پەلەستىن ئازادلىق تەشكىلاتىغا (FKÖ) قاراشلىق «ئايرىش تېمى ۋە يەھۇدىي ئولتۇراق رايونلىرىغا قارشى تۇرۇش كېڭىشى» ئېلان قىلغان 15 كۈنلۈك دوكلاتتا، ئىشغالچى ئىسرائىلىيە دائىرىلىرىنىڭ غەربىي قىرغاقتىكى يەھۇدىي ئىشغال ئورۇنلىرىغا 895 يېڭى تۇرالغۇ سېلىشنىمۇ ئۆز ئىچىگە ئالغان 11 پىلاننى ئېلان قىلغانلىقى بىلدۈرۈلدى.
دوكلاتتا، مەزكۇر 11 پىلاننىڭ يېڭى تۇرالغۇلاردىن باشقا سودا ۋە مۇلازىمەت ساھەلىرىنى كېڭەيتىشنىمۇ ئۆز ئىچىگە ئالىدىغانلىقى، ئىسرائىلىيەنىڭ بۇ قەدەملەر ئارقىلىق قانۇنسىز يەھۇدىي ئولتۇراق رايونلىرى ئوتتۇرىسىدىكى باغلىنىشنى كېڭەيتىپ، پەلەستىن ئولتۇراق رايونلىرىنى تېخىمۇ يېتىم قالدۇرۇشنى نىشان قىلغانلىقى تەكىتلەندى.
جۇغراپىيەلىك ۋە نوپۇس قۇرۇلمىسى قايتا شەكىللەندۈرۈلمەكتە
شەرقىي قۇددۇسنى ئۆز ئىچىگە ئالغان غەربىي قىرغاقتا «مۇستەملىكىچىلىك كېڭىيىش ۋاسىتىلىرىنىڭ بىر گەۋدىلەشكەن ھالدا ئىشلىتىلىۋاتقانلىقىغا» دىققەت تارتىلغان دوكلاتتا، شەرقىي قۇددۇسنىڭ شەرقىدىكى «E1» ئولتۇراق رايونى لايىھەسىنىڭ پەلەستىنلىكلەرگە تەۋە بىر ئەل-مەسكۇب مەھەللىسىدىكى ئۆيلەرنىڭ چېقىلىشى بىلەن بىر ۋاقىتتا داۋاملاشتۇرۇلۇۋاتقانلىقى ۋە 31 ئولتۇراق نۇقتىسىدا ئوق ئېتىش مەيدانلىرى قۇرۇش پىلانىنىڭ تەستىقلانغانلىقى بىلدۈرۈلدى.
سانلىق مەلۇماتلارغا قارىغاندا، مەزكۇر مەزگىلدە تەخمىنەن 2 مىڭ 536 گېكتار يەر «دۆلەت زېمىنى» دەپ تۈرگە ئايرىلغان بولسا، غەربىي قىرغاقنىڭ شىمالىدىكى سەلفىت ۋە جېنىن شەھەرلىرىدە تەخمىنەن 9 مىڭ 488 گېكتار يەر كۆچمەنلەرنىڭ چارۋا بېقىش پائالىيەتلىرىگە ئاجرىتىلغان.
بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ 2016-يىللىق 2334-نومۇرلۇق قارارىغا ئاساسەن، 1967-يىلىدىن بۇيان ئىشغال ئاستىدا تۇتۇلۇۋاتقان پەلەستىن زېمىنلىرىدىكى بارلىق ئىسرائىلىيە ئولتۇراق رايونلىرى قانۇنسىز ۋە خەلقئارا قانۇنغا ئوچۇق خىلاپ دەپ قارىلىدۇ.














