خىتاي بىلەن ئامېرىكا 30 مىليارد دوللارلىق تاۋار سودىسىدا ئۆزئارا تاموژنا بېجىنى تۆۋەنلىتىش، خىتاينىڭ ئامېرىكادىن كۆمۈر ئىمپورت قىلىشى، يېزا ئىگىلىك مەھسۇلاتلىرى ۋە پۇل-مۇئامىلە مۇلازىمىتىدە ئۆزئارا بازارغا كىرىش ئىمكانىيىتى يارىتىش، شۇنداقلا سۈنئىي ئەقىل سۆھبىتىنى باشلاش توغرىسىدا كېلىشتى.
خىتاي دۆلەت رەئىسى شى جىنپىڭنىڭ ئامېرىكا زىيارىتى ۋە زىيارەتتىن ئىلگىرى ئىككى دۆلەت ئىقتىساد ھەيئەتلىرىنىڭ نىيۇيورك بىلەن ۋاشىنگتوندا ئۆتكۈزگەن سۆھبەتلىرىدە، بىر قاتار ئىقتىسادىي ۋە سودا مەسىلىلىرىدە كېلىشىم ھاسىل قىلىندى.
خىتاي سودا مىنىستىرلىقىنىڭ باياناتىدا دېيىلىشىچە، تەرەپلەر ئىككى دۆلەت ئوتتۇرىسىدىكى سودىنى قولايلاشتۇرۇش ئۈچۈن، «سودا كېڭىشى» قۇرۇش توغرىسىدا كېلىشكەن. بۇ كېڭەش دائىرىسىدىكى سۆھبەتلەر نەتىجىسىدە 30 مىليارد دوللارلىق تاۋار سودىسىدا ئۆزئارا تاموژنا بېجىنى تۆۋەنلىتىش قارار قىلىنغان.
كۆمۈر ئىمپورتىمۇ ئۆزئارا تاموژنا بېجىنى تۆۋەنلىتىش دائىرىسىگە كىرگۈزۈلگەن. كېلىشىمگە ئاساسەن، خىتاي 2027 ۋە 2028-يىللىرى ئامېرىكادىن كۆمۈر ئىمپورت قىلىدۇ.
باياناتتا تەرەپلەرنىڭ ئىككى دۆلەت ئوتتۇرىسىدىكى ئىقتىسادىي ۋە سودا سۆھبىتى مېخانىزمى دائىرىسىدە «مەبلەغ سېلىش كېڭىشى» قۇرۇش توغرىسىدىمۇ كېلىشكەنلىكى بىلدۈرۈلدى. بۇ كېڭەش يوشۇرۇن مەبلەغ سېلىش پۇرسەتلىرى ۋە ئۇلارنىڭ ئالدىدىكى توسالغۇلار ھەققىدە مۇنتىزىم ئالاقە سۇپىسى بىلەن تەمىنلەيدىكەن.
سودا كېڭىشى دائىرىسىدە يەنە يېزا ئىگىلىكى خىزمەت گۇرۇپپىسى قۇرۇلىدىكەن. بۇ گۇرۇپپىدا ئىككى دۆلەتنىڭ يېزا ئىگىلىك مەھسۇلاتلىرىغا ئۆزئارا بازارغا كىرىش ئىمكانىيىتى يارىتىش مەسىلىسى مۇزاكىرە قىلىنىدىكەن.
ئىككى دۆلەت پۇل-مۇئامىلە مۇلازىمىتى بازىرىغا كىرىش مەسىلىسىدىمۇ پىرىنسىپ جەھەتتىن كېلىشتى. خىتاي ئامېرىكا مەبلىغىدىكى شىركەتلەرنىمۇ ئۆز ئىچىگە ئالغان دۇنيانىڭ ھەرقايسى جايلىرىدىكى پۇل-مۇئامىلە مۇلازىمىتى بىلەن تەمىنلىگۈچى ئورگانلارنىڭ خىتايدا شۆبە ئېچىش ۋە تىجارەت قىلىش ئىلتىماسىنى باھالايدىكەن.
سۈنئىي ئەقىل سۆھبىتى
باياناتتا، خىتاي مۇئاۋىن باش مىنىستىرى خې لىفېڭ بىلەن ئامېرىكا مالىيە مىنىستىرى سكوت بېسېنت باشچىلىقىدىكى ھەيئەتلەرنىڭ سۈنئىي ئەقىل ھەققىدە سۆھبەت باشلىغانلىقى بىلدۈرۈلدى.
ھەيئەتلەر سۈنئىي ئەقىلگە مۇناسىۋەتلىك خەۋپ ۋە مەنپەئەتلەر ھەققىدە دەسلەپكى مۇزاكىرىنى ئۆتكۈزدى. تەرەپلەر سۆھبەتنىڭ ئىككىنچى باسقۇچىنى نويابىرنىڭ ئاخىرىدىن بۇرۇن ئۆتكۈزۈش ۋە بۇ تېخنىكىغا مۇناسىۋەتلىك ھادىسىلەر يۈز بەرگەندە ئىشلىتىلىدىغان ئالاقە يولى قۇرۇش توغرىسىدا كېلىشتى.
خىتاي دۆلەت رەئىسى شى جىنپىڭ ئۆتكەن ھەپتە ئامېرىكادا رەسمىي زىيارەتتە بولغانىدى.
