سېئۇل دائىرىلىرى، 2029-يىلىغىچە ئارمىيە، دېڭىز ئارمىيەسى، ھاۋا ئارمىيەسى ۋە دېڭىز ئارمىيە قۇرۇقلۇق جەڭ قىسمى ئۈچۈن 110 مىڭ ئۇچقۇچىسىز ھاۋا ئاپپاراتى ئىشلەپچىقىرىدىغانلىقىنى بىلدۈرمەكتە. ياۋروپا ۋە ئوتتۇرا شەرق تەۋەلىكىدە ئەرزان ۋە يەرلىك ئىشلەپچىقىرىلغان ئۇچقۇچىسىز ھاۋا ئاپپاراتلىرى ئەنئەنىۋى ھەربىي كۈچلەرگە جەڭ ئېلان قىلىشنى داۋاملاشتۇرماقتا.
جەنۇبىي كورېيە شىمالىي كورېيەگە قارشى ئۇچقۇچىسىز ھاۋا ئاپپاراتى ۋە ئۇچقۇچىسىز ھاۋا ئاپپاراتلىرىغا قارشى تۇرۇش ئىقتىدارىنى تېز سۈرئەتتە كېڭەيتمەكتە؛ دۆلەت مۇداپىئە مىنىستىرلىقىنىڭ ئېلان قىلغان باياناتىغا ئاساسلانغاندا، بۇ پىلان دائىرىسىدە 500 مىڭ «ئۇچقۇچىسىز ھاۋا ئاپپاراتى جەڭچىسى» يېتىشتۈرۈش ۋە ئالدىنقى سەپتىكى قىسىملارغا ئون نەچچە مىڭ ئۇچقۇچىسىز سىستېما تارقىتىپ بېرىش مۇھىم ئورۇندا تۇرىدۇ.
ئارمىيە يەنە قۇرۇقلۇق قىسىملىرى، دېڭىز ئارمىيەسى، ھاۋا ئارمىيەسى ۋە دېڭىز ئارمىيە قۇرۇقلۇق جەڭ قىسمى ئۈچۈن 2029-يىلىغىچە 110 مىڭ ئۇچقۇچىسىز ھاۋا ئاپپاراتى ئىشلەپچىقىرىشنى پىلانلىماقتا؛ نىشان، ئۇچقۇچىسىز ھاۋا ئاپپاراتلىرىنى ھەربىر ئەسكەرنىڭ ئۆلچەملىك جەڭ جابدۇقىغا ئايلاندۇرۇشتۇر.
دۆلەت مۇداپىئە مىنىستىرى ئان گيۇ-بەك جۈمە كۈنى ئۆتكۈزۈلگەن مۇخبىرلارنى كۈتۈۋېلىش يىغىنىدا: «ئۇچقۇچىسىز ھاۋا ئاپپاراتلىرى ئەمدى چەكلىك ساندىكى قىسىملارلا ئىشلىتىدىغان ئۈسكۈنە بولۇپ قالماسلىقى، بەلكى ئومۇميۈزلۈك بىر جەڭ قورالى بولۇشى كېرەك» دېدى ؛ ئۇ يەنە ئۇچقۇچىسىز ھاۋا ئاپپاراتلىرىنىڭ ئەسكەرلەر تەرىپىدىن «ئىككىنچى شەخسىي قورال» سۈپىتىدە ئىشلىتىلىدىغانلىقىنىمۇ سۆزلىرىگە ئىلاۋە قىلدى.
ئان گيۇ-بەك خەۋپسىزلىك ئەندىشىلىرىگە جاۋابەن، مەزكۇر سىستېمىلارنى قۇرۇشتا خىتاي زاپچاسلىرىنىڭ ئورنىغا يۈز پىرسەنت جەنۇبىي كورېيەدە ئىشلەپچىقىرىلغان زاپچاسلارغا تايىنىدىغانلىقىنى بىلدۈردى.
بۇ بايانات، ئۇچقۇچىسىز سىستېمىلارنىڭ جەڭ مەيدانىدا ھالقىلىق رول ئويناۋاتقان ئۇكرائىنا ۋە ئوتتۇرا شەرقتىكى توقۇنۇشلاردىن چىقىرىلغان تەجرىبە - ساۋاقلار ئاساسىدا، ئىككى كورېيەنىڭمۇ ئۇچقۇچىسىز ھاۋا ئاپپاراتى ئىقتىدارىنى تېزلىتىۋاتقان بىر مەزگىلدە ئېلان قىلىندى.
ئان گيۇ-بەك: «ئەرزانغا توختايدىغان ۋە كۆپ مىقداردا ئىشلىتىلىدىغان ئۇچقۇچىسىز ھاۋا ئاپپاراتلىرى ئۇرۇش قىلىش ئۇسۇلىنى تۈپتىن ئۆزگەرتمەكتە» دېيىش بىلەن بىرگە، شىمالىي كورېيەنىڭمۇ ئۇچقۇچىسىز سىستېمىلارنى تەرەققىي قىلدۇرۇۋاتقانلىقى ۋە جەنۇبتىكى ھەربىي ھەمدە پۇقراۋى ئەسلىھەلەرگە قارىتىلغان تەھدىتنى كۈچەيتىۋاتقانلىقى توغرىسىدا ئاگاھلاندۇرۇش بەردى.
