۋاملاشتۇرۇشىمىز كېرەك. شۇڭا 20-نۆۋەتلىك ئېمبارگو بوغچىسىنى جىددىي تەييارلاۋاتىمىز ۋە ئاخىرىدا مۇۋەپپەقىيەت قازىنىدىغانلىقىمىزغا ئىشىنىمەن.»
