مەسئۇللارنىڭ بىلدۈرۈشىچە، رۇسىيە ئۇكرائىناغا راكېتالار، ئۇچقۇچىسىز ئايروپىلانلار ۋە باشقۇرۇلىدىغان بومبىلار بىلەن ئېغىر زەربە بەرگەن. ھۇجۇمدا سەككىز كىشى ھاياتىدىن ئايرىلىپ، ئونلىغان كىشى يارىلانغان.
شەھەر باشلىقىنىڭ ئېيتىشىچە، راكېتالار پايتەخت كىيېۋغىمۇ چۈشكەن، ئىككى كىچىك بالىنى قوشقاندا جەمئىي 12 كىشى يارىلانغان.
پەۋقۇلئادە تېز سۈرئەتلىك ئونلىغان باللىستىك راكېتا ئىشلىتىلگەن بۇ قېتىمقى ھۇجۇملاردا، ئۇكرائىنانىڭ ھاۋا مۇداپىئە سىستېمىسى ئېغىر ئەھۋالدا قالغان.
ئۇكرائىنا پىرېزىدېنتى ۋولودىمىر زېلېنسكىي X سۇپىسىدىكى ئۇچۇرىدا، كېچە بويىچە 120 دىن ئارتۇق ئۇچقۇچىسىز ئايروپىلان ۋە 12 راكېتا قويۇپ بېرىلگەنلىكىنى، بۇلارنىڭ يېرىمىنىڭ باللىستىك راكېتا ئىكەنلىكىنى ئەسكەرتىپ: «ھاۋا ھۇجۇمى ئاگاھلاندۇرۇشى بېرىلىشتىن ئىلگىرىلا ئاممىۋىي ئۇل ئەسلىھەلەر زىيانغا ئۇچرىدى» دېدى ھەمدە ۋەيران بولغان بىنالارنىڭ ئىس تۈتۈكلىرى ۋە خارابىلىكلىرى ئارىسىدا خىزمەت قىلىۋاتقان قۇتقۇزۇش ئەترەتلىرىگە تەۋە ۋىدىيولارنى ھەمبەھىرلىدى.
زېلېنسكىي كىيېۋدا تۇرالغۇ بىنالار، ئىشخانىلار ۋە بىر دىنىي مەكتەپنىڭ زىيانغا ئۇچرىغانلىقىنى، باشقا رايونلاردا بولسا قۇتقۇزۇش خىزمەتلىرىنىڭ داۋاملىشىۋاتقانلىقىنى بىلدۈردى.
شىمالدىكى سۇمى شەھىرىنىڭ باشلىقى ئارتېم كوبزارمۇ رۇسىيەنىڭ «باشقۇرۇلىدىغان بومبا» ھۇجۇمىدا شەھەردە بەش كىشىنىڭ ھاياتىدىن ئايرىلغانلىقىنى مەلۇم قىلدى.
مەسئۇللارنىڭ باياناتىغا ئاساسلانغاندا، شەرقتىكى سلوۋىئانسىك يېزىسىغا قىلىنغان رۇسىيە ھۇجۇمىدا بىر كىشى ھاياتىدىن ئايرىلغان، جەنۇبتىكى ئودېسسا شەھىرىگە قىلىنغان رۇسىيە راكېتا ھۇجۇمىدا بولسا، ئىككى كىشى ھاياتىدىن ئايرىلغان.
راداردىن قېچىش
شەنبە كۈنى كىيېۋغا قىلىنغان ھۇجۇم، ھاۋا ھۇجۇمى ئاگاھلاندۇرۇشى بېرىلىشتىن ئىلگىرىلا راكېتالار چۈشكەن، بىر ھەپتە ئىچىدىكى ئىككىنچى ۋەقە بولدى.
ئۇكرائىنا مۇداپىئە مىنىستىرىنىڭ مەسلىھەتچىسى سېرگىي ستەرنېنكو «سىگىنال ئاۋازى ئاڭلىنىشتىن ئىلگىرىلا ۋەيرانچىلىق ئەھۋالىنىڭ يۈز بېرىشى، رۇسىيەنىڭ قۇرۇقلۇقتىكى نىشانلارغا قارىتىلغان ھۇجۇملىرىدا S-400 ھاۋا مۇداپىئە راكېتالىرىنى ئىشلىتىۋاتقان بولۇشى مۇمكىنلىكىگە ئىشارەت قىلىدۇ» دېدى، تېلېگرام ھېسابىدا: «قۇرۇقلۇق ھۇجۇملىرىدا، بۇ راكېتالارنى رادار ئارقىلىق ئېنىقلاپ چىقىش تېخىمۇ قىيىن» دېگەن ئۇچۇرنى ھەمبەھىرلىدى.
رۇسىيە پۇقرالارنى نىشانلىغانلىقىنى رەت قىلىپ، كىيېۋدىكى «ھەربىي-سانائەت ئەسلىھەلىرىنى ۋە ئودېسسادىكى پورت ئۇل ئەسلىھەلىرىنى» نىشانلىغانلىقىنى ئېلان قىلدى.
جۈمە كۈنى ئۇكرائىنا ئۇچقۇچىسىز ئايروپىلانلىرى، رۇسىيەنىڭ ئېنېرگىيە ئۇل ئەسلىھەلىرىنى نىشانلاش دائىرىسىدە، رۇسىيەنىڭ جەنۇبىدىكى نېفىت پىششىقلاپ ئىشلەش زاۋۇتلىرىغا زەربە بەرگەن ئىدى.
