پىرېزىدېنت دونالد ترامپ ئاقسارايدا مۇخبىرلارنىڭ دىزېل ئېكسپورتىنى چەكلەش توغرىسىدا قارار چىقارغان-چىقارمىغانلىقى توغرىسىدىكى سوئالغا جاۋاب بېرىپ، بۇ مەسىلىنى ئېنېرگىيە مىنىستىرى كرىس رايت ۋە ئىچكى ئىشلار مىنىستىرى داگ بۇرگۇم بىلەن دائىم مۇزاكىرە قىلىدىغانلىقىنى ئېيتتى.
ترامپنىڭ بىلدۈرۈشىچە، رايت بىلەن بۇرگۇم بۇ خىل چەكلىمىنىڭ دىزېل باھاسىنى تۆۋەنلىتىشكە ياردەم بېرىدىغانلىقىنى، ئەمما باشقا بەزى مەھسۇلاتلارنىڭ باھاسىنى ئۆستۈرۈۋېتىشى مۇمكىنلىكىنى ئوتتۇرىغا قويغان.
ترامپ: «مېنىڭچە، ئەھۋالىمىز ياخشى، چۈنكى نېفىت باھاسى تۆۋەنلەشكە باشلايدۇ. ھازىر ھورمۇز بوغۇزىدىن ناھايىتى كۆپ مىقداردا نېفىت چىقىۋاتىدۇ» دېدى.
ئۇ دىزېل باھاسىدىكى مەسىلىنىڭ رۇسىيەدىكى ئۆزگىرىشلەر بىلەن مۇناسىۋەتلىك ئىكەنلىكىنى ئىلگىرى سۈرۈپ، مۇنداق دېدى:
«چۈنكى ئۇ يەردىكى دىزېل پىششىقلاپ ئىشلەش زاۋۇتلىرى كىشىنى قاتتىق ئەندىشىگە سالىدىغان سۈرئەتتە ئىشتىن چىقىرىلىۋاتىدۇ. بۇ ئىش يۈز بەرمىگەن بولسا، دىزېل مەسىلىمىز بولمايتتى. رۇسىيە بىلەن ئۇكرائىنا ئوتتۇرىسىدا يۈز بېرىۋاتقان ئىشلار دىزېل جەھەتتىكى ئەڭ چوڭ مەسىلىگە ئايلاندى.»
ئامېرىكا ئېنېرگىيە مىنىستىرى رايتمۇ رۇسىيەدىن كېلىدىغان دىزېل تەمىناتىنىڭ ئازىيىشى سەۋەبىدىن تەمىناتتا قىسچىلىق كۆرۈلگەنلىكىنى بىلدۈردى. ئۇ ئوتتۇرا شەرق ۋە خىتايدىن كېلىدىغان دىزېل تەمىناتىدىمۇ مەلۇم دەرىجىدە ئازىيىش بولغانلىقىنى ئېيتتى.
ئامېرىكا ئاپتوموبىلچىلار جەمئىيىتى (AAA) نىڭ سانلىق مەلۇماتلىرىغا قارىغاندا، ئامېرىكادا دىزېلنىڭ ھەر گاللونىنىڭ ئوتتۇرىچە باھاسى 22-سېنتەبىر 6.53 دوللارغا يېتىپ، رېكورت ياراتقان. 30-سېنتەبىرگە كەلگەندە، بۇ باھا 6.41 دوللار بولغان.
