ئامېرىكا مۇداپىئە مىنىستىرى پېت ھېگسېت پېنتاگون رەھبەرلىك قاتلىمىنى قايتىدىن تەشكىللىمەكتە؛ ترامپ ھۆكۈمىتى دەۋرىدىكى ئۆزگىرىشلەر دائىرىسىدە، قۇرۇقلۇق ئارمىيە قوماندانى راندى جورج پېنسىيەگە چىقتى، شۇنداقلا بىر قىسىم يۇقىرى دەرىجىلىك ھەربىي ئەمەلدارلار ۋەزىپىسىدىن ئېلىپ تاشلاندى.

پېنتاگون پەيشەنبە كۈنى بايانات ئېلان قىلىپ، گېنېرال راندى ئا. جورجنىڭ 41-نۆۋەتلىك قۇرۇقلۇق ئارمىيە قوماندانلىق ۋەزىپىسىدىن «دەرھال كۈچكە ئىگە بولۇش شەرتى بىلەن» پېنسىيەگە چىقىدىغانلىقىنى ئۇقتۇردى.

ئامېرىكا مۇداپىئە مىنىستىرلىقى ئېلان قىلغان قىسقا باياناتىدا، جورجنىڭ نەچچە ئون يىللىق ھەربىي خىزمىتىگە يۇقىرى باھا بەردى. پېنتاگون باياناتچىسى شان پارنېل بايانات ئېلان قىلىپ: «مىنىستىرلىق گېنېرال جورجنىڭ دۆلىتىمىز ئۈچۈن قىلغان نەچچە ئون يىللىق خىزمىتىگە مىننەتدارلىق بىلدۈرىدۇ. ئۇنىڭ پېنسىيە ھاياتىغا ئۇتۇق تىلەيمىز»، دېگەنلەرنى قەيت قىلدى.

بۇنىڭدىن ئىلگىرى «CBS News» تېلېۋىزىيەسى ئامېرىكا مۇداپىئە مىنىستىرى پېت ھېگسېتنىڭ گېنېرال جورجدىن ئىستېپا بېرىشىنى ۋە دەرھال پېنسىيەگە چىقىشىنى تەلەپ قىلغانلىقىنى خەۋەر قىلغان ئىدى. مەزكۇر قارارغا يېقىن مەنبەلەرگە ئاساسلانغان خەۋەردە، ھېگسېتنىڭ پىرېزىدېنت دونالد ترامپنىڭ ئامېرىكا ئارمىيەسىگە بولغان تەسەۋۋۇرىنى ئەمەلگە ئاشۇرالايدىغان بىرەيلەننى بۇ ۋەزىپىگە قويماقچى بولغانلىقى قەيت قىلىندى.

جورج 2021-2022-يىللىرى بايدىن ھۆكۈمىتى دەۋرىدە، ئەينى ۋاقىتتىكى مۇداپىئە مىنىستىرى لويىد ئوستىننىڭ يۇقىرى دەرىجىلىك ھەربىي مەسلىھەتچىسى بولۇپ خىزمەت قىلغان. جورج قۇرۇقلۇق ئارمىيە قوماندانلىق ۋەزىپىسىگە 2023-يىلى 21-سېنتەبىر تەيىنلەنگەن ئىدى. نورمال ئەھۋالدا، قۇرۇقلۇق ئارمىيە قوماندانلىرى بۇ ۋەزىپىنى تۆت يىل ئۆتەيدۇ.

يەنە ئىككى گېنېرال ۋەزىپىسىدىن ئېلىپ تاشلاندى

ئامېرىكا دائىرىلىرىدىن ئۈچ ئەمەلدار مۇداپىئە مىنىستىرى ھېگسېتنىڭ پەيشەنبە كۈنى قۇرۇقلۇق ئارمىيەنىڭ يەنە ئىككى يۇقىرى دەرىجىلىك گېنېرالىنى ۋەزىپىسىدىن ئېلىپ تاشلىغانلىقىنى بىلدۈردى. ئەمەلدارلار بۇ كىشىلەرنىڭ قۇرۇقلۇق ئارمىيە باش پوپى، گېنېرال مايور ۋىللىيام گىرىن ۋە قۇرۇقلۇق ئارمىيە تىرانسفورماتسىيە ۋە تەربىيەلەش قوماندانلىق مەركىزىنىڭ باشلىقى، گېنېرال لېيتېنانت داۋىد خودنې ئىكەنلىكىنى ئاشكارىلىدى.

