مىسىر ئىچكى كابىنېتىمۇ تۈنۈگۈن دەميات پورتىدىكى 2 پاراخوتتا كېلىپ چىققان ئوت ئاپىتىنىڭ ئۇچقۇچىسىز ھاۋا ئاپپاراتى ھۇجۇمى نەتىجىسىدە يۈز بەرگەنلىكىنى جاكارلىدى.
ئىستانبۇل (ئانادولۇ ئاگېنتلىقى) – كۇۋەيت ئارمىيەسى ئىران تەرىپىدىن ئېلىپ بېرىلغان ھۇجۇمدا دۆلەتنىڭ شىمالىدىكى بىر خىتاي شىركىتىگە تەۋە بىنانىڭ نىشان قىلىنىشى نەتىجىسىدە بىر ئىشچىنىڭ ھاياتىدىن ئايرىلغانلىقىنى بىلدۈردى.
كۇۋەيت ئارمىيەسىنىڭ ئاممىۋى ئورتاقلىشىش تور بېتى X سەھىپىسىدە ئېلان قىلىنغان باياناتىدا، ئىران تەرىپىدىن ئېلىپ بېرىلغان ھۇجۇمدا كۇۋەيتنىڭ شىمالىدىكى خىتاي شىركىتىگە تەۋە بىر بىنانىڭ نىشان قىلىنغانلىقى، ھۇجۇم نەتىجىسىدە 1 ئىشچىنىڭ ھاياتىدىن ئايرىلغانلىقى، بىنادا ئېغىر زىيان كۆرۈلگەنلىكى بىلدۈرۈلدى.
باياناتتا يەنە، دائىرىلەرنىڭ ۋەقەگە مۇداخىلە قىلغانلىقى ۋە ئارمىيەنىڭ دۆلەتنىڭ ئىگىلىك ھوقۇقىنى قوغداش، بىخەتەرلىكى ۋە مۇقىملىقىغا كاپالەتلىك قىلىش مەقسىتىدە زۆرۈر بولغان بارلىق تەدبىرلەرنى قوللانغانلىقى ئىپادىلەندى.
مىسىر ئىچكى كابىنېتىمۇ تۈنۈگۈن دەميات پورتىدىكى 2 پاراخوتتا كېلىپ چىققان ئوت ئاپىتىنىڭ ئۇچقۇچىسىز ھاۋا ئاپپاراتى ھۇجۇمى نەتىجىسىدە يۈز بەرگەنلىكىنى جاكارلىدى.
مىسىر ئىچكى كابىنېتى تەرىپىدىن ئېلان قىلىنغان باياناتتا، ھۇجۇمنىڭ جاۋابكارلىقىنى تېخىچە ھېچكىمنىڭ ئۆز ئۈستىگە ئالمىغانلىقى ۋە ۋەقەگە مۇناسىۋەتلىك تەكشۈرۈشلەرنىڭ داۋاملىشىۋاتقانلىقى ئۇقتۇرۇلدى.
مىسىر نېفىت ئىشلىرى مىنىستىرلىقى تۈنۈگۈن ئېلان قىلغان باياناتىدا، دەميات پورتىدىكى ئىككى تەبىئىي گاز سۇيۇقلاندۇرۇش ۋە ساقلاش پاراخوتىدا ئوت ئاپىتى يۈز بەرگەنلىكىنى جاكارلىغان ئىدى.
