بۇ ئىچكى ئۇرۇشتىن بۇيان بىر ب د ت باش كاتىپىنىڭ سۇرىيەگە ئېلىپ بارغان تۇنجى زىيارىتى بولۇپ قالدى.
بىرلەشكەن دۆلەتلەر تەشكىلاتى باش كاتىپى ئانتونىئو گۇتېررېس سۈرىيەنىڭ ئەسادتىن كېيىنكى ئۆتۈش مۇساپىسىنى ئىجرا قىلىۋاتقان بىر پەيتىدە، خەلقئارا جەمئىيەتنىڭ سۇرىيە بىلەن قايتىدىن ئالاقە قۇرغانلىقىغا ئىشارەت قىلىدىغان بۇ قېتىمقى زىيارىتى دائىرىسىدە شەنبە كۈنى دەمەشقكە يېتىپ كەلدى.
گۇتېررېس دەمەشق خەلقئارا ئايرودۇرۇمىدا سۇرىيە تاشقى ئىشلار مىنىستىرى ئەسئەد ئەش-شەيبانى تەرىپىدىن كۈتۈۋېلىندى.
ئۈچ كۈن داۋاملىشىدىغان زىيارەت دائىرىسىدە گۇتېررېسنىڭ دۆلەت رەئىسى ئاھمەد ئەششارا، يۇقىرى دەرىجىلىك مەسئۇللار، ئاممىۋى جەمئىيەت ۋەكىللىرى ۋە دۆلەتتە يېڭىدىن قۇرۇلغان ئۆتۈش پارلامېنتىنىڭ ئەزالىرى بىلەن كۆرۈشۈشى كۈتۈلمەكتە.
بۇ زىيارەت بان كىمۇننىڭ سۇرىيەدىكى ئىچكى ئۇرۇش باشلىنىشتىن ئىككى يىل ئىلگىرى، يەنى 2009-يىلى دەمەشقكە قىلغان زىيارىتىدىن بۇيان بىر ب د ت باش كاتىپىنىڭ سۈرىيەگە قىلغان تۇنجى زىيارىتى بولۇش ئالاھىدىلىكىگە ئىگە.
توقۇنۇشلاردا يېرىم مىليوندىن ئارتۇق كىشى ھاياتىدىن ئايرىلغان، مىليونلارچە كىشى ئۆي-ماكانسىز قالغان ئىدى. ھاكىمىيەت رەھبىرى بەششار ئەساد بولسا 2024-يىلى دېكابىردا تەختتىن ئاغدۇرۇلغان ئىدى.
سۇرىيەنىڭ ئۆتۈش مۇساپىسىنى قوللاش
ب د ت باش كاتىپىنىڭ، ب د ت سۇرىيە ئالاھىدە ۋەكىلى كلوۋدىئو كوردونې دۆلەت تارىخىدىكى «بەلگىلىگۈچى بىر مەزگىل» دەپ تەرىپلىگەن بۇ مۇساپىدە، ب د ت نىڭ سۇرىيەنىڭ سىياسىي ئۆتۈش ۋە قايتىدىن قۇرۇپ چىقىش خىزمەتلىرىگە بولغان قوللىشىنى قايتا تەكىتلىشى كۈتۈلمەكتە.
گۇتېررېس ھۆكۈمەت مەسئۇللىرى بىلەن ئۆتكۈزىدىغان سۆھبەتلەردىن باشقا، ئاممىۋى تەشكىلات ۋەكىللىرى ۋە ئاياللارغا قارىتىلغان خىزمەتلەرنى ئېلىپ بارىدىغان ئورگانلار بىلەنمۇ بىر يەرگە جەم بولىدۇ.
بۇ ئالاقىلەرنىڭ ب د ت نىڭ دۆلەت ئورگانلىرىنىڭمۇ سىرتىغا سوزۇلغان تېخىمۇ كەڭ كۆلەملىك ئارىلىشىشىنى تەكىتلىشى كۈتۈلمەكتە.
رايون خاراكتېرلىك بىخەتەرلىك كۈن تەرتىپتە
گۇتېررېسنىڭ يەنە ئىسرائىلىيەنىڭ ئىشغالىيىتى ئاستىدىكى گولان ئېگىزلىكلىرىدە ۋەزىپە ئۆتەۋاتقان بىرلەشكەن دۆلەتلەر تەشكىلاتى تىنچلىق ساقلاش قىسىملىرىنى زىيارەت قىلىشى پىلانلانماقتا.
ب د ت تىنچلىقنى ساقلاش قىسىملىرى، 1974-يىلىدىن بۇيان سۇرىيە بىلەن ئىسرائىلىيە ئوتتۇرىسىدىكى ئۇرۇش توختىتىش سىزىقىنى نازارەت قىلىپ كەلمەكتە.
زىيارەت سۇرىيەنىڭ ئون يىلدىن ئارتۇق داۋاملاشقان توقۇنۇشلار ۋە سىياسىي قالايمىقانچىلىقلاردىن كېيىن خەلقئارا جەمئىيەت بىلەن بولغان مۇناسىۋەتلىرىنى قايتىدىن تىكلەش ۋە دۆلەتتە مۇقىملىقنى ئىشقا ئاشۇرۇشقا ئۇرۇنۇۋاتقان بىر پەيتتە ئېلىپ بېرىلماقتا.
