ياۋروپا غەربىي تىراكيا تۈرك فېدېراتسىيەسى تۈركىيەدىكى بۈيۈكئادا رۇم باشلانغۇچ مەكتىپىنىڭ 4 ئوقۇغۇچى بىلەن قايتا ئېچىلغانلىقى تەرەپكە دىققەتلەرنى تارتىلدى.
باياناتتا، ئىستانبۇل بۈيۈكئادادا 1999-يىلىدىكى مارمارا يەر تەۋرەشتە زىيانغا ئۇچرىغانلىقى سەۋەبىدىن تاقالغان خۇسۇسىي رۇم باشلانغۇچ مەكتىپىنىڭ ئىككى يىل داۋاملاشقان رېمونت خىزمىتىدىن كېيىن قايتا ئوقۇ-ئوقۇتۇش پائالىيىتىنى باشلىغانلىقى ئەسكەرتىلدى. شۇنداقلا تۈركىيەدە 2013-يىلى گۆكچەئادادا 3 ئوقۇغۇچى بىلەن بىر رۇم مەكتىپىنىڭ، بۇ يىلمۇ بۈيۈكئادادا 4 ئوقۇغۇچى بىلەن رۇم باشلانغۇچ مەكتىپىنىڭ قايتا ئېچىلغانلىقى مىسال كۆرسىتىلىپ، گىرېتسىيەدە تۈرك ئاز سانلىق مىللەت مەكتەپلىرىنىڭ تاقىلىشى تەنقىد قىلىندى.
گىرېتسىيە مائارىپ مىنىستىرلىقىنىڭ قارارى بىلەن 2026-2027-ئوقۇش يىلىدا غەربىي تىراكيادا يەنە 8 تۈرك ئاز سانلىق مىللەت باشلانغۇچ مەكتىپىنىڭ تاقالغانلىقى بىلدۈرۈلۈپ، ئاز سانلىق مىللەتنىڭ لوزان كېلىشىمى بىلەن كاپالەتكە ئىگە قىلىنغان مائارىپ ئاپتونومىيەسىگە ھۆرمەت قىلىنىشى تەلەپ قىلىندى.
باياناتتا يەنە، تۈركچە ۋە گىرېكچە قوش تىللىق يەسلىلەرنىڭ ئېچىلىشى، ئىسكەچە تۈرك ئاز سانلىق مىللەت تولۇقسىز ۋە تولۇق ئوتتۇرا مەكتىپى ئۈچۈن يېڭى بىنا ئاجرىتىش ياكى سېلىش تەلەپلىرىنىڭ ئورۇندالمىغانلىقى، شۇنداقلا مەكتەپ ھەيئەتلىرىنىڭ ھوقۇقلىرىنىڭ بارغانسېرى چەكلىنىپ، بەزى ھەيئەت ئەزالىرىنىڭ ئۆزلىرى ۋەزىپە ئۆتەۋاتقان مەكتەپلەرگە كىرىشىگىمۇ رۇخسەت قىلىنمىغانلىقى قەيت قىلىندى.
باياناتتا: «غەربىي تىراكيا تۈرك ئاز سانلىق مىللىتى بولۇش سۈپىتىمىز بىلەن دۆلىتىمىزدىن ئىمتىياز ئەمەس، بەلكى ئىككى تەرەپلىك ۋە خەلقئارالىق كېلىشىملەردىن كېلىپ چىققان ھوقۇقلىرىمىزنىڭ تولۇق ئىجرا قىلىنىشىنى، مائارىپ ئاپتونومىيەمىزگە ۋە ئانا تىلدا مائارىپ تەربىيەسى ئېلىش ھوقۇقىمىزغا ھۆرمەت قىلىنىشىنى تەلەپ قىلىمىز» دېيىلدى.