رەسمىي دىنىي زات بولغان گىرىن قۇرۇقلۇق ئارمىيە پوپ ئەترىتىنى نازارەت قىلاتتى ھەمدە قوشۇن ئىچىدىكى دىنىي مەسىلىلەرنى ئۆز ئىچىگە ئالغان ئەخلاقىي تېمىلاردا ئارمىيە يۇقىرى دەرىجىلىك رەھبەرلىرىگە مەسلىھەت بېرەتتى. گىرىن جەڭچى قوماندان بولماستىن، بەلكى ئارمىيەنىڭ ئەڭ يۇقىرى دەرىجىلىك دىنىي رەھبىرى ئىدى.

جەڭ تەجرىبىسىگە ئىگە پىيادە ئەسكەرلەر ئوفىتسېرى بولغان خودنې بولسا ئىلگىرى ئارمىيەنىڭ ئاساسلىق جەڭچى قىسىملىرىدىن بىرى بولغان 4-پىيادە قىسىملار دىۋىزىيەسىنىڭ قوماندانلىق ۋەزىپىسىنى ئۆتىگەن؛ ئىراق ۋە ئافغانىستاندا ھەربىي ھەرىكەتلەرگە قوماندانلىق قىلىش ۋەزىپىلىرىنى ئۈستىگە ئالغان ئىدى. خودنې تەربىيەلەش، ئۇرۇشقا تەييارلىق قىلىش ۋە زامانىۋىلاشتۇرۇش خىزمەتلىرىنى شەكىللەندۈرۈشتە رول ئوينايتتى.

بۇ ئىككى ۋەزىپە ئارمىيە رەھبەرلىك قۇرۇلمىسىنىڭ ئوخشاش بولمىغان ساھەلىرىگە ۋەكىللىك قىلىدۇ: گىرىن ئەخلاق ۋە دىنىي جەھەتتىن قوللاشقا ئەھمىيەت بەرسە؛ خودنېنىڭ مەسئۇلىيىتى ئۇرۇشقا تەييارلىق قىلىش، تىرانسفورماتسىيە ۋە زامانىۋىلاشتۇرۇشقا مەركەزلەشكەن ئىدى. بۇ كىشىلەرنىڭ ۋەزىپىسىدىن ئېلىپ تاشلىنىشى، پەقەتلا ھەرىكەت رەھبەرلىكىدە ئەمەس، بەلكى ئارمىيەنىڭ ئورگان ۋە مەدەنىيەت رەھبەرلىك قاتلاملىرىدىمۇ ئۆزگىرىشلەرنىڭ بولىدىغانلىقىدىن بېشارەت بەرمەكتە.

ھېگسېت ترامپنىڭ ئىككىنچى نۆۋەتلىك پىرېزىدېنتلىق دەۋرىدە ھازىرغىچە نۇرغۇن ئەمەلدارنى ۋەزىپىسىدىن ئېلىپ تاشلىدى. مىنىستىر ئۆتكەن يىلى ئىيۇن ئېيىنىڭ باشلىرىدا، ئامېرىكانىڭ ئىراننىڭ يادرو ئەسلىھەلىرىگە قاراتقان ھۇجۇملىرىنىڭ ترامپ دەۋا قىلغاندىنمۇ چەكلىك ئىكەنلىكى ئوتتۇرىغا قويۇلغان بىر باھالاشتىن كېيىن، مۇداپىئە ئىستىخبارات ئىدارىسى (DIA) باشلىقى، ھاۋا ئارمىيە گېنېرال لېيتېنانتى جېفرېي كرۇسېنى ۋەزىپىسىدىن ئېلىپ تاشلىغانىدى.

بۇنىڭدىن ئىلگىرى ئامېرىكانىڭ شىمالىي ئاتلانتىك ئەھدى تەشكىلاتى — ناتو ھەربىي كومىتېتىدىكى ۋەكىلى، گېنېرال لېيتېنانت شوشانا چاتفىلىدنىمۇ ۋەزىپىسىدىن ئالغان ھېگسېت ئۈچۈن باياناتچى پارنېل «رەھبەرلىكىگە بولغان ئىشەنچنىڭ يوقىلىشى»نى سەۋەب قىلىپ كۆرسەتكەن ئىدى. ھېگسېت تەرىپىدىن ۋەزىپىسىدىن ئېلىپ تاشلانغان باشقا كىشىلەر ئارىسىدا باش شتاب باشلىقى سى كىيۇ بىراۋن، ئامېرىكا تور قوماندانلىق مەركىزى ۋە دۆلەتلىك بىخەتەرلىك ئىدارىسى (NSA) مۇدىرى، ھاۋا ئارمىيە گېنېرالى تىموتى خاۋ ھەمدە دېڭىز قىرغىقى مۇداپىئە قوماندانلىق مەركىزىنىڭ قوماندانى، ئادمىرال لىندا فاگانلارمۇ بار.