ئىران يادرو ئېنېرگىيەسى ئىستانسىسى جايلاشقان بۇشەھر شەھىرىدە يېڭى بىخەتەرلىك تەدبىرلىرىنى يولغا قويۇپ، چەت ئەللىكلەر ۋە مۇساپىرلارنىڭ ئىستانسىغا 5 كىلومېتىر كېلىدىغان جايدا تۇرۇشى ۋە ئىشلىشىگە چەكلىمە قويدى.
ئىران رەسىمىي خەۋەر ئاگېنتلىقى — ئىرنانىڭ خەۋىرىگە قارىغاندا، بۇشەھرنىڭ بىخەتەرلىك ئىشلىرىغا مەسئۇل مۇئاۋىن ۋالىيسى ئېھسان جىھانيان بۇ ھەقتە بايانات ئېلان قىلىپ: «چەت ئەللىكلەر ۋە مۇساپىرلارنىڭ بۇشەھر يادرو ئىستانسىسىنىڭ 5 كىلومېتىر ئەتراپىدا ۋە بۇ ۋىلايەتنىڭ گەناۋە، دەيلەم ھەمدە ئاسەلۇيە ناھىيەلىرىدە چەت ئەللىكلەر ۋە مۇساپىرلارنىڭ ئىشلىشى ۋە تۇرۇشى مەنئى قىلىندى» دېدى.
بارلىق چەت ئەللىكلەر ۋە مۇساپىرلاردىن مەزكۇر ناھىيەلەرنى قىسقا مۇددەت ئىچىدە تەرك ئېتىشنى تەلەپ قىلغان جىھانيان، بۇنىڭغا خىلاپلىق قىلغان كىشىلەرنىڭ ئىقامەتلىرىنىڭ بىكار قىلىنىپ، چېگرادىن قوغلاپ چىقىرىلىدىغانلىقىنى بىلدۈردى.
جىھانيان يادرو ئىستانسىسىغا يېقىن مەھەللىلەردە تۇرۇۋاتقان ياكى ئىشلەۋاتقان مۇساپىرلار ھەققىدە توختىلىپ: «يادرو ئىستانسىسىنىڭ 5 كىلومېتىر يېقىن ئەتراپىدا چەت ئەللىكلەرنىڭ ئىشلىشى ۋە تۇرۇشى چەكلەنگەچكە، مۇساپىرلارنىڭ بۇشەھردىكى ھەلىلە ۋە بەندەرگاھ قاتارلىق رايونلاردا تۇرۇشى ۋە ئىشلىشىگىمۇ رۇخسەت قىلىنمايدۇ» دېگەنلەرنى قەيت قىلدى.