جەنۇبىي كورېيەنىڭ پىلانى لازېر ۋە يۇقىرى قۇۋۋەتلىك مىكرو دولقۇنلۇق قوراللارغا ئوخشاش ئۇچقۇچىسىز ھاۋا ئاپپاراتىغا قارشى تۇرۇش سىستېمىلىرىنىڭ دائىرىسىنى كېڭەيتىشنى ھەمدە مەشغۇلاتلارنى مەركىزىي بىر قوماندانلىقنىڭ ئورنىغا، ھەربىر قىسىمنىڭ ئۇچقۇچىسىز ھاۋا ئاپپاراتلىرى بىلەن چارلاش ۋە زەربە بېرىش ۋەزىپىلىرىنى ئۆتەيدىغان شەكىلگە ئۆزگەرتىشنى ئۆز ئىچىگە ئالىدۇ.
يۇقىرى دەرىجىلىك بىر ھۆكۈمەت ئەمەلدارى، ئارمىيەنىڭ يەنە 20 مىڭدىن ئارتۇق تۆۋەن تەننەرخلىق ئۇچقۇچىسىز ھاۋا ئاپپاراتىنى تېز سۈرئەتتە سېتىۋالىدىغانلىقىنى ھەمدە سۈنئىي ئەقىلنى ئاساس قىلغان توپ سىستېمىلىرى بىلەن ھۇجۇمچى قوراللارنى ئىشقا كىرىشتۈرىدىغانلىقىنى بىلدۈردى.
مىنىستىرلىق پۇقراۋى تېخنىكىلارنى قوللىنىشنى تېزلىتىش ۋە يەرلىك ئۇچقۇچىسىز ھاۋا ئاپپاراتى ئېكولوگىيە سىستېمىسى بەرپا قىلىشنى قوللاش ئۈچۈن، سېتىۋېلىش بەلگىلىمىلىرىنى قايتىدىن تەرتىپكە سالىدىغانلىقىنى ۋە ئارمىيەنى چوڭ بىر سېتىۋالغۇچى ئورۇنغا ئايلاندۇرىدىغانلىقىنى بىلدۈردى.
بۇ كېڭەيتىش پىلانى ئالدىنقى ھۆكۈمەت مەزگىلىدىكى ئۇچقۇچىسىز ھاۋا ئاپپاراتى مەشغۇلاتلىرىغا مۇناسىۋەتلىك سىياسىي سەزگۈر مەسىلىلەر ئوتتۇرىغا چىققان بىر پەيتتە ئەمەلگە ئاشۇرۇلماقتا.
مۇشۇ ئايدا جەنۇبىي كورېيە سوت مەھكىمىسى، سابىق پىرېزىدېنت يۇن سۇكيولنى، تەپتىشلەر 2024-يىلىدىكى ھەربىي ھالەت ئېلان قىلىش ئۇرۇنۇشىنى قانۇنلاشتۇرۇشنى نىشان قىلغانلىقىنى ئىلگىرى سۈرگەن شىمالىي كورېيەگە قارىتىلغان ھەربىي ئۇچقۇچىسىز ھاۋا ئاپپاراتى بىلەن چېگرادىن كىرىش ۋەقەسى سەۋەبىدىن 30 يىللىق قاماق جازاسىغا ھۆكۈم قىلدى.
ھازىرقى پىرېزىدېنت لى جەميوڭ ھۆكۈمىتى، بۇ ئەيىبلەشلەرنىڭ تەسىرى نەتىجىسىدە ئۇچقۇچىسىز ھاۋا ئاپپاراتى مەشغۇلات قوماندانلىق مەركىزىنى ئەمەلدىن قالدۇردى؛ جۈمە كۈنى ئېلان قىلىنغان پىلانلار بولسا مەشغۇلاتلارنى ئايرىم ھەربىي قىسىملارنىڭ ئىختىيارىغا قويۇپ بېرىش ئارقىلىق، سىياسەت، ئىقتىدارنى تەرەققىي قىلدۇرۇش ۋە قوللاشقا ئەھمىيەت بېرىدىغان يېڭى بىر ئورگان بىلەن بۇ بوشلۇقنى تولدۇرۇشنى نىشان قىلماقتا.
جەنۇبىي كورېيە يەنە نوپۇسنىڭ ئازىيىپ كېتىشىدىن كېلىپ چىققان بېسىملارغا دۇچ كەلمەكتە؛ بۇ ئەھۋال ئارمىيەنىڭ جەڭ قىلىش ئىقتىدارىنى ساقلاپ قېلىش ئۈچۈن ئاپتوماتلاشتۇرۇش ۋە ئۇچقۇچىسىز سىستېمىلارغا تېخىمۇ كۆپ تايىنىشىنى تەقەززا قىلماقتا.
