/

رۇسىيە پىرزىدېنتى ۋلادىمىر پۇتىن، پايتەخت موسكۋادا ئۆتكۈزۈلگەن رۇسىيە مۇداپىئە مىنىستىرلىقى يىغىنىدا سۆز قىلىپ، دۇنيادىكى ھەربىي-سىياسىي ۋەزىيەتنىڭ مۇقىمسىز ئىكەنلىكىنى، ئوتتۇرا شەرقتە قان تۆكۈلۈشنىڭ داۋاملىشىۋاتقانلىقىنى ۋە دۇنيانىڭ باشقا نۇرغۇن رايونلىرىدا توقۇنۇش چىقىش ئېھتىمالىنىڭ يۇقىرى ئىكەنلىكىنى بىلدۈردى.

پۇتىن، غەربنىڭ دۇنيادىكى ھۆكۈمرانلىقىنى ساقلاشقا، ئۆز قائىدىلىرىنى باشقا دۆلەتلەرگە تېڭىشقا ئۇرۇنۇۋاتقانلىقىنى، رۇسىيەنى توسۇش ۋە ئىستراتېگىيەلىك مەغلۇبىيەتكە ئۇچرىتىش سىياسىتىنى يۈرگۈزۈۋاتقانلىقىنى، ئامېرىكانىڭ ئۇكرائىنادا توقۇنۇشلارنىڭ داۋاملىشىشىنى قوللاۋاتقانلىقىنى ئىلگىرى سۈردى.

شىمالىي ئاتلانتىك ئەھدى تەشكىلاتى —ناتونىڭ رۇسىيە چېگرالىرىغا يېقىن جايلاردىكى ھەربىي قۇرۇلمىسىنى كۈچەيتىۋاتقانلىقىغا ئىشارەت قىلغان پۇتىن، ياۋروپادىكى ئامېرىكا ئەسكەرلىرى سانىنىڭ 100 مىڭدىن ئاشقانلىقىنى قەيت قىلىپ، غەربنىڭ ئاسىيا-تىنچ ئوكيان رايونىدىمۇ مەۋجۇتلۇقىنى كۈچەيتىپ، «رايوننىڭ بىخەتەرلىك قۇرۇلمىسى»نى ئاجىزلاشتۇرۇۋاتقانلىقىنى تەكىتلىدى.

پۇتىن، رۇسىيەنىڭ بۇ تەھدىتلەرگە قارىتا زۆرۈر تەدبىرلەر ئالغانلىقىنى ۋە ئۇكرائىنا ئۇرۇش شارائىتىدا «ئورېشنىكى» بالىستىك باشقۇرۇلىدىغان بومبا سىستېمىسىنى سىناق قىلغانلىقىنى بىلدۈرۈپ، رۇسىيە ئارمىيەسىنىڭ بۇ يىل جەمئىي 189 ئولتۇراق رايوننى ئازاد قىلغانلىقىنى سۆزلىرىگە ئىلاۋە قىلدى.