ۋېنېزۇئېلا پىرېزىدېنتى نىكولاس مادۇرو، ئون كۈن بۇرۇن ئامېرىكا پىرېزىدېنتى دونالد ترامپ بىلەن لاتىن ئامېرىكىسىغا ئامېرىكا ئەسكەرلىرىنىڭ توپلىنىشىغا مۇناسىۋەتلىك «سەمىمىي» بىر تېلېفون سۆھبىتى ئۆتكۈزگەنلىكىنى دەلىللىدى.
مادۇرو چارشەنبە كۈنى دۆلەت تېلېۋىزىيەسىگە بەرگەن باياناتىدا: «ئامېرىكا قوشما ئىشتاتلىرى پىرېزىدېنتى دونالد ترامپ بىلەن كۆرۈشتۈم. سۆھبەتنىڭ ھۆرمەت دائىرىسىدە، ھەتتا سەمىمىي بولغانلىقىنى ئېيتالايمەن. ئەگەر بۇ سۆھبەت دۆلەتلەر ئارىسىدا، ئەللەر ئارىسىدا ھۆرمەتلىك بىر دىيالوگقا قاراپ قەدەم تاشلانغانلىقىدىن دېرەك بەرسە، دىيالوگنى ۋە دىپلوماتىيەنى مەمنۇنىيەت بىلەن قارشى ئالىمىز، چۈنكى بىز ھەر ۋاقىت تىنچلىقنى ئىزدەيمىز» دېگەن سۆزلەرنى ئىشلەتتى.
ئاۋغۇست ئېيىدىن بۇيان ئامېرىكا قوشما ئىشتاتلىرى زەھەر ئەتكەسچىلىكىگە قارشى كۈرەش قىلىش سەۋەبى بىلەن كارىب دېڭىزىغا بىر ئۇرۇش پاراخوتى فىلوتى ۋە دۇنيانىڭ ئەڭ چوڭ ئاۋىياماتكىسىنى ئورۇنلاشتۇرغان بولۇپ، ئاز دېگەندە 22 كېمىگە ئەجەللىك ھۇجۇم قىلغان، كەم دېگەندە 83 كىشىنىڭ ئۆلۈمىگە سەۋەب بولغان ئىدى.
مادۇرو بولسا بۇ ھەرىكەتنىڭ سولچىل ھۆكۈمەتنى ئاغدۇرۇپ تاشلاش ۋە ئاخىرىدا دۆلەتنىڭ كەڭ نېفىت زاپىسىنى قولغا كىرگۈزۈش مەقسىتىدە قىلىنغانلىقىنى ئېيتتى.
ترامپ يەكشەنبە كۈنى مادۇرو بىلەن تېلېفوندا كۆرۈشكەنلىكىنى دەلىللىدى، ئەمما تەپسىلاتى ھەققىدە مەلۇمات بەرمىدى.
سۆھبەتنىڭ، مادۇرونىڭ ۋەزىپىدىن چېكىنگەن تەقدىردە ئېھتىماللىق بولغان بىر ئۇچرىشىش ياكى كەچۈرۈم قىلىش شەرتلىرى ھەققىدە مۇنازىرىلەرنى ئۆز ئىچىگە ئالغانلىقىغا دائىر خەۋەرلەردىن كېيىن بايانات بېرىشى تەلەپ قىلىنغاندا، ترامپ بايانات ئېلان قىلىپ: «ياخشى ياكى يامان ئۆتتى دەپ ئېيتالمايمەن. بۇ پەقەت بىر تېلېفون سۆھبىتى ئىدى» دېدى.
ۋاشىنگتون مادۇرونى ئاتالمىش «قۇياش كارتىلى» نىڭ لىدېرى بولۇش بىلەن ئەيىبلەپ، بۇ قۇرۇلمىنى 24-نويابىردا تېررورلۇق تەشكىلاتى دەپ ئېلان قىلدى. ئۇنىڭدىن باشقا، مادۇرونىڭ تۇتۇلۇشىنى تەمىنلەيدىغان ئۇچۇر ئۈچۈن 50 مىليون دوللار مۇكاپات قويۇلغانلىقى بىلدۈرۈلدى.
