تۈرك دۆلەتلىرى تەشكىلاتى ئىچكى ئىشلار مىنىستىرلىرىنىڭ 3-قېتىملىق يىغىنى مۇناسىۋىتى بىلەن قازاقىستاندا زىيارەتتە بولۇۋاتقان ئىچكى ئىشلار مىنىستىرى مۇستافا چىفتىچى، پايتەخت ئاستانادىن كېيىن تۈركىستان شەھىرىنى زىيارەت قىلدى.
تۈركىستان شەھىرىدە خوجا ئەھمەد يەسسەۋىي مەقبەرىسى بىلەن ئەھمەد يەسسەۋىي ئۇنىۋېرسىتېتىدىمۇ زىيارەتتە بولغان مىنىستىر چىفتىچى، شۇنىڭ بىلەن بىر ۋاقىتتا قازاقىستان ئىچكى ئىشلار مىنىستىرى يېرجان سادېنوۋ بىلەنمۇ ئۇچراشتى.
ئۇچرىشىشتا ئىككى دۆلەتنىڭ قانۇن ئىجرا قىلىش ئورگانلىرى ئوتتۇرىسىدىكى ھەمكارلىقنى كۈچەيتىش مەسىلىسى مۇزاكىرە قىلىندى. بولۇپمۇ چېگرا ھالقىغان جىنايەتلەر ۋە تور جىنايەتلىرىگە قارشى كۈرەش، چارلاش-ئاختۇرۇش پائالىيەتلىرى، كۆچمەنلەر خەۋپسىزلىكى، خادىم تەربىيەلەش ۋە مۇناسىۋەتلىك ئورگانلار ئوتتۇرىسىدىكى بىۋاسىتە ھەمكارلىق قاتارلىق تېمىلار ئۈستىدە توختىلىپ ئۆتۈلدى.
مىنىستىرلار ئۇچرىشىشتىن كېيىن، قازاقىستان بىلەن تۈركىيە ئوتتۇرىسىدىكى ئۆتكۈزۈپ بېرىش كېلىشىمىنى ئىمزالىدى.
مىنىستىر سادېنوۋ قىلغان سۆزىدە قازاقىستان بىلەن تۈركىيەنى، قېرىنداشلىق مۇناسىۋەتلىرى ۋە يۇقىرى دەرىجىدىكى ئۆزئارا ئىشەنچنىڭ بىر-بىرىگە باغلاپ تۇرۇۋاتقانلىقىنى، بۇنىڭ ئىككى دۆلەت ئورگانلىرى ئوتتۇرىسىدىكى كونكرېت ھەمكارلىقلاردىمۇ نامايان بولۇۋاتقانلىقىنى ئېيتتى.
تەرەپلەر كېيىنكى مەزگىلدە ئورگانلار ئوتتۇرىسىدىكى بىۋاسىتە ئالاقىنى راۋاجلاندۇرۇش، تەجرىبە ئالماشتۇرۇشنى كۆپەيتىش ۋە خەۋپسىزلىككە ئالاقىدار نۆۋەتتىكى مەسىلىلەردە ئورتاق خىزمەتلەرنى كۈچەيتىش جەھەتتە بىردەكلىك ھاسىل قىلدى. ئۆتكۈزۈپ بېرىش كېلىشىمىنىڭ، ئىككى دۆلەت ئوتتۇرىسىدا كۆچمەنلەر ساھەسىدىكى ھەمكارلىقنىڭ قانۇنىي ئاساسىنى مۇستەھكەملىشى ھەمدە تەرەپلەرنىڭ زېمىنىدا تۇرۇش ئۈچۈن قانۇنلۇق ئاساسى بولمىغان كىشىلەرنى ئۆتكۈزۈپ بېرىشكە ئالاقىدار رەسمىيەتلەرنى بېكىتىشى نىشان قىلىنماقتا.
