گىرېتسىيەنىڭ «To Vima» گېزىتىدە ئېلان قىلىنغان تەھلىلدە يازغۇچى ياننىس مارىنوس (Yannis Marinos) تۈركىيەنىڭ ھەربىي، ئىقتىسادىي ۋە گېئوسىياسىي سانلىق مەلۇماتلىرىنىڭ سەل قاراشقا بولمايدىغان بىر رېئاللىقنى ئوتتۇرىغا قويغانلىقىنى تەكىتلىدى. ئۇ تۈركىيەنىڭ ئىستراتېگىيەلىك قەدەملىرى بىلەن رايونلۇق زور كۈچكە ئايلانغانلىقىنى ۋە ئۇنىڭ ئىقتىدارىنى ھېچقانداق دۆلەتنىڭ يوققا چىقىرالمايدىغانلىقىنى ئەسكەرتتى.
ماقالىدە تۈركىيەنىڭ مىللىي ئىشلەپچىقىرىش ئومۇمىي قىممىتىنىڭ بۇ يىل 1 تىرىليون 600 مىليارد دوللارغا يېتىشى بىلەن ئوتتۇرا شەرقتىكى ئەڭ چوڭ ئىقتىسادىي گەۋدىگە ئايلىنىدىغانلىقى بايان قىلىندى. تۈركىيەنىڭ 2025-يىلىدىكى تاشقى سودا سوممىسى 635 مىليارد دوللارغا يەتكەن بولۇپ، سودىنىڭ كۆپ قىسمى ياۋروپا ئىتتىپاقى دۆلەتلىرىگە قارىتىلغان. ھەربىي ساھەدە تۈركىيەنىڭ ناتودا ئامېرىكادىن كېيىنكى ئىككىنچى چوڭ ئارمىيەگە ئىگە ئىكەنلىكى، مۇداپىئە سانائىتى ئېكسپورتىنىڭ بولسا ئاخىرقى بەش يىلدا ئۈچ ھەسسە ئاشقانلىقى ئالاھىدە تىلغا ئېلىندى.
دىپلوماتىيە جەھەتتە، تۈركىيەنىڭ سۈرىيەدىكى يېڭى ھاكىمىيەت، قاتار، سەئۇدى ئەرەبىستان ۋە ئەرەب بىرلەشمە خەلىپىلىكى بىلەن بولغان يېقىنلىشىشلىرىنىڭ ئىقتىسادقا بىۋاسىتە سېلىنما ئېلىپ كەلگەنلىكى تەكىتلەندى. شۇنداقلا ئىراق ۋە ئەربىل ھاكىمىيىتى بىلەن تۈزۈلگەن كېلىشىملەرنىڭ نېفىت تىرانسپورتىدا ھالقىلىق رول ئويناۋاتقانلىقى، ئىران بىلەن بولغان تۆت ئەسىرلىك مۇقىم چېگرانىڭ بولسا رايونلۇق رىقابەتكە قارىماي بىر ئىشەنچ مۇھىتى ياراتقانلىقى قەيت قىلىندى.
