ئامېرىكا قوشما ئىشتاتلىرى پىرېزىدېنتى دونالد ترامپ يەكشەنبە كۈنى قىلغان سۆزىدە، ئىران دائىرىلىرىنىڭ دۆلەتنىڭ يادرو پىلانى توغرىسىدا سۆھبەتلىشىش ئۈچۈن ئامېرىكا بىلەن ئالاقە قىلغانلىقىنى ئاشكارىلىدى. بۇ ئەھۋال، ئىككى دۆلەت ئوتتۇرىسىدا كۈنسېرى كۈچىيىۋاتقان جىددىيچىلىك ئىچىدىكى يوشۇرۇن دىپلوماتىك پۇرسەتنىڭ سىگنالى دەپ قارالماقتا.
فلوۋرىدادىن ۋاشىنگتونغا كېتىۋاتقان «Air Force One» ئايروپىلانىدا مۇخبىرلارنىڭ سوئاللىرىغا جاۋاب بەرگەن ترامپ، ئىرانلىق ئەمەلدارلارنىڭ شەنبە كۈنى مۇزاكىرە تەلەپ قىلىپ تېلېفون قىلغانلىقىنى بىلدۈرۈپ مۇنداق دېدى:
«مېنىڭچە ئۇلار ئامېرىكا قوشما ئىشتاتلىرىنىڭ زەربىسىگە ئۇچراۋېرىشتىن ۋە ئۈزلۈكسىز قىستاڭچىلىققا دۇچ كېلىشتىن زېرىكتى. ئىران ھازىر مۇزاكىرە قىلىشنى خالايدۇ، شۇڭا بىز ئۇلار بىلەن كۆرۈشەلەيمىز.»
ترامپ نۆۋەتتە كۆرۈشۈش تەييارلىقىنىڭ داۋاملىشىۋاتقانلىقىنى، ئەمما نەق مەيداندىكى تەرەققىياتلار تۈپەيلى، ھەرقانداق بىر سۆھبەت ئېلىپ بېرىلىشتىن ئىلگىرى ئامېرىكانىڭ ھەرىكەتكە ئۆتۈشكە مەجبۇر بولۇشى مۇمكىنلىكى توغرىسىدا ئەسكەرتتى.
ئىران دۆلەت پۇلىنىڭ شىددەت بىلەن قىممىتىنى يوقىتىشى ۋە ئىقتىسادىي شارائىتنىڭ ناچارلىشىشى سەۋەبىدىن، ئۆتكەن يىلى دېكابىر ئېيىنىڭ ئاخىرىدىن بۇيان كەڭ كۆلەملىك نامايىشلار بىلەن تەۋرەنمەكتە. ترامپ ھۆكۈمەتنىڭ ئىراندىكى ۋەزىيەتنى يېقىندىن كۆزىتىۋاتقانلىقىنى ۋە نامايىشلاردا ئۆلۈم-يېتىم ۋەقەلىرىنىڭ كۆپىيىۋاتقانلىقىنى تىلغا ئېلىپ، ئۈستەلدە «ئىنتايىن كۈچلۈك تاللاشلار»نىڭ بارلىقىنى بىلدۈردى.
ئۇ سۆزىنىڭ ئاخىرىدا: «ھەربىي كۈچلىرىمىز بۇ مەسىلىگە قاراپ چىقىۋاتىدۇ، بىز يەنە بىر قىسىم ئىنتايىن كۈچلۈك تاللاشلارنى باھالاۋاتىمىز. بىز چوقۇم بىر قارارغا كېلىمىز،» دېگەنلەرنى سۆزلىرىگە ئىلاۋە قىلدى.
